الماتىعا جۇمىس ساپارى بارىسىندا پرەمەر-مينيستر ءوندىرىس نىساندارىنىڭ جۇمىسىمەن جانە قۇرىلىسىمەن تانىسىپ, شاعىن ونەركاسىپ پاركتەرى مەن قالاداعى يندۋستريالىق ايماق رەزيدەنتتەرىمەن كەزدەسۋ وتكىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتاپ ايتقاندا, ۇكىمەت باسشىسى جولاۋشىلار, جۇك جانە مامانداندىرىلعان تەحنيكا شىعاراتىن «Hyundai Trans Auto» جشس زاۋىتىنا باردى. كاسىپورىن 2011 جىلى «Hyundai Motor Company» كومپانياسىمەن (وڭتۇستىك كورەيا) ىنتىماقتاستىق تۋرالى مەموراندۋم اياسىندا ىسكە قوسىلدى.
بۇگىنگى تاڭدا زاۋىت رەسپۋبليكانىڭ جەكە مەنشىك كومپانيالارىنا, كوممۋنالدىق ۇيىمدارىنا جانە مەملەكەتتىك ورگاندارىنا Hyundai, Golden Dragon جانە Foton كولىك قۇرالدارىنىڭ كەڭ جەلىسىن (رەانيموبيلدەر, ءورت ءسوندىرۋ ماشينالارى, قوقىس تاسيتىن كولىكتەر, سۋ تاسيتىن كولىكتەر, ەۆاكۋاتورلار, جۇك كولىكتەرى) جەتكىزەدى. الداعى بىرنەشە جىلدا كاسىپورىن باسشىلىعى ءوندىرىستى كەڭەيتۋدى, جاڭا جۇمىس ورىندارىن اشىپ, ەكسپورتتى ۇلعايتۋدى جانە لوكاليزاتسيالاۋ ۇلەسىن ارتتىرۋدى جوسپارلاپ وتىر.
سونىمەن قاتار «استانا گرۋپپ» حولدينگىنىڭ پرەزيدەنتى نۇرلان سماعۇلوۆ پرەمەر-ءمينيستردىڭ نازارىن بىرقاتار پروبلەمالىق ماسەلەگە اۋداردى. اتاپ ايتقاندا, ءونىم ەكسپورتى, قىتايدان قازاقستانعا جۇك تاسىمالداۋ جانە وندىرۋشىلەرگە كادەگە جاراتۋ الىمى بويىنشا بەرەشەكتى تولەۋ ماسەلەلەرى قوزعالدى.ءاليحان سمايىلوۆ ۇكىمەت ەل ەكونوميكاسىن ودان ءارى ءارتاراپتاندىرۋدى قولدايتىنىن جانە بۇل زاۋىت وسى جۇمىستىڭ ءبىر مىسالى ەكەنىن اتاپ ءوتتى.
«12 جىل ىشىندە كاسىپورىن نارىقتاعى ءوز پوزيتسياسىن ەداۋىر نىعايتتى. ءبىز كومپانيانىڭ ءونىم جەلىسىنە ينۆەستيتسيا سالۋ جانە ونى كەڭەيتۋ جوسپارلارىن قۇپتايمىز. مەملەكەت باسشىسى قالا اكىمدىگىنىڭ الدىنا حالىقتىڭ ءجۇرىپ-تۇرۋىنا ىڭعايلى كولىكپەن قامتاماسىز ەتىپ, ەكولوگياعا تيگىزەتىن زارداپتاردى ازايتۋ مىندەتىن قويدى. سوندىقتان بۇل ءوندىرىس تەك قالا ءۇشىن عانا ەمەس, بۇكىل رەسپۋبليكا ءۇشىن دە زور ماڭىزعا يە», دەدى پرەمەر-مينيستر.
سونداي-اق ۇكىمەت باسشىسى كوتەرىلگەن ماسەلەلەردىڭ شەشىمىن تابۋعا جاردەمدەسەتىنىن ايتتى.
