ءتارتىپ بار جەردە تاربيە بار

– سۇلتان بۇركىتباي ۇلى, اڭگى­مەمىزدى بيىل قۇرىلعانىنا 30 جىل تولىپ وتىرعان اسكەردەگى تاربيە قۇرى­لىمدارىنىڭ تاريحىنان باس­تاساق.

– تاربيە جۇمىسى ورگاندارىن قۇرۋ تاريحى قارۋلى كۇشتەردىڭ قالىپتاسۋى جانە دامۋ داۋىرىمەن تىعىز بايلانىس­تى. بۇل جەكە قۇرامنىڭ اسكەري جانە وقۋ-جاتتىعۋ تاپسىرمالارىن ورىنداۋعا مورالدىق جانە پسيحولوگيالىق دايىن­دىعىن باعالاۋداعى جاڭا, جوعارى كريتەريلەرگە قاتىستى. وسى مىندەتتى شە­­شۋ­دەگى نەگىزگى ءرول جەكە قۇرامنىڭ مو­رال­دىق-ادامگەرشىلىك رۋحىن قالىپ­تاستىرۋعا ارنالعان تاربيە جانە يدەولو­گيالىق جۇمىستار ورگاندارىنا جۇكتەلدى.

تاربيە قۇرىلىمدارى وفيتسەرلەرى ينستيتۋتىنىڭ پايدا بولۋىنا تۇڭعىش قورعانىس ءمينيسترى, حالىق قاھارمانى, ارميا گەنەرالى ساعادات نۇرماعامبەتوۆ العاشقى كۇننەن ەرەكشە ءمان بەردى. ءتول اسكەرىمىزدىڭ تولىققاندى دامۋى ءۇشىن تاربيە جۇمىستارىنىڭ ماڭىزدىلىعى كۇن تارتىبىنە العاشقىلاردىڭ ءبىرى بولىپ شىقتى. ساعادات قوجاحمەت ۇلىنىڭ جاۋىنگەرلىك, ومىرلىك باي تاجىريبەسى, اسكەريلەر اراسىنداعى جوعارى بەدەلى اسكەرلەردى باسقارۋدىڭ ءتيىمدى جۇيەسىن قۇرۋ مەن ارميانىڭ نورماتيۆتىك-قۇقىق­تىق بازاسىن ازىرلەۋ ماسەلەلەرىن شەشۋدە عانا ەمەس, سونىمەن بىرگە جاس تاۋەلسىز مەملەكەتتىڭ جاۋىنگەرلەرىن تاربيەلەۋگە دە كوپ اسەر ەتتى.

قارۋلى كۇشتەردىڭ تاربيە جۇمىس­تارى قۇرىلىمىنا ءار كەزەڭدە گەنەرال-مايور­لار ايتقالي ەسەنعۇلوۆ, امىربەك توگىسوۆ, مارات ناعۇمانوۆ, گەنەرال-لەيتەنانت مۇرات مايكەەۆ, پولكوۆنيكتەر بولات نازيروۆ, امانگەلدى يبراەۆ, گەنەرال-مايور قايرات مىڭجانوۆ, پول­كوۆ­نيكتەر جۇمابەك حاسەنوۆ, ار­كەن تاشۋباەۆ, گەنەرال-لەيتەنانت مۇحا­مەدجان تالاسوۆ, پولكوۆنيك قايسار مۇعالوۆتار باسشىلىق جاسادى. 2019 جىلدان بەرى بۇل قۇرىلىمدى گەنەرال-مايور سەرىك بورامباەۆ باسقارىپ كەلەدى.

قارۋلى كۇشتەردەگى تاربيە جۇمىسى­نىڭ نەگىزىن قالاۋشىلاردىڭ ءبىرى رەتىندە پولكوۆنيك مەلس شامپيەۆتىڭ ەڭبەگىن ەرەكشە اتاپ وتۋگە بولادى. بۇگىندە مەلس جۇمان ۇلى «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى الماتى فيليالىنا باسشىلىق جاسايدى.

