قارا التىننىڭ قۇت قامباسى سانالاتىن اتىراۋ توپىراعىنىڭ داڭقتى پەرزەنتى, ارداگەر مۇنايشى ەمبى كەنىشتەرىنىڭ اشىلۋىنا اتسالىسقان بەلگىلى گەولوگ, مەملەكەتتىك سىيلىعىنىڭ لاۋرەاتى ورىنعازى ەسقازيەۆ باقيعا وزدى دەگەن قارالى حاباردى ەستىپ, ءداۋىر كوشكەندەي كۇيدە وتىرمىن.
اياۋلى ورەكەڭ 1957 جىلى س.م.كيروۆ اتىنداعى قازاق مەملەكەتتىك (قازىرگى ءال-فارابي اتىنداعى قازاق ۇلتتىق) ۋنيۆەرسيتەتىن گەولوگيا ماماندىعى بويىنشا ءتامامداپ, ەڭبەك جولىن اتىراۋ وڭىرىندەگى «ەمبىمۇناي» بىرلەستىگىنە قاراستى «قوشقار» مۇناي ونەركاسىبى باسقارماسىندا مۇناي ءوندىرۋ جونىندەگى وپەراتور قىزمەتىنەن باستاپ, اتاۋلى بىرلەستىكتە قىرىق جىل ەڭبەك ەتتى. اتىراۋ ايماعىنىڭ جازداعى بەت كۇيدىرەتىن اڭىزاق-ىستىق جەلى مەن قىستاعى بوراندى ايازىنا, تابيعاتتىڭ كەز كەلگەن قاتال مىنەزىنە قارسى تۇرىپ, كەن ورنىن كەزىپ ءجۇرىپ, جەر استىنداعى بايلىقتى بارلاۋ وڭاي شارۋا ەمەس. ەڭبەك ادامىن بولاتتاي شىڭدايتىن اۋىر كاسىپتىڭ قىر-سىرىن مەڭگەرىپ, تۋعان ەلىنىڭ كوركەيىپ, دامۋىنا ۇلەس قوسقان بايلىقتىڭ كوزىن اشۋ ورىنعازى ەسقازيەۆتىڭ ومىرلىك ىسىنە اينالدى.
جاس مامان قوشقار مۇناي ءوندىرۋ كاسىپشىلىگىندە مۇناي ءوندىرۋ جانە قابات قىسىمىن ساقتاۋ وپەراتورى قىزمەتىنەن باستاپ, ۇڭعىمالاردى زەرتتەۋ بريگاداسىنىڭ شەبەرى, قوشقار كەن الاڭىنىڭ گەولوگى, كومسومول مۇناي ءوندىرۋ كاسىپشىلىگىنىڭ اعا گەولوگى, «پرورۆامۇناي» مۇناي-گاز ءوندىرۋ باسقارماسى باس گەولوگى بولىپ ەڭبەك ەتتى.
قازاق مۇنايىنىڭ ارداقتىلارىنا ارنالعان ەڭبەكتە ارىپتەستەرىنىڭ اراسىندا اسا قۇرمەتكە يە بولعان گەولوگ ورىنعازى ەسقازيەۆتىڭ كاسىبي بىلىكتىلىگىن كەلەسىدەي سيپاتتايدى: ء«وزىنىڭ ۇجىمداس جولداستارىمەن بىرگە قويان-قولتىق ەڭبەك بارىسىندا ولارعا عىلىمي تۇسىنىك بەرۋ, اقىل-كەڭەس ايتۋ ارقىلى ورىنعازى العا قويعان ماقساتقا جەتۋ جولىندا جان اياماي تەر توكتى, ماماندىعىن وزدىگىنەن جەتىلدىرىپ, شەتەلدىك تاجىريبەنى ۇيرەندى, وزىنە باسشىلىق ەتكەن تىسقاقتى مامانداردىڭ ايتقان پىكىر-ۇسىنىستارىن ەسكەرۋسىز قالدىرمادى, ساناسىنا توقىدى».
