«ارىستانمىن, ايباتىما كىم شىدار؟» دەگەن ولەڭىندە ماعجان ءولىم تۋرالى «مەن ولمەيمىن, مەنىكى دە ولمەيدى...» دەپ ايتقان عوي. «مەن» مەن «مەنىكى» تۋرالى ۇلى اباي «كوك تۇمان – الدىنداعى كەلەر زامان» ولەڭىندە:
«اقىل مەن جان مەن ءوزىم, ءتان مەنىكى,
«مەنى» مەن «مەنىكىنىڭ» ماعىناسى ەكى.
«مەن» ولمەككە تاعدىر جوق اۋەل باستان,
«مەنىكى» ولسە ءولسىن, وعان بەكى»,
دەسە ماعجان «مەنىكىنىڭ» دە ولمەيتىنىن ايتقان ەكەن. شىنىندا اباي, ماعجان سياقتى اقىنداردىڭ تۋعان حالقى باردا «مەنىكىسى» ولەر مە؟ عاجاپ سوزدەرى, عاسىرلارعا جەتەتىن دانالىعى ۇمىتىلار ما؟ كەرىسىنشە ولار جاڭا ويمەن, جاڭا سەزىممەن, جاڭا تانىممەن جاڭعىرىپ, جەتىلە بەرمەي مە؟ وسى ءسوزدىڭ راستىعىن كەشە ماعجاننىڭ 130 جىلدىعىنا ارنالعان قىزىلجارداعى رەسپۋبليكالىق جازبا اقىندار ءمۇشايراسى دالەلدەپ بەردى. «مەن ولمەيمىن, مەنىكى دە ولمەيدى» اتتى بۇل مۇشايراعا ەلىمىزدىڭ تۇكپىر-تۇكپىرىنەن 20 مەن 50 جاس ارالىعىنداعى 90 ادام قاتىستى. ولاردىڭ ىشىنەن 9-ى ىرىكتەلىپ, ماعجان جۇماباەۆ اتىنداعى تۇڭعىش ادەبي سىيلىقتىڭ لاۋرەاتتارى اتانىپ, 300 مىڭ تەڭگەدەن سىيلىق الدى. ماعجان ءۇنىن بۇگىنگە جالعاستىرۋشىلار قاتارىندا استانا قالاسىنان تاناكوز تولقىنقىزى, باۋىرجان قاراعىز ۇلى, الماتى قالاسىنان باعدات مۇباراك, اباي وبلىسىنان مەرەي قارت, اقمولا وبلىسىنان قۋانىش وسپانوۆ, قوستاناي وبلىسىنان ابىلاي ماۋدانوۆ, شىمكەنتتەن ارايلىم مۇراتاليەۆا, قىزىلجار وڭىرىنەن امانجول زاعىپار مەن نۇرگۇل وقاشەۆا جەڭىمپاز دەپ تانىلدى. 90 ادامنىڭ اراسىنان 9 اقىندى تاڭداپ الۋ قازاقستان جازۋشىلار وداعىنىڭ ۇلىقبەك ەسداۋلەت, وسى ۇيىمنىڭ ارقاداعى التى وبلىسىنىڭ كۋراتورى داۋلەتكەرەي كاپ ۇلى جانە ادىلقازىلار القاسىنىڭ ءۇشىنشى مۇشەسى بولعان وسى جولداردىڭ اۆتورىنا وڭاي بولعان جوق.
«وت بولىپ تۋعان جاسىن ەدىڭ عوي!
ومىرگە شەكسىز عاشىق ەدىڭ عوي!
ادامزات تۇگىل زامماننان وزعان
وشپەيتىن التىن عاسىر ەدىڭ عوي.
ار مەنەن ۇيات – قازىعىڭ بولدى!
ماحاببات – جالعىز ازىعىڭ بولدى.
قازاقتى ءسۇيدىڭ, ايىبىڭ – وسى!
سول سەنىڭ جالعىز جازىعىڭ بولدى!»
(تاناكوز تولقىنقىزى)
دەگەن سياقتى سونى پىكىرلى جولداردى ءاربىر اقىننىڭ ولەڭدەرىنەن تابۋعا بولاتىن.
ءىس-شارا اياسىندا جۇلدەلى بولعان اقىندارمەن م.قوزىباەۆ اتىنداعى سقۋ-دا, م.جۇماباەۆ اتىنداعى گۋمانيتارلىق كوللەدجدە, اباي اتىنداعى مامانداندىرىلعان قازاق مەكتەپ-گيمنازياسىندا جانە نازارباەۆ زياتكەرلىك مەكتەبىندە شىعارماشىلىق كەزدەسۋلەر ۇيىمداستىرىلدى.
پەتروپاۆل