سونىمەن بىرگە كوپتەگەن اسكەري قىزمەتشى تاربيە جۇمىسى ورگاندارىن قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىن­باسارى, گەنەرال-لەيتەنانت مۇحا­مەد­جان تالاسوۆ باسقارعان كەزدى ەرەك­شە ىلتيپاتپەن ەسكە الادى. سول تۇستا اس­كەرلەرگە «جاۋىنگەرلىك دوس», «پيرا­ميدا» جۇيەلەرى ەنگىزىلدى. جەدەل-تاكتي­كالىق جانە ستراتەگيالىق وقۋ-جات­تىعۋلاردى, ونىڭ ىشىندە حالىقارالىق وقۋ-جاتتىعۋلاردى وتكىزۋ كەزىندە جاۋىن­­گەرلىك ءىس-قيمىلداردى مورالدىق-پسي­حولوگيالىق تۇرعىدان قامتاماسىز ەتۋدىڭ زاماناۋي نىساندارى مەن تاسىل­دەرى پىسىقتالا باستادى.

بۇگىندە قارۋلى كۇشتەردە تاربيە جانە يدەولوگيالىق جۇمىستار قۇ­رى­لىمى ۇيلەسىمدى جۇمىس ىستەپ كەلە­دى. ونىڭ قۇرامىنا قورعانىس مينيس­ترلىگىنىڭ تاربيە جانە يدەولوگيا­لىق جۇمىستار دەپارتامەنتى, اسكەر تۇر­لەرىندەگى باس باسقارمالار, وڭىر­لىك قولباسشىلىقتار مەن اسكەر تەكتە­رىندەگى باسقارمالار, اسكەري وقۋ ورىن­دارىنداعى, اسكەري بولىمدەر مەن مەكە­مەلەردەگى بولىمدەر كىرەدى.

وسى جىلدار ىشىندە اسكەري تاربيە­شىلەر ينستيتۋتى جەكە قۇرامدى وقىتۋ مەن تاربيەلەۋ جۇيەسىندە ماڭىزدى ورىن الاتىن ساناۋلى قۇرىلىمداردىڭ بىرىنە اينالدى. ونىڭ ۇزدىكسىز جۇرگىزگەن بەلسەندى جۇمىسى ءوزىنىڭ قاجەتتىلىگىن تولىق دالەلدەي ءبىلدى دەۋگە نەگىز بار.

بۇگىندە تاربيەشى وفيتسەرلەردىڭ جاڭا تولقىنى اعا بۋىننىڭ داڭقتى داستۇرلەرىن لايىقتى جالعاستىرىپ كەلەدى. تاربيە قۇرىلىمدارىنىڭ وفي­تسەر­لەرى بولىمدەر مەن قۇرامالاردىڭ كومانديرلەرىمەن بىرلەسىپ, اسكەري ءتار­تىپ پەن قۇقىقتىق ءتارتىپتى نىعاي­تۋ, بولىمشەلەردەگى مورال­دىق-ادامگەر­شىلىك جاعدايدى ساۋىقتىرۋ, جەكە قۇرام­نىڭ ار-نامىسى مەن قادىر-قاسيەتىن قورعاۋدى قامتاماسىز ەتۋ شەڭبەرىندە تاربيە جۇمىسىنىڭ ەلەۋلى كولەمىن اتقاردى. بۇگىنگى تاڭ­دا جەكە قۇراممەن تاربيە جانە يدەولو­گيالىق جۇمىس ار­ميانىڭ مۇددەسى ءۇشىن عانا جۇمىس ىستەيتىن, ۇنەمى دامىپ, جەتىلدىرىلىپ وتىراتىن ۇيلەسىمدى مەحانيزمگە اينالدى.

– قازىرگى تاڭدا قارۋلى كۇشتەر ءۇشىن تاربيەشى وفيتسەرلەردى دايارلاۋ قاي اسكەري وقۋ ورىندارىندا جۇزەگە اسىرىلادى؟

– بۇگىندە قارۋلى كۇشتەردە 1400-دەن استام تاربيەشى وفيتسەر قىزمەت اتقارادى. ولاردىڭ قاتارىنا تاربيە جانە يدەولوگيالىق جۇمىستار جونىن­دەگى ورىنباسارلار, ارنايى ناسيحات, مەملەكەتتىك-قۇقىقتىق دايىندىق, اس­كەري ءتارتىپ جونىندەگى ماماندار, وفيتسەر-پسيحولوگتەر, اسكەري وقۋ ورىن­دارىنداعى گۋمانيتارلىق پاندەر­دىڭ وقىتۋشىلارى كىرەدى.

