پرەزيدەنت اكتيۆتەردى ەلگە قايتارۋ بويىنشا ناقتى تاپسىرما بەردى. بىراق ۇكىمەت وسى تاپسىرمانى قانداي دارەجەدە اتقارا الادى؟ قانداي زاڭدىلىق نورمالاردى قابىلدايدى؟ ماسەلە – وسىندا. كوپ جاعدايدا ۇكىمەت قاۋقارسىزدىق تانىتادى جانە وتە باياۋ قيمىلدايدى.
شەتەلدەگى اقشانى قايتارىپ الامىز دەپ جۇرگەندە وزگە ەلگە تالاي قاراجات شىعىپ كەتە مە دەگەن كۇدىك كوپ. سوندىقتان ەڭ ءبىرىنشى كەزەكتە شەتەلگە زاڭسىز جولمەن قاراجات شىعارماۋدىڭ جولدارىن قاراستىرۋىمىز قاجەت. ياعني وسى ۋاقىتقا دەيىن اكتيۆتەر قانداي جولدارمەن شىعارىلدى؟ قانداي امالدار قولدانىلعان؟ وسى جايتتىڭ بارلىعى جان-جاقتى تەكسەرىلۋى كەرەك. اۋدارىلعان اقشالاردىڭ تاريحى تەكسەرىلىپ, سىرتقا شىعاتىن بۇكىل جولدى جابۋىمىز كەرەك. وسى ءىس-ارەكەتتەر جاسالماي ەلگە اقشا قايتارامىز دەگەننىڭ ءبارى – بوس اۋرەشىلىك.
كەيىنگى ۋاقىتتا اقشا اينالىمىن بلوكچەين تەحنولوگياسىنا كوشىرۋ تۋرالى ۇسىنىس كوپ ايتىلىپ ءجۇر. وسى ۇدەرىستى جىلدامداتىپ ەنگىزۋ قاجەت. ويتكەنى بلوكچەين تەحنولوگياسىنىڭ ۇتىمدى تۇسى – اقشانىڭ تسيفرلىق ىزدەرى ساقتالادى. قازىر ەلىمىزدە تسيفرلىق تەڭگە شىعىپ جاتىر جانە ول وسى جىلدان باستاپ اينالىمعا ەنگىزىلەدى. بۇل دا بولسا اقشانىڭ زاڭسىز شەتەل اسىپ كەتۋىنە توسقاۋىل قويادى.
تاعى ءبىر ماڭىزدى ماسەلە – جەكە تۇلعالاردان گورى ءىرى-ءىرى كومپانيالار ارقىلى كەتكەن قارجىنى قايتارۋعا قاتىستى. ول مىس, مۇناي سالاسىنداعى كومپانيالار. ماسەلەن, «قازاقمىس», «كازتسينك» سەكىلدى شيكىزاتتىق سەكتورداعى كومپانيالاردان شەتەلگە جىبەرگەن قاراجاتى وتە كوپ.
ەڭ باستىسى, مەملەكەت شەتەلگە زاڭسىز شىعارىلعان حالىق بايلىعىن كەرى قايتارۋدىڭ ناقتى تەتىگىن ۇسىنۋى قاجەت. ۇكىمەتتىڭ دە نەگىزگى مىندەتى – وسى. ال ەڭ ماڭىزدىسى – وسى ماسەلەلەردە ازاماتتىق بەلسەندىلىك جوعارى بولۋى كەرەك. حالىقتىڭ مەملەكەت پەن ۇكىمەتكە ناقتى تالاپتارىن قويا ءبىلىپ, قوعامدىق باقىلاۋدى كۇشەيتۋدىڭ ماڭىزى وتە زور. جۋرناليستەر قاۋىمى دا باتىل زەرتتەۋلەر جۇرگىزۋى كەرەك. سوندا عانا ءبىز حالىقتىڭ قازىناسىن تولىق قايتارا الامىز.
ماقسات حالىق,
ەكونوميست