پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ وتكەن جىلعى جۇمىسى قورىتىندىلانعان جيىنى ءوتتى. وندا استانا, الماتى, شىمكەنت قالالارى مەن وبلىس اكىمدەرىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى وڭىرلىك كوميسسيالاردىڭ قىزمەتىنە جاسالعان مونيتورينگ ناتيجەلەرى جاريالاندى.
وتىرىس بارىسىندا ۇلتتىق كوميسسيا توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا وتكەن جىلدىڭ ۇلتتىق كوميسسيا ءۇشىن ساپالى وزگەرىستەر, جۇمىستىڭ ترانسفورماتسيالانۋىمەن ەرەكشەلەنگەنىن اتاپ ءوتتى.
– كوميسسيا قۇرامى جاڭارتىلدى. ءبىز ۇلتتىق كوميسسيانىڭ جاۋاپكەرشىلىك ايماعىنا كىرەتىن ماسەلەلەردى شەشۋ ءۇشىن شوعىرلاندىرۋدى جانە ازاماتتىق قوعامدى تەرەڭىرەك تارتۋدى ماقسات ەتتىك. بارلىق باعىت بويىنشا جۇمىس بيىل دا كۇشەيتىلەدى. وڭىرلەرگە ەرەكشە نازار اۋدارىلادى. وسى تۇرعىدا بىرقاتار الەۋمەتتىك ماڭىزى بار جوبا «سامۇرىق-قازىنا» اق-مەن بىرلەسىپ ىسكە اسىرىلادى, – دەپ اتاپ ءوتتى ا.بالاەۆا.
ۇلتتىق كوميسسيا توراعاسىنىڭ ورىنباسارى ءلاززات سۇلەيمەن 2022 جىلدىڭ نەگىزگى قورىتىندىلارى تۋرالى ءسوز سويلەدى. ۇلتتىق كوميسسيانى جاڭعىرتۋ قىزمەتى بارلىق باعىت بويىنشا سەرپىن بەرگەن. اتاپ ايتقاندا, الەۋمەتتىك-دەموگرافيالىق دامۋ, ايەلدەردىڭ ەكونوميكالىق جانە ساياسي مۇمكىندىكتەرىن كەڭەيتۋ, بالالاردىڭ قاۋىپسىزدىگىن, قۇقىقتارى مەن زاڭدى مۇددەلەرىن قامتاماسىز ەتۋ, گەندەرلىك ساياسات جانە حالىقارالىق ىنتىماقتاستىق.
ۇلتتىق كوميسسيانىڭ ساراپتامالىق-تالداۋ فۋنكتسيالارىنىڭ بلوگى كۇشەيتىلدى. پروبلەمالاردى كەشەندى تالداۋ, وڭىرلىك ەرەكشەلىكتەردى باعالاۋ جانە وتىرىستارعا شەشىمدەر ازىرلەۋ ءۇشىن كوميسسيا مۇشەلەرىنىڭ وڭىرلەرگە ساراپشىلارمەن بىرلەسىپ شىعۋ تاجىريبەسى ەنگىزىلدى. ءبىر جىل ىشىندە كوميسسيا ۇيلەستىرەتىن قۇرىلىمدار نىعايتىلدى. اتاپ ايتقاندا, وڭىرلەردە بالالار قۇقىقتارى جونىندەگى ۋاكىلدەردىڭ لاۋازىمدارى ەنگىزىلدى, وتباسىن قولداۋ ورتالىقتارى اشىلدى.
پرەزيدەنتتىڭ مەملەكەت قاتىساتىن كومپانيالارداعى باسشىلىق لاۋازىمدارىنداعى ايەلدەر ۇلەسىنىڭ 30% بولۋى تۋرالى تاپسىرماسى شەڭبەرىندە نورماتيۆتىك-قۇقىقتىق اكتىلەرگە وزگەرىستەر ەنگىزىلدى. وتباسىلىق-گەندەرلىك ماسەلەلەرمەن اينالىساتىن 500-گە جۋىق ۇەۇ-نى قامتيتىن سەرىكتەستىك جەلىمەن سىندارلى ديالوگ ورناتىلدى. تسيفرلاندىرۋ سالاسىندا دا ايەلدەردىڭ مۇمكىندىكتەرىن دامىتۋ ماسەلەلەرى قامتاماسىز ەتىلدى. «Technowomen» قاۋىمداستىعىمەن جانە «BTS Education» كومپانيياسىمەن بىرلەسىپ ەلەكتروندىق كوممەرتسيا مەكتەبى اشىلدى جانە حالىقارالىق جانە قازاقستاندىق ەلەكتروندىق الاڭداردا ساتۋدى وقىتۋ بويىنشا 1 400 قازاقستاندىق قولونەرشىگە ارنالعان تەگىن كۋرستار وتكىزىلدى.
