پرەمەر-ءمينيستردىڭ ءبىرىنشى ورىنباسارى رومان سكليار قاتتى پايدالى قازبالار مەن كومىرسۋتەك شيكىزاتىنىڭ كەن ورىندارىن تەكسەرۋ ماسەلەسى جونىندە كەڭەس وتكىزدى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
ۇكىمەت جەر قويناۋىن پايدالانۋشىلارعا بەرىلگەن كەلىسىمشارتتار مەن ليتسەنزيالاردى قايتا قاراۋ بويىنشا جۇمىس جۇرگىزىپ جاتىر. تالداۋ بارىسىندا 2022 جىلى ۋاكىلەتتى ورگاندار قاتتى پايدالى قازبالار بويىنشا 115 كەلىسىمشارت پەن 198 ليتسەنزيانى, سونداي-اق كومىرسۋتەك شيكىزاتى بويىنشا 12 كەلىسىمشارتتى بۇزدى.
ناتيجەسىندە مەملەكەتتىك قورعا التىن, كومىر, تەمىر, مىس, بوكسيت, پوليمەتالل جانە ت.ب. كەن ورىندارى قايتارىلدى, ولار كەيىننەن ستراتەگيالىق ينۆەستورلارعا بەرۋ ءۇشىن اۋكتسيونعا شىعارىلادى.
2022 جىلى وتكىزىلگەن اۋكتسيونداردىڭ قورىتىندىسى بويىنشا بيۋدجەتكە 26 ملرد تەڭگە سوماسىنا قول قويۋ بونۋسى تولەندى جانە كومىرسۋتەك شيكىزاتى بويىنشا گەولوگيالىق بارلاۋعا 50 ملرد تەڭگەدەن استام ينۆەستيتسيا مالىمدەلدى.
جەر قويناۋىن پايدالانۋ قۇقىعىن ۇسىنۋعا ارنالعان اۋكتسيونعا بارلىق مۇددەلى ينۆەستورلار قاتىسا الادى. اۋكتسيونداردى وتكىزۋ تۋرالى اقپارات مىندەتتى تۇردە رەسپۋبليكالىق باسپا باسىلىمدارىندا جانە مەملەكەتتىك ورگانداردىڭ ينتەرنەت-رەسۋرستارىندا جاريالانادى.
سونىمەن قاتار ۋاكىلەتتى ورگاندار قارجىلىق مىندەتتەمەلەردى بۇزعان جەر قويناۋىن پايدالانۋشىلارعا ايىپپۇل سانكتسيالارىن قولدانۋ بويىنشا جۇمىس جۇرگىزىپ جاتىر.
2022 جىلى مەملەكەت كىرىسىنە قاتتى پايدالى قازبالار بويىنشا 331 ملن تەڭگە مولشەرىندە تۇراقسىزدىق ايىبى ءوندىرىلدى, سونداي-اق كومىرسۋتەك شيكىزاتى سالاسىنداعى 9 كەلىسىمشارت بويىنشا 1,8 ملرد تەڭگەگە بەرەشەك وتەلدى.
قابىلدانىپ جاتقان شارالار ناتيجەسىندە جەر قويناۋىن پايدالانۋ سالاسىنا, ءبىرىنشى كەزەكتە قاتتى پايدالى قازبالار كەن ورىندارىن يگەرۋ ءۇشىن ينۆەستيتسيا اعىنى ۇلعايادى.
ۇكىمەت وسى باعىتتاعى جۇمىستى جالعاستىرادى.