الماتى وبلىسى قحا حاتشىلىعىنىڭ جاڭا باسشىسى تاعايىندالدى

ونىڭ قۇزىرەتىنە وڭىردەگى مەملەكەتتىك ەتنوسارالىق جانە دياسپورالىق ساياساتتى جۇزەگە اسىرۋ مەن «قوعامدىق كەلىسىم» كمم-ءنىڭ قىزمەتىن ۇيلەستىرۋ كىرەدى.

جاندار اسان 1990 جىلعى 12 مامىردا قازىرگى تۇركىستان وبلىسىنىڭ تۇلكىباس اۋدانىندا تۋعان.

2011 جىلى ءال-فارابي اتىنداعى قازاق ۇلتتىق ۋنيۆەرسيتەتىن «قازاق ءتىلى مەن ادەبيەتى» ماماندىعى بويىنشا ۇزدىك بىتىرگەن.

2014 جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ماگيستراتۋرا جانە PhD دوكتورانتۋرا ينستيتۋتىن «ادەبيەتتانۋ» ماماندىعى بويىنشا ۇزدىك تامامداعان.

گۋمانيتارلىق عىلىمدار ماگيسترى. تۇركيانىڭ جانە پولشانىڭ جەتەكشى جوعارى وقۋ ورىندارىندا عىلىمي تاعىلىمدامالاردان وتكەن.

ەڭبەك جولىن 2011 جىلى باسپا كورپوراتسياسىنىڭ باس رەداكتورى رەتىندە باستاعان.

2012-2014 جىلدارى ارالىعىندا – «كتك» تەلەارناسىنىڭ رەداكتور-ءتىلشىسى, «حابار 24» تەلەارناسىنىڭ باعدارلاما رەداكتورى-جۇرگىزۋشىسى, «شامشىراق» قوعامدىق-ساياسي گازەتىنىڭ باس رەداكتورىنىڭ ورىنباسارى-جاۋاپتى حاتشىسى.

2014-2017 جىلدارى – تاراز مەملەكەتتىك پەداگوگيكالىق ۋنيۆەرسيتەتى رەكتورىنىڭ ءباسپاسوز حاتشىسى, رەكتور اپپاراتىنىڭ باسشىسى, اقپاراتتىق-يميدجدىك ورتالىعىنىڭ باسشىسى.

2017-2022 جىلدارى – قازاق ۇلتتىق قىزدار پەداگوگيكالىق ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ باسشىسى, ماركەتينگ جانە كوممۋنيكاتسيا دەپارتامەنتىنىڭ ديرەكتورى.

2022 جىلدىڭ قاراشا ايىنان باستاپ الماتى وبلىسىنىڭ تىلدەردى دامىتۋ باسقارماسىنىڭ ءبولىم باسشىسى م.ا. قىزمەتىن اتقاردى.

ايتا كەتسەك, جاندار اسان بىرنەشە دەرەكتى ءفيلمنىڭ جانە ەنتسيكلوپەديالىق جيناقتىڭ اۆتورى.

وتاندىق جانە شەتەلدىك عىلىمي جۋرنالداردا 20-عا جۋىق عىلىمي ماقالاسى شىققان. رەسپۋبليكالىق بەدەلدى باسىلىمداردا 500-دەن استام پۋبليتسيستيكالىق ماقالاسى جارىق كورگەن.