سوڭعى جىلدارى كاسىبي كادرلاردى دايارلاۋعا ەرەكشە كوڭىل ءبولىنىپ وتىر. بۇگىندە تاربيە قۇرىلىمدارىنىڭ وفيتسەرلەرىن دايارلاۋمەن قارۋلى كۇش­تەردىڭ جۇيەسىنە كىرەتىن ەكى اسكەري وقۋ ورنى اينالىسىپ كەلەدى.

ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ تاربيە جانە يدەولوگيالىق جۇمىستار جونىندەگى كافەدراسى «پسيحولوگ-پەدا­گوگ» بىلىكتىلىگىمەن «تاربيە قۇرىلىم­دارىنىڭ وفيتسەرلەرى» ماماندىعى بويىن­شا وفيتسەرلەر دايارلايدى.

2016 جىلى ۇلتتىق قورعانىس ۋني­ۆەرسيتەتىندە اشىلعان «تاربيە جانە يدەولوگيالىق جۇمىستى ۇيىمداستىرۋ» بىلىكتىلىگىمەن «اسكەري ۇجىمداعى الەۋ­مەتتىك جانە يدەولوگيالىق جۇ­مىس» ماماندىعى بويىنشا تاربيە قۇرى­لىمدارىنىڭ وفيتسەرلەرىن دايارلايتىن م.عابدۋللين اتىنداعى اسكەري-گۋمانيتارلىق عىلىمدار فاكۋلتەتى ءبىلىم بەرۋدەگى وزىق ادىستەر مەن تەحنولوگيالاردى قولداناتىن بىردەن-ءبىر وقۋ-ادىستەمەلىك ورتالىق بولىپ وتىر.

بۇل ءبىرىنشى كەزەكتە بىزگە وفيتسەرلەردىڭ كاسىبي دەڭگەيىن ەداۋىر ارتتىرۋعا, قۇ­رامالار مەن ءبولىم كومانديرلەرىنىڭ تاربيە جانە يدەولوگيالىق جۇمىستار جونىندەگى ورىنباسارلارى لاۋازىمدارىن كادرلىق وفيتسەرلەرمەن تولىقتىرۋعا قول جەتكىزۋگە مۇمكىندىك بەردى.

– بۇگىندە قارۋلى كۇشتەردەگى تار­بيە جۇمىستارىن نىعايتۋ ءۇشىن قان­داي شارالار جۇرگىزىلىپ جاتىر؟

– تəربيە جۇمىسى قاي ۋاقىتتا دا جەكە قۇرامدى وقىتۋ مەن تəربيەلەۋدىڭ بىردەن-ءبىر ءتيىمدى نىسانى بولىپ قالا بەرەدى. اسكەردەگى تاربيە جۇمىستارى تۋرالى ايتقاندا قارۋلى كۇشتەر اردا­گەرلەرىنىڭ ەڭبەگىن ەرەكشە اتاپ وتكەن ابزال. 2011 جىلى قۇرىلعان «قارۋ­لى كۇشتەردىڭ ارداگەرلەرى» قوعامدىق بىرلەستىگىمەن ءوزارا تىعىز بايلانىس ۇيىمداستىرىلىپ, ءىس-شارالاردىڭ بى­رىڭ­عاي جۇمىس جوسپارى بەكىتىلدى.

ارداگەرلەر جاس وفيتسەرلەرگە كاسىبي شەبەرلىك داعدىلارىن يگەرۋگە, بەيىمدەلۋ كەزەڭىندەگى قيىندىقتاردى ەڭسەرۋگە كومەك­تەسۋ ماقساتىندا تالىمگەرلىك قىز­­مەت­كە بەلسەندى قاتىسىپ كەلەدى. ولاردىڭ قىزمەتتىك, جاۋىنگەرلىك باي تاجى­ريبەسى تاربيەلىك ماڭىزى بار اسكەري-پا­ت­ريوت­تىق ءىس-شارالاردى وتكىزۋ كەزىندە كەڭىنەن پايدالانىلادى.

