بىرنەشە دۇركىن وليمپيادا چەمپيونى, قازاقستاننىڭ جەڭىل اتلەتى ولگا رىپاكوۆا كاسىبي مانسابىن اياقتايتىنىن مالىمدەدى, دەپ حابارلايدى Egemen.kz جەڭىل اتلەتيكا فەدەراتسياسىنىڭ ءباسپاسوز قىزمەتىنە سىلتەمە جاساپ.
ول بۇل تۋرالى جەڭىل اتلەتيكادان جابىق جايداعى ح ازيا چەمپيوناتىندا حابارلادى.
«مەن ءوز ەلىمە العىس ايتامىن! پرەزيدەنت پەن سپورت جەتەكشىلەرىنەن باستاپ, ەڭ جاس جانكۇيەرىمە دەيىن, ماعان دەگەن سەنىم ءۇشىن العىسىمدى بىلدىرەمىن. مەنى تۇلعا رەتىندە تانىتۋعا مۇمكىندىك بەرگەن تاعدىرعا جانە قۇدايعا العىس ايتامىن», دەدى كاسىبي سپورتشى.
وتاندىق سپورتتى دامىتۋعا قوسقان زور ۇلەسى ءۇشىن پرەمەر-مينيستر ءاليحان سمايىلوۆ رىپاكوۆاعا العىس حات جولدادى.
ء«سىزدىڭ جارقىن جەڭىستەرىڭىز قازاقستاندىق جانكۇيەرلەردىڭ جۇرەگىندە ماڭگى ساقتالادى. ءبىز ءسىزدىڭ سپورتقا دەگەن ادالدىعىڭىزدى جانە ۇستانىمدارىڭىزدى جوعارى باعالايمىز. ەلىمىزدەگى مىڭداعان بالالار سىزدەن ۇلگى الىپ, ۇلتتىق جەڭىل اتلەتيكانىڭ داستۇرلەرىن جالعاستىرىپ كەلەدى. ءبىز ءسىزدىڭ سپورتقا قوسقان ۇلەسىڭىز ءۇشىن شەكسىز العىسىمىزدى بىلدىرەمىز. سىزگە دەنساۋلىق, اماندىق جانە بارلىق باستامالارىڭىزعا تابىس تىلەيمىن!», دەلىنگەن سمايىلوۆتىڭ جولداعان حاتىندا.
سالتانات سوڭىندا سپورتشى جانكۇيەرلەر الدىندا قۇرمەت شەڭبەرىن جۇگىرىپ ءوتتى.