تەحنيكا عىلىمدارىنىڭ دوكتورى, پروفەسسور, اكادەميك قاسىمبەك جاقسىبايدى 70 جاسقا كەلگەن مەرەيتويىمەن قۇتتىقتايمىز!
اتامىز – ايتۋلى عالىم, اياۋلى اكە, ارداقتى اتا, اسىل جار, اينالاسىنا نۇرىن شاشقان ايرىقشا قامقور ادام. دوسقا كومەكتەسۋ – ونىڭ «جەدەل جاردەم» قىزمەتى سياقتى «ەكىنشى ماماندىعى». ەش ادامعا قىلداي ارامدىعى جوق, ءتۇزۋ جاراتىلعان جان. دوستىقتىڭ التىن ارقاۋىن ءۇزىپ الماي, قاستەرلەي قادىرلەپ كەلە جاتقان ازامات. مىنەزىنىڭ دارقاندىعىنان قىزمەتىندە دە كەرەمەت سىي-قۇرمەتكە يە. تابيعاتىنان نازىك, جاقسى مەن جاماننىڭ نارقى مەن پارقىن جاقسى اجىراتاتىن پاراسات يەسى.
« ۇلىلىق – قاراپايىمدىلىقتا» دەگەن وتە دۇرىس ۇعىم ەكەن تەكتى اۋلەتتىڭ تۋىن جاسىنا قاراماي كوتەرىپ كەلە جاتقان جان – بارلىق باۋىرىنىڭ اراسىنداعى تۋىستىق قارىم-قاتىناستىڭ ۇيىتقىسى. مەن ءوزىمدى ونىڭ باقىتقا بولەنگەن نەمەرەلەرىنىڭ ءبىرىمىن دەپ سانايمىن. ومىرىمە ءنار بەرگەن تورەبەك اتامنان كەيىنگى ادام – وسى جاقسىباي اتا. ومىرگە وي كوزىمەن قاراعان شاعىمدا ءبىلىمى مەن كىسىلىگى, العىرلىعى مەن الىمدىلىعى, پايىمى مەن پاراساتتىلىعى مول اتاما قاراپ وسسەم دەيمىن.
جاقسىباي اتامەن ءار كەزدەسۋ – ۇلگى-ونەگە, ايتقان ءسوزى – تاعىلىم. قانىنا بىتكەن ۇلتجاندىلىق قاسيەتى ايقىن كورىنىپ, بىلىمپازدىعى ەرەكشە دارالانىپ تۇرادى.
ادام بالاسىن جاقسىلىققا جەتكىزەتىن جاقسى قاسيەتتەرى دەپ ويلايمىن. ادامنىڭ ءوزىن-ءوزى قۇرمەتتەۋىنىڭ باستى قاعيداسى ىشكى جانە سىرتقى مادەنيەتتى تەڭ ۇستاۋ – اتاما ءتان قاسيەت. اتامنىڭ جۇزىنەن دە, مىنەز-قۇلقىنان دا ەرەكشە تەكتىلىك بايقالادى. ءجۇرىس-تۇرىسى, كيىم كيىسى, اسا تالعامپازدىعى – ءبىز ءۇشىن «برەند». تورەبەك اتامنىڭ جوقتىعىن بىلدىرمەي, اجەمنىڭ 70 جاسقا كەلگەن مەرەيتويىن الماتىعا ءوزىن شاقىرىپ تويلاپ بەرۋى ەكىنىڭ ءبىرىنىڭ قولىنان كەلمەيتىن مارتتىك دەپ ويلايمىن. مەنىڭ اتام وسىنداي. ونە بويى تولى ونەر. دومبىرا ۇستاسا, اۋەلەتە ءان سالىپ, كۇمبىرلەتە كۇي شەرتەدى.
«كىلەمگە بەرگىسىز الاشا بولادى, حانعا بەرگىسىز قاراشا بولادى» دەگەن ءسوز بار ەكەن. سول ءسوز مەنىڭ جاقسىباي اتاما قاراپ ايتىلعانداي. كىسىدەن تەك جاقسىلىق ىزدەپ, جاقسى ادامداردان ونەگە العان, جاقسىلارمەن ارالاسا ءومىر سۇرگەن ادام تۇبىندە نۇرعا بولەنەدى. دۇنيەنىڭ ءمانى – ۇزبەي جەتىلۋ, ساۋلەلى ساتىعا كوتەرىلۋ. كىسىنىڭ الا ءجىبىن اتتاماي ءومىر ءسۇرۋ, جوق پەن باردىڭ ارا سالماعىن بەزبەندەپ قاناعاتشىل بولۋ, سىپايى سالماقتى, كىسىنىڭ كوڭىلىن قالدىرماي, دوس-جارانمەن كىشىپەيىل قارىم-قاتىناستا تىرلىك كەشۋ – اتامنىڭ ماعىنالى عۇمىر جاسىنداعى باستى بايلامى. نەمەرەلەرىن دە وسى قاعيداعا ۇيرەتىپ, جاقسىلىققا باۋلىپ كەلەدى.
ارداقتى اتا! الىپ بايتەرەكتەي قۇت-بەرەكە ۇيىتقىسى بولىپ, ورنىڭىز قۇرمەتتى توردەن تۇسپەسىن! ءوزىڭدى تۇسىنەتىن, ۇلكەن تۇلعا بولۋىڭدى ءومىر بويى قولداپ كەلە جاتقان جان جارىڭ امان ءجۇرسىن! مەرەيلى جاسىڭمەن شىن جۇرەكتەن قۇتتىقتايمىن!
ۇرپاعىڭنىڭ باقىتىن, قۋانىشىن ۇزاق كورۋدى اللا تاعالا ءناسىپ ەتسىن!
تابيعات دارىتقان بارلىق قاسيەتىڭمەن جارقىراپ ءومىر كەشىپ, عۇمىرىڭ ۇزاق بولسىن, اتا!
نەمەرەڭىز
جاۋحاز تورەبەك