انا مەن بالا ءولىمى, كامەلەتكە تولماعاندار اراسىنداعى سۋيتسيد بويىنشا قابىلدانىپ جاتقان الدىن الۋ شارالارىنىڭ ناتيجەسىندە, وسى سالالارداعى جاعدايدى تۇراقتاندىرۋعا قول جەتكىزىلدى. 2022 جىلدىڭ قورىتىندىسى بويىنشا انا ءولىمى كورسەتكىشىنىڭ 2,6 ەسەگە, ءسابي ءولىمىنىڭ 3%-عا تومەندەۋى بايقالادى. كامەلەتكە تولماعاندار اراسىنداعى سۋيتسيد سانى 2022 جىلى – 11, سۋيتسيدكە ارەكەت ەتۋ 17 پايىزعا ازايدى. حالىقارالىق ۇيىمدارمەن, ەڭ الدىمەن, بۇۇ, ەۋروپا جانە ورتالىق ازيا ەلدەرىنىڭ قۇرىلىمدارىمەن جەمىستى ءوزارا ءىس-قيمىل جاسالدى.
سونداي-اق جيىندا وڭىرلىك كوميسسيالاردىڭ قىزمەتىنە مونيتورينگ جۇرگىزۋ ناتيجەلەرى بويىنشا ۇلتتىق كوميسسيا توراعاسىنىڭ ورىنباسارى ەلەنا تاراسەنكو ءسوز سويلەدى. ال ۇلتتىق كوميسسيا توراعاسى ايدا بالاەۆا: «جاڭعىرتۋ ناتيجەسىندە وڭىرلىك كوميسسيالاردىڭ قۇرامىنداعى ازاماتتىق قوعام وكىلدىگى 40-تان 60 پايىزعا دەيىن جاڭارتىلدى. بۇل حالىقتىڭ ماقساتتى توپتارىمەن جۇمىس ىستەيتىن قوعامدىق پىكىر كوشباسشىلارى, بيزنەس-قاۋىمداستىقتاردىڭ وكىلدەرى», دەپ اتاپ ءوتتى.
مۇنان كەيىن ۇلتتىق كوميسسيا باسشىسى اقپارات جانە قوعامدىق دامۋ مينيسترلىگىنە, اكىمدىكتەرگە تاپسىرما بەرە وتىرىپ: «مەملەكەتتىك الەۋمەتتىك تاپسىرىس ارقىلى وتباسىلىق جانە گەندەرلىك ساياسات جوبالارىنا قاراجاتتى دۇرىس ءبولۋ بويىنشا ماقساتتى جۇمىستى قامتاماسىز ەتۋ قاجەت. بالالاردىڭ قاۋىپسىزدىگىنە, تۇرمىستىق زورلىق-زومبىلىقتىڭ الدىن الۋعا, اۋىل ايەلدەرىنىڭ ەكونوميكالىق مۇمكىندىكتەرىن كەڭەيتۋگە قاتىستى ماسەلەلەردى شەشۋ بويىنشا جوبالاردى قولداۋ قاجەت. قاراجاتتى ءتيىمدى جۇمساۋ ماسەلەسى ۇنەمى باقىلاۋدا بولۋى كەرەك», دەپ اتاپ ءوتتى.
ۇلتتىق كوميسسيانىڭ وتىرىسىنا ساراپشىلار قوعامداستىعىنىڭ وكىلدەرى, وڭىرلەر اكىمدەرىنىڭ ورىنباسارلارى, ورتالىق مەملەكەتتىك ورگانداردىڭ باسشىلارى قاتىستى. وتىرىس سوڭىندا ۇلتتىق كوميسسيا توراعاسى ا.بالاەۆا مەملەكەتتىك ورگاندارعا بىرقاتار تاپسىرما بەردى.