قازىرگى ۋاقىتتا وقۋ-اعارتۋ جانە دەنساۋلىق ساقتاۋ مينيسترلىكتەرىنىڭ تاپسىرىسى بويىنشا «Hyundai Trans Auto» جشس زاۋىتىندا Golden Dragon ماركاسىنىڭ مەكتەپ اۆتوبۋستارى جانە Hyundai (H-1, H350) شاعىن اۆتوبۋسى بازاسىندا جەدەل جاردەم كولىكتەرى قۇراستىرىلىپ جاتىر. اتاپ ايتقاندا, «مەكتەپ اۆتوبۋسى» پيلوتتىق جوباسى اياسىندا الماتى اكىمدىگى مەكتەپكە وقۋشىلاردى تاسىمالداۋ ءۇشىن 100 جاڭا تەحنيكا ساتىپ الۋدى جوسپارلاپ وتىر. بارلىعى 29 مەكتەپتە ءبىلىم الاتىن 7,7 مىڭ وقۋشىعا جاعداي جاساۋ كوزدەلگەن. اتالعان اۆتوبۋستار زاماناۋي قاۋىپسىزدىك قۇرالدارىمەن جابدىقتالعان. بۇگىنگى تاڭدا ءاربىر مەكتەپ بويىنشا ەگجەي-تەگجەيلى مارشرۋتتار بەلگىلەنىپ, سونىمەن قاتار بالالاردى وتىرعىزۋ جانە ءتۇسىرۋ ءۇشىن كولىكتىڭ كەلۋ ۋاقىتى كورسەتىلەتىن ارنايى ايالدامالار دايىندالىپ جاتىر.
پرەمەر-مينيستر ءبىلىم بەرۋ ساپاسىن ارتتىرۋدىڭ باستى فاكتورلارىنىڭ ءبىرى ءاربىر وقۋشىنىڭ قاجەتتىلىكتەرىنە باعدارلانعان جانە ونىڭ قاۋىپسىزدىگىن قامتاماسىز ەتەتىن جايلى مەكتەپ ورتاسى ەكەنىن اتاپ ءوتتى. سوندىقتان «مەكتەپ اۆتوبۋسى» پيلوتتىق جوباسى – وسىنداي ءىرى مەگاپوليستەگى ماسەلەنىڭ دۇرىس جانە ۋاقىتىلى شەشىمى.
الماتى اكىمىنىڭ ورىنباسارى الىشەر ابدىقادىروۆ اتاپ وتكەندەي, سوڭعى جىلدارى قالانىڭ اۆتوكولىك جاساۋ كلاستەرى جاقسى قارقىنمەن دامىپ كەلەدى: 2022 جىلى وڭدەۋ ونەركاسىبىنىڭ 70%-ى اۆتوكولىك جاساۋ ەسەبىنەن قامتاماسىز ەتىلدى (37,2 مىڭ اۆتوكولىك ءوندىرىلدى).
بۇل رەتتە وتكەن جىلدىڭ قاراشا ايىندا مەملەكەت باسشىسى قىتايلىق Changan, Chery جانە Haval برەندتەرىنىڭ جاڭا اۆتوكولىك زاۋىتىنىڭ قۇرىلىسىن ىسكە قوستى, ول 2025 جىلى پايدالانۋعا بەرىلەدى دەپ جوسپارلانىپ جاتىر. سونىمەن قاتار اتالعان كەزەڭدە اۆتوكولىك كومپونەنتتەرى مەن قۇرامداس بولىكتەرىن ءوندىرۋ بويىنشا تاعى ءتورت جوبانى ىسكە قوسۋ كوزدەلگەن. جالپى 2026 جىلعا قاراي قالادا جىلىنا 150 مىڭعا دەيىن اۆتوكولىك شىعارۋ جوسپارلانىپ وتىر, بۇل رەتتە 3 مىڭعا جۋىق ونىمدىلىگى جوعارى جۇمىس ورنى اشىلماق.
بۇدان ءارى ۇكىمەت باسشىسى «Valtherm» جشس جوعارى قىسىممەن قۇيۋ ءادىسىن قولداناتىن قازاقستانداعى العاشقى اليۋميني جانە بيمەتالل جىلۋ رادياتورلارىن شىعاراتىن زاۋىت قۇرىلىسىنىڭ بارىسىمەن تانىستى. جوباعا سالىنعان جالپى ينۆەستيتسيالار – شامامەن 15 ملرد تەڭگە.
