تۇركىستان وبلىسىندا 30 كەلىدەن استام ەسىرتكىنى رەسەيگە تاسىمالداماق بولعان شەتەلدىك جاۋاپكەرشىلىككە تارتىلدى. بۇل تۋرالى وبلىستىق سوتتىڭ ءباسپاسوز قىزمەتى حابارلادى, دەپ جازادى Egemen.kz.
ۆەدومستۆونىڭ مالىمەتىنشە, سوتتالۋشى ءوزىنىڭ «Ford Mondeo» اۆتوكولىگىمەن تاجىكستاننان قازاقستان شەكاراسى ارقىلى رەسەيگە اسا ءىرى كولەمدە ەسىرتكى زاتىن الىپ وتپەك بولعان. ەر ادام «جىبەك جولى» باقىلاۋ-وتكىزۋ بەكەتىندە ۇستالدى. اۆتوكولىكتى تەكسەرۋ بارىسىندا شەكارالىق باقىلاۋ كينولوگى مەن بەلكا ەسىمدى قىزمەتتىك يت جانار-جاعارماي تسيستەرناسىنان جالپى سالماعى 31 كەلى 465,2 گرامم گەروين تاپتى.
«تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قر قك-ءنىڭ 24-بابىنىڭ 3-بولىگى, 286-بابىنىڭ 4-بولىگى, 297-بابىنىڭ 3-بولىگىمەن كوزدەلگەن قىلمىستى جاسادى دەپ ايىپتالعان ش. ەسىمدى ازاماتقا قاتىستى قىلمىستىق ءىستى قارادى. سوتتالۋشى ش. 2022 جىلعى 22 شىلدەدە ساعات 18:00-دە ءوزىنىڭ اۆتوكولىگىمەن وزبەكستان رەسپۋبليكاسىنىڭ «گيشت-كوپريك» مەملەكەتتىك شەكارا باقىلاۋ بەكەتى شەكاراسىنان ءوتىپ, «جىبەك جولى» باقىلاۋ-وتكىزۋ پۋنكتىندە توقتاعان. ش.-نىڭ قىلمىستىق ارەكەتتەرى ءىس ماتەريالدارىمەن دالەلدەندى», دەپ حابارلادى وبلىستىق سوتتىڭ ءباسپاسوز قىزمەتى.
قاداعالاۋ ورگانىنىڭ مالىمەتىنشە پروكۋرور سوتتالۋشىعا 18 جىلعا باس بوستاندىعىنان ايىرۋدى سۇراعان. شەتەلدىك ازامات سوتتا ءوز كىناسىن جارتىلاي مويىنداپ, جەڭىل جازا تاعايىنداۋدى سۇرادى.
«جاسالعان ءىس-ارەكەتتەردىڭ قوعامدىق قاۋىپتىلىگىن ەسكەرە وتىرىپ, سوتتالۋشى ش. 15 جىلعا باس بوستاندىعىنان ايىرىلدى., ول ءوز جازاسىن قك كۇشەيتىلگەن مەكەمەلەردە وتەيدى. سوت ۇكىمىمەن سوتتالۋشى جوعارىدا اتالعان قىلمىستىق قۇقىق بۇزۋشىلىقتاردى جاساعانى ءۇشىن كىنالى دەپ تانىلدى. ۇكىم زاڭدى كۇشىنە ەنگەن جوق», دەپ تولىقتىردى ۆەدومستۆودان.