پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن وتكەن كەڭەستە اقتوبە, اتىراۋ جانە قىزىلوردا وبلىستارىنىڭ اكىمدەرى ورىنباسارلارىنىڭ قاتىسۋىمەن وسى وڭىرلەردەگى سۋ تاسقىنىنا قارسى جەدەل ارەكەت ەتۋ شارالارى تالقىلاندى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
كەڭەس بارىسىندا 7 ناۋرىزدا اقتوبە, اتىراۋ جانە قىزىلوردا وبلىستارىندا اۋا تەمپەراتۋراسىنىڭ كۇرت كوتەرىلىپ, قاردىڭ ەرۋىنە جانە جاۋىن-شاشىننىڭ مول تۇسۋىنە بايلانىستى وبلىستىق جانە اۋداندىق ماڭىزى بار اۆتوجولداردى قارعىن سۋ شايىپ وتكەنى تۋرالى حاباردار ەتىلدى.
اكىمدىكتەر شۇعىل تۇردە جولداردى نىعايتۋ, سۋ اعىنىن جايىلىمدىق جەرلەرگە قاراي بۇرۋ بويىنشا قاجەتتى شارالاردى قابىلدادى. بۇعان تجد قىزمەتتەرىنىڭ كۇشتەرى مەن تەحنيكاسى جۇمىلدىرىلدى.
قازىرگى ۋاقىتتا جەرگىلىكتى جەرلەردە تاۋلىك بويى كەزەكشىلىك ۇيىمداستىرىلدى. ەلدى مەكەندەردى سۋ باسۋ قاۋپى جوق.
قالعان وڭىرلەردەگى سۋ تاسقىنى احۋالىنىڭ مونيتورينگى – ۇكىمەتتىڭ باقىلاۋىندا.