زاۋىت ءونىمى بەرىكتىگى مەن جىلۋ بەرۋ بويىنشا قىتايدا شىعارىلىپ, قازاقستانعا اكەلىنەتىن بالامالى رادياتورلاردان 40-50%-عا اسىپ تۇسەدى دەپ كۇتىلەدى. كومپانيا 430 جاڭا جۇمىس ورنىن اشۋدى, وتاندىق قۇرىلىس كومپانيالارىنىڭ سۇرانىسىن ءىشىنارا قامتاماسىز ەتۋدى جانە كورشى ەلدەرگە تاسىمالداۋدى جولعا قويۋدى جوسپارلاپ وتىر. ءبىرىنشى كەزەڭدە كاسىپورىننىڭ وندىرىستىك قۋاتى جىلىنا 7,2 ملن رادياتور بولسا, ال تولىق قۋاتىنا شىققاننان كەيىن كورسەتكىش 15 ملن-نان اسپاق. بيىلعى شىلدەدە قۇيما ءوندىرىسىن ىسكە قوسۋ كوزدەلگەن.
ءاليحان سمايىلوۆ قالا اكىمدىگى قايتا وڭدەۋ دەڭگەيى جوعارى وسىنداي يمپورتتى الماستىراتىن وندىرىستەردى دامىتۋعا ەرەكشە نازار اۋدارۋى قاجەت ەكەنىن اتاپ ءوتتى. اتاپ ايتقاندا, اتالعان زاۋىتتى ىسكە قوسۋ قازاقستاننىڭ باسقا ەلدەردەن رادياتورلار جەتكىزۋگە تاۋەلدىلىگىن تومەندەتۋگە ەلەۋلى ۇلەس قوسادى.
بۇل رەتتە ۇكىمەت باسشىسى وسى باعىتتى قولداۋ ءۇشىن ەلدەن اليۋميني سىنىقتارىن باقىلاۋسىز شىعارۋدىڭ جولىن كەسۋ جانە سۋمەن جىلىتۋ قۇرالدارىنا مىندەتتى سەرتيفيكاتتاۋدى ەنگىزۋ جونىندەگى شارالار پىسىقتالاتىنىن ايتتى.
جالپى, پرەمەر-ءمينيستردىڭ ايتۋىنشا, الماتىنىڭ يندۋستريالىق ايماعى وتاندىق جانە شەتەلدىك ينۆەستورلار ءۇشىن تارتىمدى سانالادى. وسىعان بايلانىستى مەملەكەت ونىڭ دامۋىنا بەلسەندى تۇردە جاردەم كورسەتۋدى جالعاستىرماق. بۇگىنگى تاڭدا قالا اكىمدىگى ونىڭ اۋماعىن 194 گەكتارعا كەڭەيتۋدى كوزدەگەن. 2023 جىلدىڭ سوڭىنا دەيىن مۇندا قاجەتتى ينفراقۇرىلىمنىڭ بارلىعىن قۇرۋ جوسپارلانىپ وتىر: تەمىرجول, ينجەنەرلىك جەلىلەر جانە ت. ب. سالىنادى.
«وتكەن جىلى رەسپۋبليكا بويىنشا ءبىز 150-دەن استام يندۋستريالىق جوبانى ىسكە اسىردىق, بۇل $2 ملرد-قا يمپورتتى الماستىرۋعا قول جەتكىزۋگە مۇمكىندىك بەردى. بيىل مۇنداي جوبالاردىڭ سانىن 170-كە دەيىن ارتتىرۋ جوسپارلانىپ وتىر. بۇل $2,9 ملرد-قا يمپورتتىڭ ورنىن اۋىستىرۋعا مۇمكىندىك بەرەدى», دەدى ءاليحان سمايىلوۆ.
سونىمەن قاتار پرەمەر-مينيستر شاعىن ونەركاسىپ پاركتەرى مەن قالانىڭ يندۋستريالىق ايماعى تۇرعىندارىمەن كەزدەستى, وندا ۇكىمەت باسشىسىنا بولمەارالىق ەسىكتەر شىعاراتىن زاۋىتتىڭ جۇمىسى, زاماناۋي عىلىمي-وندىرىستىك جىلىجاي كەشەنىنىڭ قۇرىلىسى, سونداي-اق تامشىلاتىپ سۋارۋ جۇيەلەرىن قۇرۋ, كونديتەرلىك ونىمدەر مەن قاعاز قاپتامالارىن شىعارۋ جونىندەگى جوبالار تۋرالى ايتىلدى.