وتكەن جىلى قورعانىس ءمينيسترى رۋسلان جاقسىلىقوۆتىڭ باستاماسىمەن «قازاقستان رەسپۋبليكاسىنىڭ قارۋلى كۇشتەرىندە, باسقا دا اسكەرلەرى مەن اسكەري قۇرالىمدارىندا 2022-2025 جىلدارعا ارنالعان ء«ومىرىڭدى ساقتا» باعدارلاماسىن بەكىتۋ تۋرالى» بىرلەسكەن بۇيرىق شىعارىلدى. باعدارلاما اسكەري قىزمەتشىلەردىڭ ءومىرى مەن دەنساۋلىعىن ساقتاۋعا, جەكە قۇرامنىڭ قازا بولۋىنىڭ الدىن الىپ, جاڭا نىسانداردى ەنگىزۋ ارقىلى ارميا­دا قايتارىمسىز شىعىنداردى ازايتۋعا, قولايلى اقپاراتتىق-يميدجدىك ورتا قالىپتاستىرۋعا جانە اسكەري تاربيە مەن وقىتۋدىڭ قولدانىستاعى جۇيەسىن جەتىلدىرۋگە باعىتتالعان.

سونداي-اق اسكەري قىزمەتشىلەردىڭ وتباسى مۇشەلەرىمەن جۇمىس جونىندەگى شتاتتىق قىزمەتتەر دە تاربيە جانە يدەو­لوگيالىق جۇمىستارعا جاڭاشا سەر­پىن بەرگەنىن ايتا كەتكەن ءجون. ولار كومانديرلەرگە اسكەري قىزمەتشىلەردىڭ وتباسىلىق قۇندىلىقتارى مەن مو­رال­دىق-پسيحولوگيالىق احۋالىن نىعاي­تۋعا, الەۋمەتتىك-تۇرمىستىق جانە رۋحا­ني-ادامگەرشىلىك قاجەتتىلىكتەرىن قانا­عاتتاندىرۋعا ايتارلىقتاي جاردەم كورسەتىپ كەلەدى.

بۇل رەتتە قورعانىس مينيسترلىگىنىڭ اقپاراتتىق-ءتۇسىندىرۋ توبى اتقارعان جۇمىستار تۋرالى دا ايتا كەتكەن ورىن­دى. وتكەن جىلى قۇرامىندا تاربيە, قارجى, تىل قۇرىلىمدارى, اسكەري پوليتسيا وكىلدەرى, زاڭگەرلەر مەن قك ۇلتتىق اسكەري-پاتريوتتىق ورتالىعىنىڭ قىزمەتكەرلەرى بار توپ ەل وڭىرلەرىندەگى اسكەري بولىمدەر مەن مەكەمەلەردە بولىپ, اسكەري قىزمەتشىلەر مەن ولاردىڭ وتباسى مۇشەلەرىنە اسكەري قىزمەتشىلەردىڭ الەۋمەتتىك كوڭىل  كۇيىن جاقسارتۋ, اسكەري قىزمەتشىلەردى قارجىلىق قامتاماسىز ەتۋ جانە تۇرعىن ءۇي تولەمدەرى بويىنشا كەزدەسۋلەر ۇيىمداستىرىپ, اقپاراتتىق-ءتۇسىندىرۋ جۇمىستارىن جۇرگىزدى.

بۇل ءىس-شارالاردىڭ بارىنە جەرگىلىكتى اتقارۋشى ورگاندار, قازاقستان حالقى اسسامبلەياسى, ارداگەرلەر ۇيىمدارىنىڭ وكىلدەرى, گارنيزونداردىڭ اسكەري قىز­مەتشىلەرى مەن ولاردىڭ وتباسى مۇشەلەرى قاتىستى.

بۇدان وزگە اسكەري بولىمدەر مەن مەكە­مەلەردە اسكەري قىزمەتشىلەر مەن ولاردىڭ وتباسى مۇشەلەرىنە ەل پرە­زيدەنتىنىڭ 2022 جىلعى 1 قىر­كۇيەكتەگى «ادىلەتتى مەملەكەت. ءبىر­تۇ­تاس ۇلت. بەرەكەلى قوعام» اتتى قازاق­ستان حالقىنا جولداۋىنىڭ نەگىزگى ق­اعي­دالارىن ءتۇسىندىرۋ جۇمىستارى جۇرگىزىلدى.

