ەگىس القابى ۇلعايادى

«2023 جىلى ءداندى جانە ءداندى بۇرشاقتى داقىلدار – 398,2, مايلى داقىلدار – 72,2, قانت قىزىلشاسى – 10,4, كارتوپ – 11,8, كوك­ونىس پەن باقشا داقىلدارى – 61,7, مال ازىعى 216,7 مىڭ گەكتار القاپقا ەگىلەدى دەپ جوسپارلاپ وتىرمىز. كوكتەمگە دالا جۇمىستارىنا قاجەتتى 90,2 مىڭ توننا تۇقىمنىڭ 68,9 مىڭ تونناسى دايىندالعان. ناقتىراق ايتار بولساق, قوردا قاجەتتى تۇقىمنىڭ 76,4 پايىزى بار. بۇعان قوسا قانت قىزىلشاسىنىڭ, داندىك جۇگەرى, كارتوپ, سۇرلەمدىك جۇگەرى جانە كۇنباعىس داقىلدارىنىڭ تۇقىمىن شەت مەملەكەتتەردەن, الماتى, قاراعاندى, پاۆلودار جانە جەتىسۋ وبلىستارىنان جەتكىزەمىز», دەيدى باسقارما باسشىسى.

ن.جىگىتەكوۆتىڭ ايتۋىنشا, كوكتەمگى دالا جۇ­مىستارىن ۋاقتىلى ۇيلەستىرۋ ءۇشىن شا­رۋا قوجالىقتارىن 15,5 مىڭ توننا كەپىل­دەن­دىرىلگەن ديزەل وتىنىمەن قامتۋ جوس­پارلانعان. بۇگىنگى تاڭدا قاجەتتى ديزەل وتىنى جانارماي قۇيۋ بەكەتتەرىندەگى ارنايى وپەراتورلار ارقىلى شارۋالارعا تومەن باعامەن وتكەرىلۋدە. سونداي-اق بيىل 280 مىڭ گەكتار القاپقا 54 مىڭ توننا تىڭايتقىش پايدالانىلماق.

«باسقارما تاراپىنان شارۋالارعا قاجەتتى جۇمىستار اتقارىلىپ جاتىر. شارۋاشىلىق باسشىلارى 50 پايىز قاراجاتتى ءوز ەسەبىنەن, قالعان 50 پايىز قارجىنى سۋبسيديا ەسە­بىنەن جابۋى ءۇشىن «قازازوت» جشس جانە «قازفوسفات» جشس-ى زاۋىتتارمەن مەموراندۋم جاسالعان. مەموراندۋم نەگىزىندە وبلىس شارۋاشىلىقتارىنىڭ ەگىن ناۋقانىنداعى وتاندىق تىڭايتقىشتارعا دەگەن قاجەتتىلىگى مەن سۇرانىسى قامتاماسىز ەتىلەدى», دەيدى ن.جىگىتەكوۆ.

كوكتەمگى دالا جۇمىستارىنا دايىندىق بارىسى ءوڭىر باسشىسى نۇرجان نۇرجىگىتوۆتىڭ دە نازارىنان تىس قالماق ەمەس. ونىڭ ايتۋىن­شا, ديقانداردىڭ الاڭسىز جۇمىس ىستەۋىنە بارلىق تاراپ جان-جاقتى جاعداي قاراستىرۋى قاجەت.

«شارۋا قوجالىقتارىنا وپەراتورلار تاراپىنان بولىنگەن ديزەل وتىنى اي سايىن ءتيىستى دەڭگەيدە ۇلەستىرىلىپ وتىرۋى كەرەك. ول ۇكىمەت بەلگىلەگەن جەڭىلدەتىلگەن باعا­مەن بەرىلۋگە ءتيىس. بۇل جۇمىستى تىكەلەي با­قى­لاي­مىز. قازىر مەملەكەت تاراپىنان اۋىل شارۋاشىلىعى سالاسىنا كوپ كوڭىل ءبو­لىنىپ جاتىر. بيىل قانت قىزىلشاسى ال­قابىن بىرنەشە ەسەگە ۇلعايتۋ تۋرالى شەشىم قابىلدادىق. قىسقاسى, وڭىردە ءتاتتى ءتۇبىردى ءوسىرۋدىڭ ءتيىمدى ەكەنىن ءبارىمىز ءتۇسىنىپ وتىرمىز. شارۋالاردىڭ دا جۇمىسقا بەلسەنە كىرىسكەنى كوڭىل قۋانتادى. بالتامىر كولەمىن ارتتىرۋ بويىنشا شارۋا قوجالىقتار اراسىندا ءتۇسىندىرۋ جۇمىستارىن توقتاتپايمىز. بىلتىر اۋىل شارۋاشىلىعى قۇرىلىمدارىنا 60 ملرد تەڭگەگە قولداۋ كورسەتىلگەن بولسا, بيىل ونىڭ كولەمى 100 ملرد تەڭگەگە ۇلعايىپ وتىر. سونىمەن قاتار ءبىر ەسكەرەتىن ماسەلە, ەگىس القاپتارىنا اعىن سۋ جەتكىزۋ ءۇشىن قوجالىق جەتەكشىلەرى «قازسۋشار» مەكەمەسىمەن كەلىسىمشارتقا وتىرۋى كەرەك. اتالعان مەكەمە ەگىس القابىنا سۋ جەت­كىزىپ بەرۋدى مىندەتىنە العان جاعدايدا عانا ول ال­قاپتارعا سۋارمالى داقىلداردى ورنالاس­تىرۋعا رۇقسات بەرىلەدى», دەيدى ن.نۇرجىگىتوۆ.

قىسقاسى, جامبىلدىق ديقاندار كوكتەمگى ەگىس جۇمىستارىنا تاس ءتۇيىن دايىن سەكىلدى. سالالىق باسقارما باسشىسى شارۋالاردىڭ جۇ­مىسقا قارقىندى تۇردە كىرىسۋى ءۇشىن قولدان كەلگەن كومەكتى ايامايتىنىن ايتىپ وتىر. قوجالىق باسشىلارىنا دا كەرەگى سول ەمەس پە؟

كەيىنگى جىلدارى وڭىردە قانت قىزىلشاسىن وسىرۋگە ايرىقشا باسىمدىق بەرىلگەنى راس. شارۋا قوجالىعىنىڭ باسشىلارى دا بالتامىر القابىن ۇلعايتۋعا نيەتتى. بۇل باعىتتاعى جۇ­مىستار الداعى جىلدارى دا باسىمدىققا يە بولاتىن سياقتى.

جامبىل وبلىسى