استانا قالالىق پوليتسيا دەپارتامەنتىنە قاراستى كوشى-قون قىزمەتى باسقارماسى قازاقستان ازاماتتىعىن العان ادامدار جايلى جاڭا دەرەكتەردى ۇسىندى, دەپ حابارلايدى Egemen.kz.
«قازاقستان ازاماتتىعىن 1281 ادام الدى. ونىڭ ىشىندە مەملەكەت باسشىسى قاسىم-جومارت توقاەۆتىڭ جارلىعىمەن – 157 ادام, وڭايلاتىلعان ءتارتىپ ارقىلى – 1124 ادام قازاقستان ازاماتتىعىن الدى, ونىڭ ىشىندە 892 ادام - ەتنيكالىق قازاقتار, 389 ادام - باسقا ۇلت وكىلدەرى. 2022 جىلى قازاقستان ازاماتتىعىنان شىعۋعا ءوتىنىش بىلدىرگەندەر بولعان جوق», دەدى كوشى-قون قىزمەتى باستىعىنىڭ ورىنباسارى انار جومارتوۆا.
باسقارما باسشىسى ورىنباسارىنىڭ ايتۋىنشا, قوس ازاماتتىقپەن كۇرەس ناتيجەسىندە 753 ادام قازاقستان ازاماتتىعىنان ايىرىلسا, قازاقستان رەسپۋبليكاسىنىڭ بۇرىنعى 43 ازاماتى اكىمشىلىك جاۋاپكەرشىلىككە تارتىلعان.
«كوشى-قون قىزمەتى زاڭسىز كوشى-قونمەن كۇرەسۋمەن قاتار, مەملەكەتتىك قىزمەتتىڭ 11 ءتۇرىن كورسەتەدى, بۇگىنگى تاڭدا ونىڭ 85%-دان استامى اۆتوماتتاندىرىلعان. ماسەلەن, 2022 جىلى 635 مىڭعا جۋىق مەملەكەتتىك قىزمەت كورسەتىلدى, ونىڭ ىشىندە 356 مىڭى مەملەكەتتىك كورپوراتسيا ارقىلى; 42 مىڭى ىشكى ىستەر مينيسترلىگىنىڭ اقپاراتتىق جۇيەلەرى ارقىلى; 16 مىڭى قاعاز تۇرىندە جۇزەگە اسىرىلدى», دەدى انار جومارتوۆا.
بۇدان بۇرىن حابارلانعانداي, 2022 جىلدىڭ سوڭىندا استانادا 42 762 ادامدى قۇرايتىن ۋاقىتشا تىركەلگەن شەتەل ازاماتتارىنىڭ جوعارى سەرپىنى بايقالدى, بۇل 2021 جىلمەن سالىستىرعاندا 30%-عا ارتىق.