جۋرناليستەر اراسىندا شاعىن فۋتبولدان اشىق تۋرنير ءوتتى

ءتۋرنيردىڭ ماقساتى - قازاق جۋرناليستيكاسىنىڭ دامۋىنا زور ۇلەس قوسقان نۇرتىلەۋ يمانعالي ۇلى, امانگەلدى سەيىتحان جانە بەيسەن قۇرانبەكتى ەسكە الۋ جانە ەڭبەكتەرىن دارىپتەۋ.

ءىس-شاراعا نۇرتىلەۋ يمانعالي ۇلىنىڭ جۇبايى قارلىعاش سوۆەتبەكقىزى, بەيسەن قۇرانبەكتىڭ جارى گۇلميرا زەرباي جانە امانگەلدى سەيىتحاننىڭ ۇلى بەگاسىل سەيىتحانوۆ قاتىستى.

ءتۋرنيردىڭ اشىلۋ سالتاناتىندا ءسوز العان مارات نابيەۆ ءىس-شارانىڭ ماڭىزدىلىعىنا توقتالىپ ءوتتى.

«جۋرناليستيكا سالاسىنىڭ ءمۇيىزى قاراعايداي الىپتارىن ەسكە الۋعا ارنالعان بۇگىنگى دودادا بارشاڭىزدى كورگەنىمىزگە قۋانىشتىمىز. دارا تۇلعالاردىڭ ەسىمدەرىن ۇلىقتاۋ – ءسىز بەن ءبىزدىڭ ازاماتتىق بورىشىمىز. مەنىڭ اكەم اسكەن نابيەۆ جۋرناليست بولعان. سوندىقتان ماعان جۋرناليستيكامەن, اقپاراتپەن اينالىستىن  ادامدار وتە جاقىن. اكەمنىڭ 100 جىلدىق مەرەيتويىمەن تۇسپا-تۇس كەلگەن وسى شارانىڭ مەن ءۇشىن ماڭىزى ەرەكشە», دەدى م.نابيەۆ.

شارا بارىسىندا جارتى عاسىرعا جۋىق عۇمىرىن قازاق جۋرناليستيكاسى مەن تەلەۆيزياسىنا ارناعان نۇرتىلەۋ يمانعالي ۇلى تۋرالى ەستەلىكتەر ايتىلدى.

«قازاق جۋرناليستيكاسىنىڭ دامۋىنا زور ۇلەس قوسقان نۇرتىلەۋ يمانعالي ۇلى, امانگەلدى سەيىتحان جانە بەيسەن قۇرانبەكتى ەسكە الۋعا ارنالعان جارىستىڭ ويداعىداي وتۋىنە تىلەكتەسپىن. وسىنداي يگى شارا ۇيىمداستىرۋشىلارىنا العىسىم شەكسىز», دەدى قارلىعاش سوۆەتبەكقىزى.

ءوز كەزەگىندە گۇلميرا زەرباي جارىسقا قاتىسۋشىلارعا ساتتىلىك تىلەپ, «بەيسەن جانە بولمىس» كىتابىن تارتۋ ەتتى.

شارا اياسىندا بەگاسىل سەيىتحانوۆ اكەسى تۋرالى ەستەلىكتەرمەن ءبولىستى.

«اكەم قازاق سپورتىنىڭ دامۋىنا وزىندىك ۇلەسىن قوستى. فۋتبولدى جاقسى كورىپ, ءبىراز جىل ءوزى دە دوپ تەپتى. وسىنداي يگى شارالار جالعاسىن تابا بەرسە ەكەن دەيمىز», دەدى ب.سەيىتحانوۆ.

دوداعا بارلىعى 8 كوماندا, اتاپ ايتقاندا, جەتىسۋ وبلىسىنان كەلگەن «Qareket» كومانداسى, ەكسپرەسس ك, Qazcontent, Meta-ratings.kz, قوس قۇراممەن كەلگەن قازمەديا ورتالىعى, «MonkeyMediaKZ» جانە ۇيىمداستىرۋشىلاردىڭ كومانداسى ءتۇستى.

توپتىق سىننان سۇرىنبەي وتكەن 4 كوماندا جارتىلاي فينالدا ءوزارا باق سىناستى. ا توبىنىڭ كوشباسشىسى «Meta-ratings.kz» كومانداسى ۆ توبىنان ەكىنشى ورىنمەن شىققان قازمەديا 2 كومانداسىنا جول بەرسە, ۆ توبىنىڭ كوشباسشىسى «ەكسپرەسس ك» كومانداسى قازمەديا 1 كومانداسىنان ايلاسىن اسىرا المادى. قوس ويىننىڭ دا ناتيجەسى 1:0 بولىپ تىركەلدى.

جۇلدەلى ءۇشىنشى ورىن ءۇشىن بولعان ويىندا «Meta-ratings.kz» كومانداسى ەكى دوپ ايىرماسىمەن «ەكسپرەسس ك» كومانداسىن تىزە بۇكتىردى.

ءسويتىپ, قوس قۇراممەن كەلگەن قازمەديا ورتالىعى كوماندالارىنىڭ جولدارى  اقتىق سىندا ءتۇيىستى. تارتىستى وتكەن ويىن نەگىزگى ۋاقىتتا 3:3 ەسەبىمەن اياقتالىپ, پەنالتي سەرياسى بويىنشا قازمەديا 1 كومانداسى جەڭىسكە جەتتى.

تۋرنير قورىتىندىسى بويىنشا «ۇزدىك قاقپاشى» اتالىمى «ەكسپرەسس ك» كومانداسىنىڭ قاقپاشىسى قانات بازىلحانعا بۇيىرسا, «ۇزدىك قورعاۋشى» اتالىمىنا Qareket» كومانداسىنىڭ قورعاۋشىسى ازامات شەدينباي يە بولدى. «ۇزدىك شابۋىلشى» بولىپ قازمەديا 2 كومانداسىنىڭ شابۋىلشىسى شىڭعىس ەرعاليەۆ تانىلسا, جاقسى ويىن-ورنەگىن كورسەتكەن «Meta-ratings.kz» كومانداسىنىڭ ويىنشىسى مۇراگەر مۇراتوۆ «ۇزدىك ويىنشى» اتاندى.

ايتا كەتەيىك, جەڭىمپازدار مەن جۇلدەگەرلەر جانە جەكەلەي اتالىمدار بويىنشا ۇزدىك دەپ تانىلعان ويىنشىلار ديپلوممەن, ارنايى كۋبوكپەن جانە اقشالاي سىيلىقپەن ماراپاتتالدى.