اقپاراتتىق-ءتۇسىندىرۋ توبىنىڭ جۇمىسى كەزىندە, جەكە قۇرامدى اسكەري-پاتريوتتىق تاربيەلەۋ, ولاردىڭ مورالدىق-جاۋىنگەرلىك رۋحىن كوتەرۋ ماقساتىندا ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى كۇزگى اسكەرگە شاقىرۋ ناۋقانى اياسىندا قارۋلى كۇشتەردىڭ بەدەلى مەن ابىرويىن كوتەرۋگە ارنالعان مادەني-دەمالىس ءىس-شارالارىن وتكىزدى. قورعانىس مينيسترلىگىنىڭ اق­پاراتتىق-ءتۇسىندىرۋ توبى ءبىلىم بەرۋ مەكەمەلەرىندە بولىپ, ەرلىك ساباقتارىن دا ۇيىمداستىردى.

مەكتەپ وقۋشىلارىمەن كەزدەسۋ بارىسىندا اسكەري قىزمەتشىلەر وتان قورعاۋشىلاردىڭ ابىرويلى قىزمەتى تۋرالى ايتىپ بەردى. تاۋەلسىز قازاقستان قارۋلى كۇشتەرىنىڭ تاريحى جاستاردىڭ ەرەكشە قىزىعۋشىلىعىن تۋدىردى. كەزدەسۋلەردىڭ بارىندە وقۋشىلارعا ەل اسكەرىنىڭ دامۋى مەن جاۋىنگەرلىك داستۇرلەرى تۋرالى ايتىلىپ, دەرەكتى فيلمدەر كورسەتىلدى.

– گەنەرال-لەيتەنات مىرزا, 2022 جىلعى 15 ساۋىردە «قازاقستان رەسپۋب­ليكاسىنىڭ كەيبىر زاڭنامالىق اكتى­لەرىنە ارناۋلى مەملەكەتتىك ورگاندار قىزمەتكەرلەرى مەن اسكەري قىزمەت­شىلەردىڭ اسكەري قىزمەتى جانە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى. بۇل وزگەرىستەر نە ءۇشىن قاجەت جانە ولار قانداي زاڭنامالىق اكتىلەرگە ەنگىزىلدى؟

– بۇل تولىقتىرۋلار «تۇرعىن ءۇي قاتىناستارى تۋرالى», «قازاقستان رەسپۋبليكاسىنىڭ ارناۋلى مەم­لەكەتتىك ورگاندارى تۋرالى» جانە «اسكەري قىزمەت جانە اسكەري قىزمەت­شىلەردىڭ مارتەبەسى تۋرالى» زاڭدارعا ەنگىزىلدى.

«تۇرعىن ءۇي قاتىناستارى تۋرالى» زاڭعا ەنگىزىلگەن وزگەرىستەر قىزمەتتىك تۇرعىن ءۇيدى جەكەشەلەندىرۋ قۇقىعىنىڭ اۋىسۋىن, اقشالاي وتەماقى الۋدى جانە قايتىس بولعان اسكەري قىزمەتشىنىڭ نەمەسە ارنايى ورگان قىزمەتكەرىنىڭ وتباسى مۇشەلەرى الماسۋ قۇقىعىن پايدالانۋدى كوزدەيدى. ودان بولەك, تۇزەتۋلەر قىزمەتتىك تۇرعىن ءۇيدى قالدىق قۇنىمەن نەمەسە وتەۋسىز جەكەشەلەندىرۋ, سونداي-اق قوس تۇرعىن ۇيمەن قامتاماسىز ەتۋ جاعدايلارىن شەكتەۋ ماسەلەلەرىنە قاتىستى.

