قازاق جانكۇيەرلەرى وزبەكستاندىق وديلحون كامولوۆتى جاقسى بىلەدى. «OCTAGON» ليگاسىندا ونەر كورسەتىپ جۇرگەن ول الماتىعا كەلىپ, جەرلەستەرىمىزبەن ءۇش رەت كۇش سىناستى. سول جارىستاردا كامولوۆ ايدار ءالىپحان مەن ەركەبۇلان توقتاردى ايقىن باسىمدىقپەن جەڭىپ, جاقسىلىق تۇرسىنبايدان ويسىراي جەڭىلدى.
ءدال وسى وديلحوننىڭ باسى قازىر ۇلكەن داۋعا قالدى. ماسەلەنىڭ ءمانىسى مىناداي: 4 ناۋرىزدا تاشكەنتتەگى «OCTAGON-42» تۋرنيرىندە ول «كاميل كاراتە» دەگەن جاناما ەسىممەن تانىلعان تاجىكستاننىڭ تانىمال سپورتشىسى, كۋميتەدەن الەم چەمپيوناتىنىڭ كۇمىس جۇلدەگەرى كاماريددين حاسانوۆپەن كۇش سىناستى. تورعا كىرمەس بۇرىن-اق قارسىلاستار جەكپە-جەك توڭىرەگىندەگى جاعدايدى شەگىنە جەتكىزىپ, الەۋمەتتىك جەلى ارقىلى ءبىر-ءبىرىن وڭدىرماي بالاعاتتادى. ءتىپتى ەكەۋى تاشكەنتتەگى ءدامحانالاردىڭ بىرىندە توبەلەسكەن دە كورىنەدى. وسىلايشا, كوپشىلىك تاعاتسىزدانا كۇتكەن ايقاس وتەتىن كۇن دە كەلىپ جەتتى. بىراق ءبىرىنشى راۋندتا «كاميل كاراتە» قولىن قاتتى جاراقاتتاپ الىپ, باسەكە مەرزىمىنەن بۇرىن توقتاتىلدى. اقىرى بۇل جەكپە-جەكتىڭ ناتيجەسى ەسەپكە الىنعان جوق.
كەيىن ءمالىم بولعانداي, اتالعان جارىستىڭ وتۋىنە ءبىر كۇن قالعاندا كاماريددين حاسانوۆ ورنالاسقان قوناقۇيگە وديلحون كامولوۆ كەلىپ, ونىڭ ءبىرىنشى راۋندتا ۇتىلۋىن وتىنگەن ەكەن. سول «قىزمەتى» ءۇشىن 6 مىڭ اقش دوللارى كولەمىندە قارجى ۇسىنعان. جارتىسىن قازىر الاسىڭ, قالعانىن جەكپە-جەك اياقتالعان سوڭ بەرەمىن دەپ ۋادە ەتىپتى. ەكىجاقتى «كەلىسسوزدەر» بارىسىن بەينەبايلانىس ارقىلى وزبەك سپورتشىسىنىڭ رەسمي وكىلى ديلشود وميروۆ باقىلاپ وتىرعان. ول: «جارىس وزبەكستاندا وتەتىندىكتەن, ءبىزدىڭ جەڭىلۋگە قاقىمىز جوق. وديلحون قالاي دا ۇتۋى كەرەك. ەگەر سەن كەلىسىم بەرمەسەڭ, وندا ءبىز بۇل جەكپە-جەكتى وتكىزبەۋدىڭ ءبىر امالىن تابامىز», دەپ كەسىپ ايتقان.
جوعارىداعى ۇسىنىسقا كەلىسكەندەي سىڭاي تانىتقان «كاميل كاراتە» قارسىلاسى قوناقۇيدەن كەتكەن بەتتە بىردەن «OCTAGON» ليگاسىنىڭ باس مەنەدجەرى پاۆەل بەرسەنەۆكە كەلىپ, وسى جاعدايدى باسىنان اياعىنا دەيىن بايانداپ بەرەدى. جانە دە الدىن الا كەلىسىلگەن كەزدەسۋلەرگە قاتىسۋعا ءوزىنىڭ ەش قۇلقى جوق ەكەنىن دە ايتادى. سونىمەن قاتار سالماعى وزىنەن الدەقايدا اۋىر قارسىلاسىمەن كۇش سىناسۋعا ءازىر ەكەنىن دە ءمالىم ەتكەن. ال بۇل باسەكەنىڭ قالاي اياقتالعانىن ءبىز جوعارىدا باياندادىق.
جارىس اياقتالعاننان كەيىن اتالعان ليگانىڭ پرەزيدەنتى نۇراددين سادىقوۆ عالامتور ارقىلى بارشا جانكۇيەرگە رەسمي تۇردە مالىمدەمە جاساپ, جاعدايدىڭ ءمان-جايىن تاپتىشتەپ تۇرىپ تۇسىندىرەدى. ال وسىنداي ارامزا ارەكەتكە بارعان وديلحون كامولوۆقا قانداي جازا قولدانىلاتىنى الداعى ۋاقىتتا بەلگىلى بولادى.