كۇندەلىكتى ومىردە كۇرمەۋى كوپ كۇردەلى ماسەلەگە تاپ بولاتىندار از ەمەس. قانداي دا ءبىر قۇقىقتىق كەدەرگى تۋىنداي قالسا ادۆوكات كومەگىنە جۇگىنۋ ءتاۋىر قارجىنى تالاپ ەتەدى. مەملەكەتتىك قولداۋ اياسىندا ازاماتتاردىڭ كەيبىر ساناتىنا زاڭگەر كومەگى تەگىن كورسەتىلەتىنىن كوپشىلىك بىلە بەرمەۋى مۇمكىن.
ماسەلەن, وتكەن جىلى 14 500 الماتىلىق بىلىكتى مامانداردىڭ مەملەكەت كەپىلدىك بەرگەن اقىسىز كومەگىنە جۇگىنگەن. مۇنداي قولداۋعا يە بولۋعا كىمدەر قۇقىلى؟ بۇل تۋرالى الماتى قالالىق ادىلەت دەپارتامەنتى باسشىسىنىڭ ورىنباسارى بەرىكبول سامەنوۆ ايتتى.
– كونستيتۋتسيا مەن زاڭدارعا سايكەس ازاماتتاردىڭ اكiمشiلiك جانە قىلمىستىق سوت iسiن جۇرگiزۋ كەزiندە ساپالى زاڭ كومەگiن الۋعا قۇقىعى بار. وعان بيۋدجەت ەسەبىنەن مەملەكەت كەپىلدىك بەرگەن. مەملەكەت كەپىلدىك بەرگەن زاڭ كومەگى قۇقىقتىق كەڭەس بەرۋ, سوتتار مەن قىلمىستىق قۋدالاۋ ورگاندارىندا جەكە تۇلعالاردىڭ مۇددەلەرىن قورعاۋ جانە ءبىلدىرۋ نىساندارى بويىنشا كورسەتىلەدى. ازاماتتار ادۆوكاتتار مەن نوتاريۋستاردىڭ, سونداي-اق جەكە سوت ورىنداۋشىلاردىڭ كومەگىن – اليمەنت, زەينەتاقى مەن جاردەماقى ءوندىرىپ الۋ, وڭالتۋ, بوسقىن نەمەسە كانداس مارتەبەسىن الۋ, اتا-اناسىنىڭ قامقورلىعىنسىز قالعان كامەلەتكە تولماعاندار, جىنىستىق زورلىق-زومبىلىق قۇرباندارى, ادام ساۋداسىنا, ەڭبەكپەن بايلانىستى دەنساۋلىعىنا كەلتىرىلگەن زياننىڭ نەمەسە قىلمىستىق قۇقىق بۇزۋشىلىقتىڭ سالدارىنان كەلتىرىلگەن شىعىندى وتەۋ ماسەلەلەرى بويىنشا تەگىن الا الادى. ءتيىستى قولداۋ ەكىنشى دۇنيەجۇزىلىك سوعىسقا قاتىسۋشىلارعا, سونداي-اق سوعىسقا قاتىسۋشىلارعا تەڭەستىرىلگەن ادامدارعا, باسقا مەملەكەتتەر اۋماعىنداعى سوعىس قيمىلدارىنا قاتىسۋشىلارعا, اسكەري قىزمەتشىلەرگە, ءبىرىنشى جانە ەكىنشى توپتاعى مۇگەدەكتەرگە, زەينەت جاسىنداعى ازاماتتارعا, كاسiپكەرلiك قىزمەتپەن بايلانىستى ەمەس ماسەلەلەر بويىنشا كوپبالالى وتباسىلارعا, از قامتىلعان تۇلعالارعا دا كورسەتىلەدى, – دەيدى بەرىكبول سامەنوۆ.
ادىلەت ورگانىنىڭ وكىلى اتاپ وتكەندەي, ادۆوكات, نوتاريۋس, جەكە سوت ورىنداۋشىلار قىزمەتىن جوعارىداعى ساناتقا كىرەتىن ءاربىر ازامات تۇرعىلىقتى جەرى مەن ورنالاسقان جەرىنە قاراماستان ەل اۋماعىندا پايدالانۋعا قۇقىلى. ءار ايماقتا ازاماتتاردىڭ مۇڭ-مۇقتاجىنا جاۋاپ بەرەتىن ارناۋلى ورتالىقتار بار. ايتالىق الماتىلىقتار قۇقىقتىق كەڭەس الۋ ءۇشىن قالالىق ادۆوكاتتار القاسىنا كەلۋى قاجەت. قازىرگى ۋاقىتتا قالادا 15 زاڭ كونسۋلتاتسياسى جۇمىس ىستەپ تۇر. ولاردىڭ مەكەنجايىمەن الماتى قالاسى ادىلەت دەپارتامەنتىنىڭ رەسمي سايتى ارقىلى نەمەسە 119 جانە 1414 قۇقىقتىق-اقپاراتتىق قىزمەت نومىرىنە قوڭىراۋ شالۋ ارقىلى بىلۋگە بولادى. سونىمەن قاتار اتالعان قىزمەت بۇكىل ەل اۋماعى بويىنشا تەلەفون بايلانىسى ارقىلى دا جۇزەگە اسادى.
مەملەكەت كەپىلدىك بەرگەن زاڭ كومەگىن كورسەتۋ جۇيەسىنە قاتىساتىن ادۆوكاتتاردىڭ ءتىزىمى جىل سايىن مەرزىمدى باسىلىمداردا جاريالانىپ وتىرادى. الماتىدا بۇل ىسكە 336 ادۆوكات جۇمىلدىرىلعان. شاھاردا حالىققا كەپىلدەندىرىلگەن مەملەكەتتىك زاڭ كومەگىن كورسەتۋ ءۇشىن بيىل 250 ملن تەڭگەدەن استام قارجى بولىنگەن. «ادۆوكاتتار كورسەتكەن قىزمەتى اكىمشىلىك جانە ازاماتتىق سيپاتتا بولسا جۇمىسىنىڭ ءبىر ساعاتى ءۇشىن 0,56 اەك كولەمىندە, اۋىر قىلمىستىق ىسكە ارالاسسا 0,76 اەك دارەجەسىندە مەملەكەتتەن اقى الادى», دەيدى ماماندار.
الماتى