قارۋلى كۇشتەر, باسقا دا اسكەرلەر مەن اسكەري قۇرالىمدار ءۇشىن العاش رەت «مودۋلدىك تۇرعىن ءۇي» ۇعىمى ەنگىزىلەدى. مودۋلدىك تۇرعىن ۇيلەردى ساتىپ الۋ قىسقا مەرزىمدە اسكەرلەردى قىزمەت ورىندارىندا تۇرعىن ۇيمەن قامتاماسىز ەتۋگە مۇمكىندىك بەرەدى. قاجەت بولعان جاعدايدا باسقا وڭىرلەرگە كوشىرۋگە بولادى. وسى ماقسات ءۇشىن «تۇرعىن ءۇي قاتىناستارى تۋرالى» زاڭ «مودۋلدىك ءۇي» ۇعىمىمەن تولىقتىرىلدى.

جالپى, زاڭ جوباسى اسكەري قىز­مەت­شىلەر مەن ارنايى مەملەكەت­تىك ورگاندار قىزمەتكەرلەرىنىڭ قۇقىق­تارى مەن زاڭدى مۇددەلەرىن قورعاۋعا باعىتتالعان. ولاردى الەۋمەتتىك قام­تاماسىز ەتۋدى جاقسارتۋعا, اسكەري قىزمەت وتكەرۋ ماسەلەلەرىن رەتتەۋگە مۇمكىندىك بەرەدى.

– وسكەلەڭ ۇرپاقتىڭ اسكەري قىزمەتكە دەگەن ىنتاسىن ارتتىرۋ ماقساتىندا قولعا الىنعان جۇمىستار تۋرالى دا ايتا وتىرساڭىز.

– وتان قورعاۋشىلاردىڭ, سونداي-اق اسكەرگە شاقىرۋعا دەيىنگى جاستاردىڭ اسكەري-پاتريوتتىق تاربيەسىن جەتىلدىرۋ ماقساتىندا 2015 جىلى ەلوردادا قارۋلى كۇشتەردىڭ ۇلتتىق اسكەري-پاتريوتتىق ورتالىعى اشىلدى. ورتالىق بۇگىندە اسكەري قىزمەتشىلەر مەن اسكەرگە شاقىرۋعا دەيىنگى جاستاردى اسكەري-پاتريوتتىق تاربيەلەۋدىڭ ۇيلەستىرۋشى ورگانى بولىپ وتىر.

قورعانىس ۆەدومستۆوسى وقۋشىلار مەن جاستار اراسىندا اسكەري-پاتريوتتىق تاربيەنى كۇشەيتۋ ماقساتىندا «جاس سارباز» بالالار مەن جاسوسپىرىمدەردىڭ اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىن قۇردى. قازىرگى ۋاقىتتا قوزعالىس فيليالدارى ەلىمىزدىڭ بارلىق وڭىرىندە اشىلعان.

«جاس سارباز» قوزعالىسىنىڭ بازاسىندا 6 مىڭنان استام تاربيەلەنۋشىنى قامتيتىن ءتورت جۇزگە جۋىق «سمارت-سارباز» ۇيىرمەسى جۇمىس ىستەيدى. بۇل ۇيىرمەلەردە پاتريوتتىق ءىس-شارالاردان بولەك, بالالار يننوۆاتسيالاردى يگەرىپ, وزدەرىنىڭ تەحنيكالىق يدەيالارىن جۇزەگە اسىرا الادى.

وتكەن جىلى ەلوردادا وتكەن «ەگەمەن ەلدىڭ ەرتەڭى – جاس سارباز» اتتى جاس پاتريوتتاردىڭ ءبىرىنشى فورۋمى اياسىندا «جاس سارباز» رەسپۋبليكالىق اسكەري-پاتريوتتىق قوزعالىسىنىڭ قىزمەتى تانىستىرىلىپ, جيىن جەڭىمپازدارىن ماراپاتتاۋ ءراسىمى ۇيىمداستىرىلدى. تۇركىستان وبلىسىنا «پاتريوتتار مەكەنى» اۋىس­پالى كۋبوگى تابىستالدى.

اسكەري قىزمەتشىلەر «ەرلىك ساباق­تارى» مەن «اشىق ەسىك كۇندەرىن» ءداستۇرلى تۇردە وتكىزىپ تۇرادى. بىلتىر قارۋلى كۇشتەردىڭ 30 جىلدىعىنا وراي ەلىمىزدەگى 931 مەكتەپتە «ەرلىك ساباقتارى» ءوتىپ, اسكەري بولىمدەردە 8 مىڭنان استام بالانى تارتا وتىرىپ, مىڭعا جۋىق «اشىق ەسىك كۇنى» ۇيىمداستىرىلدى.

