استانادا قۇرىلىس سالۋشىلارعا قاۋىپسىزدىك ەرەجەلەرىن بۇزعانى ءۇشىن ايىپپۇل سالىندى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
استانادا قاۋىپسىزدىك تەحنيكاسى مەن ەڭبەكتى قورعاۋدىڭ بۇزىلۋىنا بايلانىستى 2 قۇرىلىس نىسانىندا («رايىمبەك» جانە «Ayana Plaza» كوپپاتەرلى تۇرعىن ءۇي كەشەنى) قۇرىلىس-مونتاج جۇمىسى توقتاتىلدى. «رايىمبەك» كوپپاتەرلى تۇرعىن ءۇي كەشەنى بويىنشا انىقتالعان بۇزۋشىلىقتار جويىلدى. ال «Ayana Plaza» كوپپاتەرلى تۇرعىن ءۇي كەشەنى بويىنشا ماتەريالدار سوتقا بەرىلدى. سونداي-اق وتكەن جىلدىڭ وزىندە مەملەكەتتىك ەڭبەك ينسپەكتورلارى ەڭبەك زاڭناماسىن بۇزعانى ءۇشىن 87 جۇمىس بەرۋشىنى اكىمشىلىك جاۋاپكەرشىلىككە تارتتى. ايىپپۇل سوماسى 16 ملن 700 مىڭ تەڭگەدەن استى.
قۇرىلىستاعى وندىرىستىك جاراقاتتانۋدىڭ نەگىزگى سەبەبى نىسانداردا جۇمىس ءوندىرىسىنىڭ جوعارى قارقىنى جانە قۇرىلىس سالۋشىلار تاراپىنان ەڭبەكتىڭ قورعالۋى مەن قاۋىپسىزدىك تەحنيكاسىنا قاجەت قاراجاتتىڭ جەتكىلىكسىز ءبولىنۋى بولىپ سانالادى. كوپ جاعدايدا شاعىن مەردىگەرلىك ۇيىمداردا قىزمەتكەرلەردى جازاتايىم وقيعالاردان مىندەتتى ساقتاندىرۋ شارتتارى جوق.
قولدانىستاعى زاڭناماعا سايكەس بارلىق قىزمەتكەرلەر جەكە قورعانىس قۇرالدارىمەن (قورعانىس باس كيىمى, ارنايى كيىم, مونتاجداۋ بەلدىگى), سونداي-اق ۇجىمدىق قورعاۋ قۇرالدارىمەن قامتاماسىز ەتىلۋى ءتيىس. سونىمەن قاتار, بيىك ورىندارداعى جۇمىس ورىندارىندا جانە ولارعا وتەتىن جولداردا قورعانىس قورشاۋلارى بولۋى كەرەك جانە زاتتاردىڭ بيىكتەن قۇلاپ كەتپەۋى ءۇشىن قورعانىس تورلارى بولۋى كەرەك.
قۇرىلىس نىساندارىندا ەڭبەك قاۋىپسىزدىگى جانە ەڭبەكتى قورعاۋ تالاپتارى ساقتالماعان جاعدايدا جۇمىستىڭ بارلىق ءتۇرى توقتاتىلادى, سونداي-اق اكىمشىلىك جانە قىلمىستىق جاۋاپكەرشىلىك شارالارى قولدانىلاتىن بولادى. مەملەكەتتىك ەڭبەك ينسپەكتورلارى كاسىپورىنداردىڭ ەڭبەك ۇجىمدارىمەن ەڭبەك قاۋىپسىزدىگى جانە ەڭبەكتى قورعاۋ جونىندەگى تالاپتاردى ساقتاۋ بويىنشا ءتۇسىندىرۋ جۇمىسىن جۇرگىزەدى, ۇيىم باسشىلىعىنا وندىرىستەگى جازاتايىم وقيعالاردان ساقتاندىرۋ شارتتارىن جاساسۋ جونىندەگى مىندەتتەر تۇسىندىرىلەدى.