2023 جىلعى 14 قانتاردا ەلدىڭ بارلىق وبلىستارىندا, سونداي-اق استانا, الماتى جانە شىمكەنت قالالارىندا قازاقستان رەسپۋبليكاسى پارلامەنتى سەناتىنىڭ 20 دەپۋتاتىنىڭ سايلاۋى وتەدى, دەپ حابارلايدى Egemen.kz.
پارلامەنت سەناتىنىڭ دەپۋتاتتارىن جاناما سايلاۋ قۇقىعى نەگىزىندە جاسىرىن داۋىس بەرۋ ارقىلى تاڭداۋشىلار - ءماسليحاتتاردىڭ دەپۋتاتتارى بولىپ تابىلاتىن رەسپۋبليكا ازاماتتارىن سايلايدى.
سەنات دەپۋتاتتارىنىڭ سايلاۋى ەلىمىزدىڭ بارلىق وڭىرلەرىندە (استانا ۋاقىتى بويىنشا) ساعات 11.00-دە باستالاتىن تاڭداۋشىلاردىڭ بىرلەسكەن وتىرىستارىندا وتكىزىلەدى.
پارلامەنت سەناتىنداعى 20 ورىنعا 55 كانديدات ۇمىتكەر بولىپ وتىر.
رەسپۋبليكا بويىنشا تاڭداۋشىلار تىزىمىنە 3167 ماسليحات دەپۋتاتى ەنگىزىلگەن.
ورتالىق سايلاۋ كوميسسياسىنىڭ ينتەرنەت-رەسۋرسىندا داۋىس بەرۋ كۇنى ونلاين باقىلاۋ سەرۆيستەرى جۇمىس ىستەيتىن بولادى.