اتالعان شارالاردىڭ ءبارى جاستار­دى اسكەر-پاتريوتتىق تاربيەلەۋ جۇمىس­تارىن ودان ءارى جەتىلدىرۋگە, وسكە­لەڭ ۇرپاقتىڭ بويىندا ءوز وتانىن قور­عاۋعا دايىن ەل ازاماتىنىڭ جوعارى پاتريوتتىق سەزىمى مەن ونەگەلىك قاسيەت­تەرىن قالىپتاستىرۋدى كوزدەيدى.

ءىس-شارالاردىڭ ىشىندەگى ەڭ اۋ­قىمدىسى – جىل سايىن وتكىزىلەتىن «ايبىن» جيىنى. 2019 جىلى وتكەن مەرەيتويلىق اسكەري-پاتريوتتىق جيىن­نىڭ اشىلۋىنا پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ قاتىستى. جيىندا مەملەكەت باسشىسى «جاس سارباز» قوزعالىسىنىڭ تاربيەلەنۋشىلەرىمەن بىرگە « ۇلى دالا جاس ساربازى-2050» ۋاقىت كاپسۋلاسىن سالعانىن ەرەكشە اتاپ ءوتۋ كەرەك.

– اسكەري قىزمەتشىلەردى پات­ريوت­تىق تۇرعىدا تاربيەلەۋ – تار­بيە­شى وفيتسەرلەرگە جۇكتەلگەن نەگىزگى مىن­دەت­تەردىڭ ءبىرى. ال پاتريوتيزم قاي جاع­داي­دا بايقالۋى ءتيىس؟

– پاتريوتيزم – ءوز ىسىمەن وتانعا دەگەن سۇيىسپەنشىلىگىن دالەلدەي ءبىلۋ. قا­زاقستانداعى ءپاتريوتيزمنىڭ باستاۋى ءبىزدىڭ ارعى تاريحىمىزدا جاتىر. اس­كەري قىزمەتشىلەر مەن جاستاردى تا­ريح­تى بىلۋگە باۋلۋ, ولاردى اتا-بابا­دان قالعان امانات – حالقىمىزدىڭ مىز­عىماس اۋىزبىرشىلىگى مەن ۇلان-عايىر جەرىن قورعاۋعا ارقاشان دايى­ن بولۋعا تاربيەلەۋ كۇن تارتىبىنەن تۇس­كەن ەمەس.

ەلى مەن جەردى قورعاۋ جولىنداعى قازاق ساربازدارىنىڭ قايتالانباس ەرلىگىن, وتانىن جانىنداي ءسۇيىپ, كوزىنىڭ قاراشىعىنداي قورعايتىنىن دۇشپاندار دا مويىنداعان. «پاتريوتيزم – وتانعا, ەلگە دەگەن ماحاببات!», «ادام بولۋ – قاسيەت, ازامات بولۋ – مىندەت, پاتريوت بولۋ – پارىز», دەگەن باۋىرجان مومىش­ ۇلىنىڭ سوزدەرى بار.

پاتريوتيزم وتاندى سۇيۋدە, وعان قالتقىسىز قىزمەت ەتۋدە, ەل ءۇشىن قانداي دا ءبىر جەتىستىككە جەتۋدە, حالقىمىزدىڭ اتىن الەمگە پاش ەتۋدە ايقىن كورىنەدى.

قازىرگى قارۋلى كۇشتەردىڭ بارلىق سالاسىندا تاربيە مەن يدەولوگيانىڭ اتقارىپ جاتقان جۇمىسى ولشەۋسىز. يدەولوگيا جوق جەردە اسكەردىڭ باعىتى, باعدارى ايقىن بولمايدى. ويتكەنى ءتارتىپ بار جەردە تاربيە بولادى. سول سەبەپتى اسكەري قىزمەتشىلەرگە بەرىلەتىن پاتريوتتىق تاربيە مەن يدەولوگيانىڭ اسكەردەگى ورنى قاشاندا بولەك.

– اڭگىمەڭىزگە راحمەت.

 

اڭگىمەلەسكەن

ورالحان احماديا,

«Egemen Qazaqstan»