نيۋ-دەلي: بۇرىمدىلار باسەكەسى

نيۋ-دەليدەگى دودا قارسا­ڭىندا ءبىز الەم چەمپيوناتىنىڭ تاريحىنا قىسقاشا شولۋ جاساۋدى ءجون كوردىك. اتالعان جارىستا قازاقستان قۇراماسى بارلىعى 23 جۇلدە جەڭىپ الدى. ونىڭ 5-ەۋى التىن, 5-ەۋى كۇمىس جانە 13-ءى قولا. بەس التىننىڭ ەكەۋى نا­زىم قىزايبايعا تيەسىلى. اسا جەڭىل سالماقتا ونەر كورسەتىپ جۇرگەن الماتى وبلىسى ىلە اۋدا­نى جەتىگەن اۋىلىنىڭ تۋماسى العاش رەت 2014 جىلى وڭتۇستىك كورەيانىڭ چەدجۋ قالاسىندا ۇيىمداستىرىلعان ءدۇبىرلى دو­دادا دارالاندى. فينالدا ول ۇندىستاندىق ساردجۋبالا دەۆيدەن ايلاسىن اسىردى. 2016 جىلى استانادا نازىم ءوزىڭ سول ناتيجەسىن تاعى دا قايتالادى. جارىس بارىسىندا نەبىر مىقتى سپورتشىلاردى جولىنان ىعىس­تىرعان قازاق قىزى اقتىق سىندا قىتايلىق ۆان ءيۋاندى قاپى قالدىردى. وسىلايشا, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى جۇمابەك ومىر­­زاقوۆتىڭ ءتول شاكىرتىنە الەمنىڭ ەكى دۇركىن چەمپيونى اتانۋ باقىتى بۇيىردى.

ءدال سول استانادا وتكەن جارىستا تاعى ءۇش بۇرىمدىمىز جەڭىس تۇعىرىنىڭ ەڭ بيىك ساتىسىنا كوتەرىلدى. ولار – اقمولالىق دينا جولامان (54 كيلو), اس­تانالىق ۆالەنتينا حالزوۆا (69 كيلو) جانە تۇركىستاندىق ءلاززات كۇنگەيباەۆا (+81 كيلو). ەلوردا تورىندە وتكەن جارىستىڭ فينالىندا دينا ەۋروپا چەمپيونى ستويكا پەتروۆانى ۇتتى. ارادا تۋرا بەس جىل وتكەننەن سوڭ, ءدال سول بولگاريالىق بوكسشى توكيو­دا الاۋى تۇتانعان وليمپيا ويىن­دارىنىڭ جەڭىمپازى اتاندى. ۆالەنتينا شەشۋشى تۇستا گۋ حۋندى ۇتتى. قىتاي قىزى تو­كيو وليمپياداسىندا كۇمىس مەدال­دى يەلەندى. اقتىق ايقاس­تا ءلاززات امەريكالىق شەدەي­شا گرەندى جەڭدى. مىنە, قازاقستاننىڭ بۇرىمدىلارى جەڭىپ العان بەس التىننىڭ «تاريحى» وسىنداي.

