سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ دەپۋتاتتارى سوت جۇيەسىن دامىتۋ مەن جەتىلدىرۋ ماسەلەلەرىن جوعارعى سوتتىڭ باسشىلىعىمەن بىرگە تالقىلادى.
كوميتەت توراعاسى ۆلاديمير ۆولكوۆ وتىرىس بارىسىندا پارلامەنت سوڭعى 3 جىلدا سوت جۇيەسىن جاڭعىرتۋعا باعىتتالعان سوت تورەلىگى سالاسىندا 30-دان استام زاڭ قابىلداعانىن اتاپ ءوتتى.
«مەملەكەت باسشىسى سوت جۇيەسىن رەفورمالاۋدا ايتارلىقتاي ىلگەرىلەۋگە قول جەتكىزۋ ءۇشىن سۋديالاردىڭ كاسىبيلىگىنە, سوت تورەلىگىنىڭ ساپاسىنا جانە سوت ءىسىن باسقارۋعا باعىتتالعان تۇبەگەيلى جاڭا كوزقاراستاردى بەلگىلەۋ قاجەت دەپ سانايدى. بۇل ءۇشىن سوت كورپۋسىن جاڭارتۋ جانە جەتىلدىرۋ كەرەك. سۋديالار جوعارى بىلىكتى جانە ادال بولۋى كەرەك», دەدى ۆلاديمير ۆولكوۆ.
سەناتور قاناتبەك سافينوۆ پارلامەنت سەناتىنىڭ توراعاسى ماۋلەن اشىمباەۆتىڭ تاپسىرماسى بويىنشا سوت جۇيەسىن رەفورمالاۋ جونىندەگى جۇمىس توبىنىڭ 30-دان استام وتىرىسى وتكەنىن جانە وندا مەملەكەتتىك ورگانداردىڭ, زاڭ قوعامداستىعىنىڭ وكىلدەرى مەن عالىمداردىڭ 350-گە جۋىق ۇسىنىسى قارالعانىن ايتتى. ۇسىنىستاردى ەسكەرە وتىرىپ, «قازاقستان رەسپۋبليكاسىنىڭ سوت جۇيەسى جانە سۋديالارىنىڭ مارتەبەسى تۋرالى» كونستيتۋتسيالىق زاڭ جوباسى جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پروتسەستىك زاڭنامانى جەتىلدىرۋ جانە سوت جۇيەسىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنگەن بولاتىن.
كونستيتۋتسيالىق زاڭ جوباسىنا ەنگىزىلگەن تۇزەتۋلەر نەگىزىنەن سۋديالاردىڭ تاۋەلسىزدىگىن نىعايتۋعا, ولاردىڭ جۇمىس ساپاسىن ارتتىرۋعا, جوعارعى سوت كەڭەسىنىڭ ءرولىن كۇشەيتۋگە جانە وعان جوعارعى سوت فۋنكتسيالارىنىڭ ءبىر بولىگىن بەرۋگە بايلانىستى. اتاپ ايتقاندا, سۋديالىققا كانديداتتاردى دايارلاۋ, ولاردىڭ بىلىكتىلىگىن ارتتىرۋ, سۋديالىق قىزمەتتە بولۋ جاسىن ۇزارتۋ, سۋديالاردىڭ مىندەتىن اتقارۋشىلاردىڭ وكىلەتىن توقتاتا تۇرۋ جانە توقتاتۋ ماسەلەلەرى. جوعارعى سوت كەڭەسىنىڭ قاراماعىنا سوت تورەلىگى اكادەمياسىن بەرۋ ۇسىنىلىپ وتىر.
ەكىنشى زاڭ جوباسى اپەللياتسيالىق ساتىداعى سوتتا ءىس جۇرگىزۋ ءتارتىبىن رەتتەيتىن ازاماتتىق ءىس جۇرگىزۋ كودەكسىنىڭ نورمالارىنا وزگەرىستەر ەنگىزۋدى كوزدەيدى. ۇسىنىلعان جاڭالىقتارعا سايكەس اپەللياتسيالىق سوت ءىستى ءبىرىنشى ساتىداعى سوتتىڭ ەرەجەلەرى بويىنشا قاراۋعا قۇقىلى. اتالعان وزگەرىستەر قاعازباستىلىقتى ازايتىپ, داۋلى قۇقىقتىق قاتىناستار سۋبەكتىلەرىنىڭ بۇزىلعان قۇقىقتارىن جىلدام قالپىنا كەلتىرۋگە مۇمكىندىك بەرەدى.
ادىلدىك قاعيداتىن ەنگىزۋدى ەسكەرە وتىرىپ جانە ءادىل سوت تورەلىگىن قامتاماسىز ەتۋ ماقساتىندا زاڭدىلىق پەن نەگىزدىلىك تالاپتارىمەن قاتار شەشىمنىڭ ادىلدىگى تۋرالى تالاپتى ەنگىزۋ ۇسىنىلادى.
ازاماتتىق ءىس جۇرگىزۋ كودەكسىنە ەنگىزىلگەن تۇزەتۋلەردىڭ ءبىر بولىگى ازاماتتىق ۇدەرىستە سوت وكىلدىگى ينستيتۋتىنىڭ ءتيىمدى جۇمىس ىستەۋى ماقساتىندا ولاردىڭ ءىس جۇرگىزۋ قۇقىقتارى مەن مىندەتتەرىن بەكىتۋ ارقىلى سوت وكىلدەرىنىڭ مارتەبەسىن قۇقىقتىق رەتتەۋدى جەتىلدىرۋگە باعىتتالعان. ەكىنشى زاڭ جوباسىندا سوت جۇيەسىن ودان ءارى دامىتۋعا باعىتتالعان وزگە دە تۇزەتۋلەر قاراستىرىلعان.
جيىندا جوعارعى سوت توراعاسى اسلامبەك مەرعاليەۆ پەن ازاماتتىق ىستەر جونىندەگى سوت القاسىنىڭ توراعاسى نۇرسەرىك ءشارىپوۆ تە ءسوز سويلەدى. سەناتورلار وتىرىستى قورىتىندىلاي كەلە, سوت جۇيەسىن رەفورمالاۋ بويىنشا جۇمىستى ودان ءارى جالعاستىرۋدىڭ ماڭىزدىلىعىن اتاپ ءوتتى.