قوستانايلىق جولشىلار تاجىكستاننىڭ 18 ازاماتىن تاسجولدان ەۆاكۋاتسيالادى, دەپ حابارلايدى Egemen.kz.
«جولشىلار 10 قاڭتار كۇنى ساعات 8:30 شاماسىندا ا22 «قارابۇتاق-قوستاناي» كۇرە جولىندا ديزەل وتىنىمەن جۇرەتىن شاعىن اۆتوبۋستان تاجىكستان رەسپۋبليكاسىنىڭ 18 ازاماتىن ەۆاكۋاتسيالادى. كومەك كورسەتىلگەندەردىڭ بەسەۋى - بالا. قازاۆتوجول قىزمەتكەرلەرى شەتەل ازاماتتارىن جىلىتۋ پۋنكتىنە جەتكىزىپ, ىستىق تاماقپەن قامتاماسىز ەتتى», دەلىنگەن قازاۆتوجول حابارلاماسىندا.
شاعىن اۆتوبۋس ا22 «قارابۇتاق-قوستاناي» تاسجولىندا اقتوبە وبلىسىنان تيۋمەن قالاسىنا قاراي بەت العان. كولىك بلوكپوستقا جەتكەندە الداعى جول ۋچاسكەسىندە اۋا تەمپەراتۋراسىنىڭ تومەندەۋىنە بايلانىستى ديزەلمەن جۇرەتىن كولىكتەردىڭ قوزعالىسىنا شەكتەۋ ەنگىزىلگەندىگى انىقتالدى.
جولشىلار شاعىن اۆتوبۋستاعى ديزەل وتىنىنىڭ قاتۋىنا جول بەرمەۋ جانە ادامداردىڭ قاۋىپسىزدىگىن قامتاماسىز ەتۋ ماقساتىندا تاجىكستان ازاماتتارىن جاقىن ماڭداعى جىلىتۋ پۋنكتىنە جەتكىزدى. جولاۋشىلار كۇن رايى جاقسارعانشا جىلىتۋ پۋنكتىندە بولدى.
قازىرگى ۋاقىتتا كۇن رايىنىڭ جاقسارىپ, تاسجولدىڭ اشىلعاندىعىنا وراي شاعىن اۆتوبۋس ساپارىن جالعاستىرۋعا شىقتى. تاجىكستان ازاماتتارى قازاقستاندىق جولشىلارعا كورسەتكەن كومەگى ءۇشىن العىس ءبىلدىردى.