اقتوبە وبلىسىنا جۇمىس ساپارىمەن بارعان تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين قوبدا اۋدانىنىڭ تالدىساي اۋىلىندا بولىپ, بايلانىس پەن ينتەرنەتتىڭ ساپاسىن تەكسەردى. سونداي-اق وسى باعىتتا جۇرگىزىلىپ جاتقان جۇمىستارمەن تانىستى.
بۇدان بولەك مينيستر تالدىساي اۋىلىنداعى شاعىن جيناقتالعان مەكتەپتە بولىپ, مۇندا جۇزەگە اسىرىلىپ جاتقان Bilim-all بىرەگەي جوباسىمەن تانىستى. جوبانىڭ ءمانى – شاعىن جيناقتى مەكتەپتەردە ءبىلىم بەرۋ ساپاسىن ارتتىرۋ. ماسەلەن, بۇرىن وسى مەكتەپتە ءبىر مۇعالىم 5 پاننەن ساباق بەرگەن كەزدەر دە بولىپتى. بۇل ءبىلىم ساپاسىنا تىكەلەي اسەرىن تيگىزەتىنى ايتپاسا دا تۇسىنىكتى. ەندى اتالعان جوبانىڭ ناتيجەسىندە وقۋشىلار ارنايى تاڭدالعان پاندەردەن كەيبىر ساباقتارعا ونلاين رەجىمدە قاتىسا الادى. بۇل اۋىل مۇعالىمدەرى جۇمىسسىز قالادى دەگەن ءسوز ەمەس. ولار ءوز پاندەرىن وقىتۋدى جالعاستىرا بەرەدى. سونىمەن قاتار جوبانى جۇزەگە اسىرۋعا كومەكتەسىپ, تالىمگەر قىزمەتىن اتقارادى.
– بۇل وتە ماڭىزدى ءارى ەرەكشە جوبا. ءبىز ونى ماسشتابتاۋ ءۇشىن جوعارى ساپالى ينتەرنەت قاجەت ەكەنىن ءتۇسىنىپ وتىرمىز جانە بۇل ماسەلەنى مۇمكىندىگىنشە تەزىرەك شەشۋگە بار كۇشىمىزدى سالامىز. بۇگىندە ينتەرنەت سۋ, جارىق, گاز سياقتى قاجەتتىلىكتەردىڭ قاتارىنا قوسىلدى. اقتوبە وبلىسىنىڭ بيلىگىمەن بىرلەسە وتىرىپ, ءار اۋىلعا ينتەرنەت تاراتۋ جولىن قاراستىرىپ جاتىرمىز, – دەيدى باعدات مۋسين.
ساپار بارىسىندا تسيفرلىق دامۋ مينيسترىنە اۋىلداعى فەلدشەرلىك-اكۋشەرلىك پۋنكتتەردى جاڭعىرتۋ جوباسى كورسەتىلدى. جاقىندا اۋىل فەلدشەرلەرىنە ونلاين دياگنوستيكا ءۇشىن يننوۆاتسيالىق مەديتسينالىق قۇرال-جابدىقتارمەن جابدىقتالعان ارنايى ريۋكزاكتار بەرىلگەن. بارلىق دەرەك تىكەلەي وبلىس ورتالىعىنا بەرىلىپ, بىلىكتى مامانداندىرىلعان دارىگەرلەر ناۋقاستىڭ جاعدايىن ونلاين كورىپ, ودان ءارى ەمدەۋ تاسىلدەرى تۋرالى شەشىم قابىلداۋعا مۇمكىندىك الدى.
بيىل اقتوبە وبلىسىندا 60 ەلدى مەكەندى ينتەرنەت جەلىسىنە قوسۋ جوسپارلانىپ وتىر. بۇل وڭىردە 315 اۋىلدىق ەلدى مەكەننىڭ 213-ءى كەڭ جولاقتى بايلانىسپەن قامتاماسىز ەتىلگەن.
– وسى جىلدىڭ نەگىزگى باعىتى – وڭىرلەردى تەحنولوگيالىق تۇرعىدان دامىتۋ. وتكەن جىلدىڭ سوڭىندا مينيسترلىك Samsung كومپانياسىمەن بىرلەسىپ Samsung Innovation Campus باعدارلامالاۋ مەكتەبىن اشتى جانە ودان ءارى IT-سالادا ادامي كاپيتالدى دامىتۋ بويىنشا جۇمىستى جالعاستىرۋدا. بيىل Astana Hub-پەن بىرلەسىپ جەرگىلىكتى IT-حابتى اشۋدى جانە اقتوبە وبلىسىنىڭ تۇرعىندارى ءۇشىن TechOrda باعدارلاماسى اياسىندا IT-سالاسىندا تەگىن ءبىلىم الۋعا مۇمكىندىك بەرەتىن جاڭا باعدارلامالاۋ مەكتەپتەرىن اشۋ بويىنشا جۇمىستار جوسپارلانعان, – دەيدى مينيستر.