مۇناي كەنىشتەرىندە جيىرما جىلعا جۋىق قىزمەت ەتىپ, گەولوگيا مەن بارلاۋ ءىسىنىڭ قىر-سىرىن قازبا ورنىندا ءجۇرىپ مەڭگەرىپ, ءبىلىم مەن تاجىريبەدە قاتار شىڭدالعان بىلىكتى مامانعا قالاداعى «ەمبىمۇناي» بىرلەستىگىنىڭ گەولوگيا ءبولىمىن باسقارۋ سەنىپ تاپسىرىلدى. ورىنعازى ەسقازيەۆ ءوز سوزىندە بۇل قىزمەتتە نەگىزگى جۇمىسى – مۇناي قورىن كوبەيتۋ بولعانىن ايتادى. «ەندىگى جەردە اتالعان بىرلەستىكتىڭ بۇكىل گەولوگيالىق جۇمىستارىن باسقارۋ, مۇناي مينيسترلىگى مەن ەكى ورتاداعى كۇللى قاتىناس قاعازدارىن ازۋ, كۇنبە-كۇن تەلەفون ارقىلى وندىرىستەگى ءاربىر بارلاۋ ۇڭعىلارىنىڭ جاعدايىن حابارلاۋ, باسقا دا قوسالقى جۇمىستاردى رەتتەۋ – وسىنىڭ ءبارى مەنىڭ موينىمدا. گەولوگيا ءبولىمىنىڭ نەگىزگى كوپشىلىك جۇمىسى – گەولوگيالىق بارلاۋ, گەوفيزيكالىق زەرتتەۋ, وسىلايشا بىرلەستىكتىڭ بولاشاعىن كەڭەيتىپ, جىلدان جىلعا مۇناي قورىن كوبەيتۋ», – دەدى و. ەسقازيەۆ.
اتالعان قىزمەتتە ءجۇرىپ, ارىپتەستەرىمەن بىرگە ەلىمىزدەگى الىپ كەشەندەردىڭ ءبىرى «تەڭىز» تۇبىندە مول مۇناي قورى بارىن انىقتاپ, ەڭبەك جولىنداعى ەلەۋلى جەتىستىكتەردىڭ بىرىنە قول جەتكىزدى. قاجىرلى ەڭبەگى مەن ۇزاق جىلدار بويى جيناعان ءبىلىمى مەن بىلىكتىلىگىنىڭ ارقاسىندا قازاقستان رەسپۋبليكاسى مەملەكەتتىك سىيلىعىنىڭ لاۋرەاتى اتانىپ, ارنايى ءتوس بەلگىمەن ماراپاتتالدى. جەر قويناۋىنىڭ قۇرمەتتى بارلاۋشىسى ورىنعازى ەسقازيەۆ رەسپۋبليكا دەڭگەيىندە عانا ەمەس, كەڭەس وداعىنا بەلگىلى مايتالمان مۇنايشىلار قاتارىندا بولدى.
مۇنايلى مەكەن اتىراۋ وڭىرىندە ماماندىق تاڭداردا اتا كاسىپتى جالعاپ, مۇناي سالاسىندا ۇرپاق ساباقتاستىعى قاعيداتتارىن ۇستانعان مۇنايشى ديناستيالارى بارشىلىق. ەسقازيەۆتەر اۋلەتى دە بۇل داستۇردەن الشاقتامادى. «اكە كورگەن – وق جونار...» دەگەن حالىق دانالىعىمەن ورىنعازى اقساقالدىڭ ۇلى قۇرمانعازى ەسقازيەۆ تە مۇناي سالاسىنا ەتەنە ارالاسىپ, ەلىمىزدەگى جەتەكشى «قازمۇنايگاز» ۇلتتىق كومپانياسىنىڭ باسقارما توراعاسىنىڭ بارلاۋ جانە ءوندىرۋ جونىندەگى ورىنباسارى رەتىندە جاۋاپتى مىندەتتى اتقارىپ كەلەدى.
ورىنعازى ەسقازيەۆ – سانالى عۇمىرىن ەل يگىلىگى جولىندا قىزمەت ەتۋگە ارناپ, وتاندىق مۇناي-گاز سالاسىنىڭ قالىپتاسىپ, ودان ءارى دامۋىنا زور ۇلەس قوسقان تۇلعا. ابىرويى اسقاق مۇنايشى ورىنعازى ەسقازيەۆتىڭ عيبراتتى عۇمىرى, تابىستى ەڭبەك جولى – ۇرپاقتارى مەن جاس مۇنايشىلارعا ۇلگى بولىپ قالا بەرمەك.
ماحامبەت باتىرباەۆ,
مۇناي-گاز سالاسىنىڭ ارداگەرى, مەملەكەتتىك سىيلىقتىڭ لاۋرەاتى