وتىز جىلىن ورمان ىسىنە ارناعان انا

كۇلپانۋ قۇرمانعاليەۆا - «ەرتىس ورمانى» موتر رمم شالداي فيليالى, شوشقالى ورمانشىلىعىنىڭ اۋماقتى قورعاۋ جونىندەگى ينسپەكتورى - مەملەكەتتىك ينسپەكتور. ول 1967 جىلى 2 مامىردا تۋعان. ءبىلىمى ارنايى-ورتا. كاسىبي ەڭبەك جولىن 1986 جىلى 15 اۋلادان اسپايتىن شاعىن ورمان اۋىلىنان باستاعان. ايەلدە شالداي فيليالىنىڭ شوشقالى ورمانشىلىعىنىڭ ءورت-حيميالىق ستانتسياسىنىڭ راديو وپەراتورى بولىپ ىستەگەن. كەيىن مەملەكەتتىك ينپەكتور كومەكشىسى لاۋازىمىندا جۇمىس ىستەدى. 2017 جىلى شوشقالى ورمانشىلىعىنىڭ اۋماقتى قورعاۋ ينسپەكتورى – مەملەكەتتىك ينسپەكتورى بولىپ تاعايىندالدى. بۇگىنگە دەيىن وسى لاۋازىمدا ەڭبەك ەتىپ كەلەدى.

ك.قۇرمانعاليەۆا ورمانشىلار اۋلەتىنەن شىققان. ورمان شارۋاشىلىعىنداعى جۇمىس ءوتىلى - 27 جىل. ارىپتەستەرى ونى جۇمىسقا جاۋاپتى, ساۋاتتى قىزمەتكەر رەتىندە باعالايدى.  

- ورمان شارۋاشىلىعىنا قالاي تاپ بولدىڭىز؟ 

- مەن 10 جىل جالپى ءبىلىم بەرەتىن شاعىن مەكتەپتە جۇمىس ىستەگەنمىن. كەيىن ءبىلىم ورداسى جابىلىپ قالدى. سول كەزدە مەملەكەتتىك-ينسپەكتور بولۋ تۋرالى ۇسىنىس ءتۇستى. كەلىستىم. ءسويتىپ, پاۆلودار تەحنولوگيالىق كوللەدجىنە ورمان جانە ورمان شارۋاشىلىعى ماماندىعى بويىنشا وقۋعا ءتۇستىم. سول كەزدەن بەرى شوشقالى ورمانشىلىعىندا ەڭبەك ەتىپ كەلەمىن. بۇگىندە شارۋاشىلىقتىڭ اۋماقتى قورعاۋ جونىندەگى ينسپەكتورى - مەملەكەتتىك ينسپەكتورى قىزمەتىن اتقارامىن. 

- 27 جىل بويى وسى سالادا ەڭبەك ەتىپ كەلەسىز. از ۋاقىت ەمەس. بۇگىنگە دەيىن باسقا جۇمىسقا اۋىسقىڭىز كەلگەن كەزدەر بولدى ما؟ 

- جوق. قازىرگى قىزمەتىمدى وزگەرتكىم كەلمەيدى. ءوزىمدى باسقا سالادا ەلەستەتە المايمىن.

- شارۋاشىلىقتىڭ قيىندىعى جايلى ايتىپ بەرە الاسىز با؟ 

- كوپ قوي. مىسالى, ورمان داقىلدارىن وتىرعىزۋ كەزەڭى, ارامشوپتەردى جويۋ, ورمانداعى اعاشتاردى زاڭسىز كەسەتىندەردەن قورعاۋ, ورمان القابىندا تۇتانعان ءورتتى ءوشىرۋ, تازالاۋ جۇمىستارى, بيولوگيالىق كەشەندى ءىس-شارالار (زيانكەستەرمەن كۇرەس), سونداي-اق جانۋارلار الەمىن قورعاۋ وڭاي جۇمىس دەي الماس ەدىم. 

- جۇمىس كەزىندە قىزىقتى وقيعالار بولاتىن شىعار... 

- بىلەسىز بە؟! مەن ءۇشىن ورمانداعى تىرشىلىك يەسىنىڭ قانشا جانە قانداي ءومىر سۇرەتىنىن باقىلاۋدىڭ ءوزى قىزىق. قىزىقتى وقيعالار سول ورمان داقىلدارىن تۇگەندەۋ كەزىندە بولادى. 

- ايەل مەن ورماندى نە بايلانىستىرادى؟ 

- ورمان دا ايەل سياقتى: جاينايدى, اينالاسىنا جۇپار شاشادى, جەمىس بەرەدى. 

- سىزگە قانداي جىل مەزگىلى ۇنايدى؟ 

- ماعان قىس مەزگىلى ۇنايدى. سەبەبى, قىس ايلارىندا ورمان ءورتى بولمايدى. بۇل ساناڭدى تازارتىپ, ميىڭدى تىنىقتىرۋعا قولايلى كەزەڭ. ءارى اق ۇلپاعا ورانعان دالا دا كوزدىڭ جاۋىن الادى. تازا اۋاسىن ايتساڭشى. 

بوس ۋاقىتىڭىزدا نەمەن شۇعىلداناسىز؟ 

- قولىم قالت ەتكەندە كىتاپ وقيمىن. قىستا ورماندا سەرۋەندەگەندى ۇناتامىن. ال جازدا بوس ۋاقىت بولا قويمايدى...