بيىل ەلورداداعى ساكەن سەيفۋللين مۋزەيىنىڭ قۇرىلعانىنا 35 جىل تولادى. العاشقى اشىلعان كۇننەن وسى شاھاردىڭ رۋحاني-مادەني ورداسىنا اينالعان شاڭىراقتا داۋىلپاز اقىنعا قاتىستى بىرقاتار قۇندى دەرەكتەر مەن جادىگەرلەر ساقتالعان. جاقىندا مۇراجايدا ايتۋلى كۇنگە بايلانىستى «لاتىن جانە توتە قارپىمەن جازىلعان ساكەن شىعارمالارى» اتتى كورمە اشىلدى.
جالپى, اقىن مۋزەيىنىڭ اشىلعان كۇنى ەشقاشان ەسكەرۋسىز قالماعان. جىل سايىن وسى كۇنى ءتۇرلى مادەني ءىس-شارالار ۇيىمداستىرىلادى. ءبىز ايتىپ وتىرعان كورمە دە – سونىڭ ءبىر كورىنىسى. ءىس-شارانىڭ نەگىزگى ماقساتى – تۇعىرلى تۇلعانىڭ شىعارمالارىن ناسيحاتتاۋ.
س.سەيفۋللين مۋزەيىنىڭ عىلىمي قىزمەتكەرى قابيدەن قۋانىشبايدىڭ ايتۋىنشا, كورمەگە كورنەكتى قايراتكەردىڭ لاتىن جانە توتە قارپىمەن شىققان ەڭبەكتەرىمەن بىرگە ول قۇراستىرعان كىتاپتار قويىلعان. سولاردىڭ ىشىنەن 1914 جىلى جارىق كورگەن «وتكەن كۇندەر» اتتى تۇڭعىش جىر جيناعى مەن 1927 جىلى توتە قارپىمەن, 1936 جىلى لاتىن گرافيكاسىمەن باسىلعان, اتاقتى «تار جول, تايعاق كەشۋ» مەمۋارلىق رومانىن ەرەكشە ايتۋعا بولادى. سونداي-اق 1935 جىلى الماتىداعى قازاقستان كوركەم ادەبيەت باسپاسىنان ساكەننىڭ العىسوزىمەن شىققان ىبىراي ءالتىنساريننىڭ جىر جيناعى دا بار. بۇل كىتاپقا اعارتۋشىنىڭ 25 ولەڭى ەنگەن. سونىمەن بىرگە كورمە تورىنەن قالامگەردىڭ 1932-1935 جىلدارى شىعارمالارى ەنگەن «ادەبيەت مايدانى» جۋرنالى, 1973 جىلى شىققان «لوتوس» اتتى افرو-ازيالىق ولەڭدەر الماناحى جانە «سوتسياليستان», «ەكسپرەسس» كىتاپتارى مەن جارى گۇلباھرامعا 1929-1935 جىلدارى جازعان حاتتارى ورىن العان.