كۇمىستىڭ دە سانى بەسەۋ. ونىڭ يەگەرلەرى – مارينا ۆول­نوۆا (81 كيلو), جۇلدىز ما­ماتقۇلوۆا (+81 كيلو), ءلاززات كۇنگەيباەۆا (+81 كيلو), جاينا شەكەربەكوۆا (51 كيلو) جانە الۋا بالقىبەكوۆا (48 كيلو). ولاردىڭ بارلىعى دا ءتۇرلى چەمپيوناتتا تاماشا ونەر كورسەتىپ, تەك فينالدا عانا جەڭىلىستىڭ كەرمەك ءدامىن تاتتى. ماسەلەن, مارينا 2010 جىلى باربادوستىڭ بريدجتاۋن قالاسىندا برازيليالىق روزەلي فويتەلاعا ەسە جىبەردى. قازاقشا اعىلىپ تۇرعان سىر بويىنىڭ سۇلۋى ارادا ەكى جىل وتكەننەن سوڭ لوندون وليمپياداسىنىڭ قولا مەدالىن قورجىنعا سالدى. جۇلدىز 2012 جىلى قىتايدىڭ تسينحۋانداۋا شاھارىندا ءوزىن جاقسى قىرىنان كورسەتتى. جامبىل وبلىسىنىڭ تۋماسى جەرگىلىكتى بوكسشى لي يۋنفەيگە جول بەردى. ءلاززات 2014 جىلى وڭتۇستىك كورەيانىڭ چەدجۋ قالاسىنداعى دودانىڭ اقتىق سىنىندا زەنفيرا ما­گومەداليەۆادان جەڭىلدى. رەسەي­دىڭ تۋى استىندا ونەر كورسەتەتىن داعىستاندىق سپورتشى كەيىننەن تاعى ءبىر رەت الەم چەمپيونى, ەكى مارتە ەۋروپا چەمپيونى جانە وليمپيا ويىندارىنىڭ قولا جۇلدەگەرى دەگەن مارتەبەلى اتاق­تارعا قول جەتكىزدى. 2018 جىلى نيۋ-دەليدە شىمكەنتتىك جاينا شەكەربەكوۆا سولتۇستىك كورەيانىڭ وكىلى پان چحول ءميدى ۇتا المادى. بىلتىر تۇركيا­نىڭ ىستانب ۇلىنداعى دودادا جامبىلدىق الۋا بالقىبەكوۆا سول ەلدىڭ تۋماسى ايشا چاگي­رىردان ۇتىلدى.

ال نازگۇل بورانباەۆا (2006 جانە 2010 جىلدارى), ەلە­نا كولتسوۆا (2008 جىل), نازىم قى­زايباي (2012), جاينا شەكەر­بەكوۆا مەن ايجان قوجابەكوۆا (2016 جىل), كارينا يبراگيموۆا (2018 جىل), ميلانا سافرونوۆا مەن دينا يسلامبەكوۆا (2019), جاينا شەكەربەكوۆا, دينا جولامان, كارينا يبراگيموۆا جانە ۆالەنتينا حالزوۆا (2022 جىل) سىندى بىلعارى قولعاپ شەبەرلەرى سول باسەكەلەردى قولا مەدالمەن قورىتىندىلادى.

جالپى, ايەلدەر اراسىنداعى الەم چەمپيوناتى 2001 جىلدان بەرى ۇيىمداستىرىلىپ كەلەدى. سول كەزدەن بەرى اتالعان جارىستىڭ جالاۋى 12 مارتە جەل­بىرەدى. سونىڭ العاشقى ۇشەۋىنە قازاقستان قۇراماسى قاتىسقان جوق. قالعان توعىزىندا جەرلەستەرىمىزگە جەڭىس تۇعىرىنا كوتەرىلۋ باقىتى بۇيىردى. ءبىزدىڭ بۇرىمدىلار ەڭ ۇزدىك ناتيجەگە 2016 جىلى قول جەتكىزدى. اس­تانادا جالاۋى جەلبىرەگەن جارىستا 4 التىن جانە 2 قولانى ولجالاپ, جالپىكوماندالىق ەسەپتە جەكە-دارا كوش باستادىق. ال وزگە چەمپيوناتتارداعى كور­سەتكىشتەرىمىز مىناداي: 2006 جىل – 17 ورىن (1 قولا), 2008 جىل – 16 ورىن (1 قولا), 2010 جىل – 12 ورىن (1 كۇمىس, 1 قولا), 2012 جىل – 10 ورىن (1 كۇمىس, 1 قولا), 2014 جىل – 4 ورىن (1 التىن, 1 كۇمىس), 2018 جىل – 9 ورىن (1 كۇمىس, 1 قولا), 2019 جىل (2 قولا) جانە 2022 جىل – 8 ورىن (1 كۇمىس, 4 قولا).