تۇركىستان وبلىسىندا زاڭسىز اڭشىلىقپەن اينالىسقان كۇدىكتىلەردەن قارۋ-جاراق تاركىلەندى, دەپ حابارلايدى Egemen.kz Polisia.kz-كە سىلتەمە جاساپ.
بۇل تۋرالى تۇركىستان وبلىسى پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ مالىمدەدى.– ءبىزدىڭ تۇركىستان وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى ۇقك دەپارتامەنتىمەن بىرلەسىپ, ارنايى جەدەل-ىزدەستىرۋ ءىس-شارالارىن جۇرگىزدى. ناتيجەسىندە قىزىل كىتاپقا ەنگىزىلگەن جابايى جانۋارلاردى زاڭسىز اۋلاۋ دەرەگىن انىقتادى. بۇل جايتتى قر قك-ءنىڭ 339-بابى 1-بولىگى (وسىمدىكتەردىڭ نەمەسە جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) بويىنشا تىركەدىك, – دەدى ول. جەدەل ۋاكىلدەرمەن دەر كەزىندە قابىلدانعان شارالاردىڭ ناتيجەسىندە سوزاق اۋدانىنىڭ تۇرعىندارى انىقتالدى, – دەدى ق. ساحوۆ.
ولاردىڭ ءبىرى ارنايى ەسەپتە تۇرادى. پوليتسيا قىزمەتكەرلەرى كۇدىككە ىلىنگەن ەر ادامداردىڭ ءۇيىن ءتىنتۋ كەزىندە قازاقستان قىزىل كىتابىنا ەنگىزىلگەن ارقار جانۋارىنا ۇقساس اڭنىڭ ەتى, ءمۇيىزى مەن باسىن تاپتى.– سونداي-اق كۇدىكتىلەردەن ەكى تىركەلمەگەن اتىس قارۋى (كارابين جانە اڭشىلىق مىلتىق), ءارتۇرلى كاليبرلى 50-دەن استام پاترون, قارۋ-جاراق وپتيكاسى, كىسەندەر, قولدان جاسالعان پىشاق, ەسىرتكىگە ۇقساس زاتتار مەن ءدىني ادەبيەتتەردى تاركىلەدىك. الىنعان زاتتاي دالەلدەمەلەردى ءتيىستى ساراپتاماعا جىبەردىك. قازىرگى ۋاقىتتا وسى جايت بويىنشا سوتقا دەيىنگى تەرگەۋ امالدارى جۇرگىزىلىپ جاتىر. كۇدىكتىلەر قاماۋدا. وقيعانىڭ ءمان-جايىن انىقتاپ جاتىرمىز, – دەپ تولىقتىردى سپيكەر.