كاۆەنديش «استانانىڭ» جەيدەسىن كيدى

جوعارىداعى جاڭالىقتى جەرگىلىكتى جانكۇيەرلەر جىلى قابىلدادى. سەبەبى كاۆەنديشتىڭ قانداي مىقتى سپورتشى ەكە­نىن جۇرت جاقسى بىلەدى. 1985 جىلدىڭ 21 مامىرىندا يرلان­ديا تەڭىزىندەگى مەن ارالىندا دۇنيەگە كەلگەن ماركتىڭ ۆەلو­سپورتتا باعىندىرماعان بەلەسى كەمدە-كەم. ول – ريو-دە-جا­نەيرو وليمپياداسىنىڭ كۇمىس جۇلدەگەرى (2016 جىلى), ءتورت دۇركىن الەم چەمپيونى (2005, 2008, 2011, 2016), دوس­تاستىق ويىندارىنىڭ جەڭىم­پازى (2006). مارك «تۋر دە فرانس», «دجيرو د’يتاليا» جانە «يسپانيا ۆۋەلتاسى» سەكىلدى ەڭ بەلدى ءارى مارتەبەلى جا­رىستاردىڭ بارلىعىندا ەڭ ۇزدىك سپرينتەرگە تيەسىلى ارنايى سىيلىقتاردى يەلەندى. سونداي-اق فرانتسياداعى كوپ­كۇندىكتىڭ 34 كەزەڭىندە توپ جارىپ, وسى كورسەتكىش جاعىنان حح عاسىردىڭ الپىسىنشى جانە جەتپىسىنشى جىلدارى اتوي سالعان بەلگيانىڭ اتى اڭىزعا اينالعان ۆەلوشاباندوزى ەددي مەركسپەن تەڭەستى.

– مارك كاۆەنديشتى تانىستىرىپ جاتۋ­دىڭ ەش قاجەتى جوق دەپ ويلايمىن. ول ۆەلوسپورت تاريحىنداعى ەڭ ۇزدىك سپرينتەر ەكەنى ەش داۋ تۋعىزباسا كەرەك. وسىنداي مىقتى سپورتشىنىڭ «استانا» كلۋبىنىڭ قاتارىنا قوسىلعانىنا مەن ءدان ريزامىن. كاۆەنديش قاي جارىسقا قاتىسسا دا تەك جەڭىسكە جەتۋدى كوزدەيدى. «استانانىڭ» دا ماقساتى سول. سوندىقتان دا الداعى ماۋسىمدا ءبىز جارقىن جەڭىستەرىمىزبەن ءوز جانكۇيەرلەرىمىزدى قۋانتۋ ءۇشىن ەش ايانىپ قالمايمىز, – دەيدى «استانا» كلۋبىنىڭ باس مەنەدجەرى, وليمپيادا چەم­پيو­نى الەكساندر ۆينوكۋروۆ.

بيىل كوكتەمدە مارك 38 جاسقا تولادى. سوعان قاراماستان ول ءالى دە بابىندا. بىلتىرعى ماۋسىمدا كاۆەنديشتىڭ «مي­لان-تۋرين» دوداسىندا دارا شىعىپ, «دجيرو د’يتاليا», «ومان تۋرى» جانە ء«باا تۋرى» سەكىلدى جارىستاردىڭ كەزەڭدىك سايىستارىندا جەڭىمپاز اتانۋى وسى ءسوزىمىزدىڭ ايقىن دالەلى.