قوستاناي وبلىستىق مادەنيەت باسقارماسى باسشىسى ە.قالماقوۆتىڭ بۇيرىعىمەن ازامات تولەگەتاي ۇلى شۇكەەۆكە ءى.وماروۆ اتىنداعى قوستاناي وبلىستىق قازاق دراما تەاترى باسشىسىنىڭ مىندەتىن اتقارۋ جۇكتەلدى, دەپ حابارلايدى Egemen.kz.
وڭىرلىك «قوستاناي تاڭى» گازەتىنىڭ جازۋىنشا, تەاتر ترۋپپاسى بۇعان دەيىن ا.شۇكەەۆتىڭ كانديداتۋراسىن قولداپ, باسقارماعا ۇجىمدىق حات جولداعان.
ازامات تولەگەتاي ۇلى 1982 جىلى شىعىس قازاقستان وبلىسىندا تۋعان. 2003 جىلى ت.جۇرگەنوۆ اتىنداعى قازاق ۇلتتىق ونەر اكادەمياسىن «مۋزىكا تەاترىنىڭ اكتەرى» ماماندىعى بويىنشا تامامداعان. شىعارماشىلىق ەڭبەك جولىن ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىندا باستادى. 2012 جىلدان بەرى ءى.وماروۆ اتىنداعى قوستاناي وبلىستىق قازاق دراما تەاترىندا ەڭبەك ەتىپ كەلەدى.
«مادەنيەت سالاسىنىڭ ۇزدىگى» توسبەلگىسىنىڭ يەگەرى. جوعارى ساناتتى اكتەر. كوپتەگەن باستى رولدەردى سومداپ, جوعارى جەتىستىكتەرگە جەتكەن. «ارت-پرەمەر» حالىقارالىق ونەر فەستيۆالىندە ۇزدىك شىعىپ, «پريزنانيە» نوميناتسياسى بويىنشا ءى دارەجەلى ديپلومىنىڭ يەگەرى اتانعان. 2021 جىلعى «تەمىرقازىق – 2021» تەاتر سىيلىعىنىڭ «ۇزدىك ەر بەينەسى» نوميناتسياسىنىڭ لاۋرەاتى. شىعارماشىلىق تابىسى ءۇشىن قوستاناي وبلىسىنىڭ «رۋحاني قازىنا – 2022» وبلىستىق بايقاۋىنىڭ «تەاتر جانە كونتسەرت ۇيىمىنىڭ ۇزدىك قىزمەتكەرى» نوميناتسياسىنىڭ جەڭىمپازى, «احمەت بايتۇرسىن ۇلى 150 جىل» مەرەيتويلىق مەدالىمەن ماراپاتتالعان.