سولتۇستىك قازاقستان وبلىسىندا دارىگەرلەر تاپشى

قازىر وبلىستا 208 دارىگەر جەتىسپەيدى. وبلىس اكىمى ايداربەك ساپاروۆ وڭىرگە دارىگەرلەردى تارتۋدىڭ جوسپارىن ازىرلەۋ قاجەت ەكەنىن اتاپ ءوتتى.

دەنساۋلىق ساقتاۋ باسقارماسىنىڭ باسشىسى قۇمار كوسەمىسوۆ سولتۇستىكقازاقستاندىق دارىگەرلەردىڭ جوعارى بىلىكتىلىگى ولاردى باسەكەگە قابىلەتتى جانە رەسپۋبليكالىق ماڭىزى بار قالالاردا سۇرانىسقا يە ەتەتىنىن اتاپ ءوتتى. جاس ماماندار مەن باسقا وبلىستاردان كەلگەندەر باسپانانىڭ جوقتىعىنان, تۇرمىستىق جەتىسپەۋشىلىكتەن كەرى كەتىپ جاتىر. بۇل اسىرەسە اۋىلدىق جەرلەرگە قاتىستى بولىپ وتىر.

«2021 جىلدان باستاپ قالالىق مەديتسينالىق ۇيىمدارعا جۇمىس ىستەۋ ءۇشىن كەلگەن مەديتسينا ماماندارىنا 1,5 ميلليون تەڭگە, ال اۋداندىق مەكەمەلەرگە 2,5 ميلليون تەڭگە جاردەماقى بەرىلىپ ءجۇر. جاس ماماندار «دارىگەرلەر ۇيىندە» جالدامالى باسپانامەن قامتاماسىز ەتىلسە, مەديتسينا قىزمەتكەرلەرى «7-20-25» يپوتەكالىق تۇرعىن ءۇي باعدارلاماسى مەن «نۇرلى جەر» باعدارلاماسىنا قاتىسا الادى. وتكەن جىلى 126 دارىگەرگە جالپى سوماسى 232 ميلليون تەڭگەگە كوتەرمە جاردەماقى تولەندى. اقپان ايىندا تاعى 41 دارىگەر جاردەماقى الادى», دەدى ق.كوسەمىسوۆ.

ول مەديتسينالىق ۇيىمداردىڭ باسشىلارى جاس ماماندارعا 1 ميلليون تەڭگەدەن 3 ميلليون تەڭگەگە دەيىن جاردەماقى تولەيتىنىن, تۇرعىن ءۇيدى جالعا الۋ قۇنىنىڭ 50 پايىزىن وتەيتىنىن قوسا ايتتى.

ق.كوسەمىسوۆتىڭ ايتۋىنشا, قاڭتار ايىنان باستاپ وبلىس دەلەگاتسيالارى مەديتسينالىق جوعارى وقۋ ورىندارىنا بارىپ, تۇلەكتەردى جۇمىسقا شاقىرادى.