سەرگەك ساقشىنىڭ جۇمىسى دا تياناقتى

پوليتسيا باسقارماسى – وبلىستاعى ەڭ ءىرى ىشكى ىستەر ءبولىنىسى. سول سەبەپتى قۇقىق بۇزۋشىلىق, قىلمىس بويىنشا دا كوپ وقيعا وسى اۋماقتا تىركەلەدى. وبلىس ورتالىعىندا جول اپاتى جانە قوعامدىق قۇقىق بۇزۋشىلىقتىڭ سانى دا جوعارى. رەسەيمەن ەكى ورتاداعى شەكارادا ورنالاسۋى دا قالاداعى قىلمىس سانىنىڭ وسۋىنە وزىندىك ىقپال ەتەدى. ويتكەنى كورشى ەلدە قىلمىس جاساپ, پەتروپاۆلدا بوي تاسالايتىندار نەمەسە كەرىسىنشە قالادا زاڭسىزدىققا بارىپ, شەكارا اسىپ كەتەتىندەر كوپ. وتكەن جىلى اشىلماي قالعان 60 قىلمىستىڭ اق-قاراسى انىقتالىپ, 41 قىلمىسكەر ۇستالىپتى. حابار-وشارسىز كەتكەن 16 ازاماتتىڭ جۇرگەن جەرى انىقتالعان. جىل بويى 199 جول-كولىك وقيعاسى تىركەلىپ, سونىڭ سالدارىنان 5 ادام قازا تاۋىپ, 244 جولاۋشى ءتۇرلى دارەجەدەگى جاراقات العان.

پەتروپاۆلدا ەلىمىزدىڭ باسقا قالا­لا­رىمەن سالىستىرعاندا الكوگول­دىك ىشىمدىك ءىشىپ, قوعامدىق ورىنداردا ماس كۇيىندە جۇرەتىندەر سانى كوپ كەز­دە­سەدى. تەك بىلتىر عانا سونداي 5200-دەن استام ادام قۇقىق بۇزۋشى رە­تىندە جاۋاپكەرشىلىككە تارتىلعان. سونداي-اق قۇرامىندا ءسپيرتى بار 17 مىڭ ليتردەن استام الكوگول زاڭسىز اي­نالىمنان الىندى.

الىبەك عابدۋللين جەكە قۇرام قىلمىس پەن قۇقىق بۇزۋشىلىقتاردىڭ الدىن الۋ بويىنشا دا بارلىق قاجەتتى شارالاردى قابىلداپ جاتقانىن اتاپ ءوتتى. «بىراق ەلەكتروندىق تولەمدەر جانە ونلاين-دۇكەندەر ارقىلى, جال­پى اقپاراتتىق تەحنولوگيالاردى پاي­دا­لانا وتىرىپ جاسالاتىن الاياقتىق تۇرلەرىن تولىق اشكەرەلەۋگە شامامىز كەلمەي وتىر. ءبىر جىل ىشىندە 818 الاياق­تىق دەرەگى تىركەلدى. ونىڭ ىشىندە 657 فاكتى ينتەرنەت ارقىلى جاسالعان», دەدى ول.

ال پروفيلاكتيكالىق جۇمىستار كۇن سايىن بارلىق جەكە قۇرامنىڭ قاتىسۋىمەن جۇرگىزىلەدى. وسىنداي جۇمىستىڭ ناتيجەسىندە وتكەن جىلى 600-دەن استام ازامات ينتەرنەت الاياق­تار­مەن سويلەسۋدەن باس تارتىپ, قىل­مىس­تىڭ الدىن العان. كەزدەسۋگە كەلگەندەر وتباسىلىق جانجالقويلارعا قاتىستى قابىلداناتىن شارالار, جولاۋشىلار تاسىمالىن ۇيىمداستىرۋ, ىشكى ىستەر ورگاندارىنا جۇمىسقا ورنالاسۋعا قاتىستى ماسەلەلەردى ورتاعا سالدى. سولاردىڭ ىشىندە پوليتسيانىڭ قۇزىرەتىنە كىرەتىن بارلىق سۇراققا جاۋاپ بەرىلدى.

پەتروپاۆل