قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى امەريكا قۇراما شتاتتارىنىڭ ەلشىسى دەنيەل روزەنبليۋمدى قابىلدادى, دەپ حابارلايدى Egemen.kz.
كەزدەسۋ بارىسىندا تاراپتار ەكىجاقتى ساياسي, ساۋدا-ەكونوميكالىق جانە مادەني-گۋمانيتارلىق ارەكەتتەستىك كۇن ءتارتىبىنىڭ وزەكتى ماسەلەلەرىن, سونداي-اق الداعى ءىس-شارالاردىڭ كەستەسىن تالقىلادى.
ساۋدا-ەكونوميكالىق ىنتىماقتاستىقتىڭ جوعارى قارقىنى قاناعاتپەن اتاپ ءوتىلدى. 2022 جىلدىڭ قورىتىندىسى بويىنشا ءوزارا ساۋدا 2021 جىلمەن سالىستىرعاندا 37,2%-عا ارتىپ, 3,05 ملرد اقش دوللار قۇرادى.
1993 جىلدان بەرى اقش-تان قازاقستانعا تىكەلەي ينۆەستيتسيا اعىنىنىڭ جالپى كولەمى 62 ملرد اقش دوللاردان استى. 2022 جىلدىڭ العاشقى ءۇش توقسانىندا اقش-تان قازاقستانعا تىكەلەي ينۆەستيتسيا اعىنىنىڭ كولەمى الدىڭعى جىلدىڭ سايكەس كەزەڭىمەن سالىستىرعاندا 58,8%-عا ۇلعايىپ, 5 ملرد اقش دوللاردان استى.
سۇحباتتى قورىتىندىلاي كەلە, تاراپتار قازاقستان مەن اقش اراسىنداعى كەڭەيتىلگەن ستراتەگيالىق سەرىكتەستىك ءوزارا مۇددەلىلىك بار سالالاردا ودان ءارى داميتىنىنا سەنىم ارتتى.