«Respublica» كوشباسشىلارىنىڭ, سونداي-اق پارتيادان دەپۋتاتتىققا كانديداتتاردىڭ قاتىسۋىمەن سايلاۋالدى تۋر جالعاسىپ جاتىر. ۇگىت-ناسيحات كەزەڭىندە پارتيا وكىلدەرى ەلىمىزدىڭ تۇكپىر-تۇكپىرىندە ءتۇرلى ساناتتاعى ازاماتتارمەن كەزدەسۋدى جوسپارلاعان. سولاردىڭ ءبىرى – ەڭبەك ۇجىمدارىمەن جۇزدەسۋ.
الماتىدا كانديداتتار 100-دەن استام ادامدى جۇمىسپەن قامتىپ وتىرعان «APR Construction» جشس قۇرىلىس كومپانياسىنىڭ جۇمىسشىلارىمەن كەزدەستى. كەزدەسۋگە پارلامەنت ءماجىلىسىنىڭ دەپۋتاتتىعىنا كانديداتتار قىرمىزى جاندوسوۆا, دينارا ناۋموۆا, ماحامبەت حاسەنوۆ, ءماسليحات دەپۋتاتتىعىنا كانديداتتار البينا ساريەۆا مەن اراي ەركىن ۇلى قاتىستى.
پارتيا وكىلدەرى ەڭبەك ەتىپ جۇرگەن جاستاردى قولداۋدىڭ ماڭىزدىلىعى, كاسىپكەرلەرگە مۇمكىندىك بەرۋ جانە ەلىمىزدەگى ءتۇرلى الەۋمەتتىك-ەكونوميكالىق ماسەلە تۋرالى ايتتى. ءوز سوزىندە ماحامبەت حاسەنوۆ ەلدەگى حالىقتىڭ ءبىرشاما قيىن جاعدايىنا نازار اۋداردى. ءبىر نەسيەنى وتەۋ ءۇشىن تۇرعىنداردىڭ ەكىنشى نەسيەنى جوعارى پايىزبەن الۋعا ءماجبۇر ەكەنى ايتىلدى.
ء«بىز – حالىقتىڭ وكىلدەرىمىز جانە قاراپايىم جانداردىڭ قانداي جاعدايدا ءومىر ءسۇرىپ جاتقانىن جاقسى بىلەمىز. سوندىقتان نەسيەلىك ساياساتتى وزگەرتۋ كەرەك دەپ ەسەپتەيمىز. جەكە تۇلعالارعا بەرىلەتىن نەسيەنىڭ وتەلۋ مەرزىمىن كەم دەگەندە 20 جىلعا دەيىن ۇزارتىپ, پايىزدىق مولشەرلەمەنى تومەندەتۋ كەرەك», دەدى م.حاسەنوۆ.
ال دينارا ناۋموۆا دارىندى ازاماتتاردىڭ كوپ نارسەنى, ونىڭ ىشىندە ساياساتتى دا وزگەرتە الاتىنىنا توقتالدى.
– مەن «Respublica» پارتياسىنىڭ ەڭ جاس كانديداتى شىعارمىن. ءبىز ساياساتقا نە ءۇشىن بارا جاتىرمىز؟ ءبىزدىڭ ارقايسىمىزدىڭ ارتىمىزدا بەلگىلى ءبىر جەتىستىكتەر تاريحى بار. وبلىستاعى ەرەكشە بالالارعا كومەكتەسەتىن تەگىن ينكليۋزيۆتى ورتالىق اشۋعا مۇرىندىق بولدىق. «Respublica» پارتياسى قولىمنان نە كەلەتىنىن دالەلدەۋگە تاعى ءبىر مۇمكىندىك بەردى. وسى ارقىلى مەن قوعامعا ءوز ۇلەسىمدى قوسا الامىن, قازىرگى ءتارتىپتى وزگەرتە الامىن. قازىر جاستاردا بارلىق مۇمكىندىك بار. ءبىز سولاردى پايدالانىپ, قوعامدى وزگەرتۋىمىز كەرەك, – دەدى دينارا ناۋموۆا ءوز سوزىندە.
ءوز كەزەگىندە قىرمىزى جاندوسوۆا كەز كەلگەن ماسەلەنى اشىق ايتا الاتىن ارنايى الاڭ قۇرۋدى جوسپارلاپ وتىرعانىن ايتتى.