قۇرىلىس – ۇلتتىق ەكونوميكاداعى قارقىندى دامىپ كەلە جاتقان جۇيە قۇراۋشى سالالاردىڭ ءبىرى. ونىڭ وركەندەۋى ەكونوميكاداعى باسقا دا سەكتورلاردىڭ تامىرىنا قان جۇگىرتۋگە قاۋقارلى. ماسەلەن, 2022 جىلدىڭ 11 ايىندا رەسپۋبليكا بويىنشا قۇرىلىس جۇمىستارىنىڭ كولەمى 4,9 ترلن تەڭگەگە جەتتى.
تۇتاستاي العاندا, ەل بويىنشا 47 مىڭنان استام كاسىپورىننىڭ قۇرىلىس-مونتاج جۇمىستارىنا ليتسەنزياسى بار. ونىڭ ىشىندە 46 مىڭعا جۋىعى ناقتى جۇمىس ىستەپ كەلەدى.
ەسكە سالا كەتەيىك, پرەزيدەنت قاسىم-جومارت توقاەۆتىڭ تاپسىرماسى بويىنشا قالالاردى كەشەندى سالۋ ستاندارتتارىنىڭ ادىستەمەلىك قۇجاتى قابىلدانىپ, زاماناۋي قوعامدىق كەڭىستىكتەر مەن ينفراقۇرىلىمدى قالىپتاستىرۋ بويىنشا قاراپايىم جانە كورنەكى قۇرالعا اينالماق.
ستاندارتتاردى ىسكە اسىرۋ ءۇشىن اكىمدىكتەر شاعىن ساۋلەت نىساندارى مەن اباتتاندىرۋدى قولدانا وتىرىپ, قالالاردىڭ زاماناۋي كەلبەتىنىڭ ديزاين كودتارىن ازىرلەيتىن بولادى. قالا قۇرىلىسىن جوسپارلاۋدىڭ جۇيەلى شەشىمىنە كەلسەك, بىرىڭعاي اقپاراتتىق كەڭىستىكتە مونيتورينگتىڭ جاڭا تاسىلدەرى مەن تەتىكتەرى ەنگىزىلىپ جاتقانىن اتاپ وتكەن ءجون.
وسى رەتتە قالا قۇرىلىسى كاداسترى جۇيەسىنىڭ قىزمەتى قۇرىلىستى ءتيىمدى جوسپارلاۋدىڭ جانە قالا قۇرىلىسى باعىتىنداعى اشىقتىقتى قامتيتىن نەگىزگى قۇرالداردىڭ ءبىرى بولادى دەپ كوزدەلىپ وتىر.
زاڭنامالىق دەڭگەيدە اۋماقتاردى سالۋدى كەشەندى تسيفرلى باسقارۋ ءۇشىن بىرىڭعاي قالا قۇرىلىسى ساراپتاماسىن ەنگىزىپ, قالا قۇرىلىسى جوبالارىن, ينجەنەرلىك-گەودەزيالىق ىزدەنىستەردى ەسەپكە الۋ, ينجەنەرلىك جەلىلەر مەن ولاردىڭ قۋاتتارى بويىنشا تابيعي مونوپوليالار سۋبەكتىلەرىنىڭ دەرەكتەرىن قالا كاداسترى جۇيەسىنە ەنگىزۋ ماسەلەسى پىسىقتالىپ جاتىر.
قۇرىلىستىڭ سمەتالىق قۇنىنىڭ ارتۋىنا جول بەرمەۋ ءۇشىن جوبالاۋ-سمەتالىق قۇجاتتامادا پرايس-پاراقتاردى قولدانۋ تەتىگى الىنىپ تاستالدى. وسى ارقىلى جۇمىس تۇرلەرى مەن كونسترۋكتيۆتەر بويىنشا اۋقىمدى نورمالاردى قولدانىپ, سمەتالاردى ەسەپتەۋدىڭ زاماناۋي ءادىسى ەنگىزىلدى. بىرىڭعاي سمەتالىق باعالاردىڭ جيناقتارى ازىرلەنىپ, بۇل سمەتالىق قۇجاتتامانى دايىنداۋدىڭ كۇردەلىلىگىن ازايتۋ مەن ولاردى ساراپتاۋ پروتسەسىن جەڭىلدەتپەك.
سونداي-اق قۇرىلىستىڭ ساپاسى مەن ونىڭ اشىقتىعىن باقىلاۋدى كۇشەيتۋگە ارنالعان بىرىڭعاي قۇرىلىس پورتالىن ازىرلەۋ قولعا الىنعانىن اتاپ ءوتۋ قاجەت. بۇل شارالار قۇرىلىستىڭ بارلىق قاتىسۋشىسىنا قاتىستى دەرەكتى بىرىڭعاي تسيفرلى ورتادا جيناقتاۋعا سەپتىگىن تيگىزەدى.
ازاماتتاردىڭ تۇرعىن ءۇي ماسەلەلەرىن شەشۋ ءۇشىن بىلتىرعى 11 ايدىڭ قورىتىندىسى بويىنشا 13 ملن شارشى مەتر باسپانا پايدالانۋعا بەرىلدى. سونىمەن قاتار 13,8 مىڭ جالعا بەرىلەتىن جانە كرەديتتىك پاتەر سالىنىپ جاتىر.
تۇرعىن ءۇي قۇرىلىسىنىڭ تسيكلىن اۆتوماتتاندىرۋ ءۇشىن يندۋستريا جانە ينفراقۇرىلىمدىق دامۋ مينيسترلىگى قۇرىلىس پروتسەسىنىڭ بارلىق قاتىسۋشىسىنا ارنالعان e-Qurylys جۇيەسىن ازىرلەگەنىن ايتا كەتۋ كەرەك. قازىر ە-Qurylys پلاتفورماسى رەسپۋبليكا بويىنشا تەحنيكالىق قاداعالاۋ ەسەپتەرىن ەلەكتروندى تۇردە جيناۋعا قولعابىس ەتىپ كەلەدى. ماسەلەن, 2022 جىلدان باستاپ e-Qurylys جۇيەسىندە قاناتقاقتى رەجىمدە «قازاقستاندىق تۇرعىن ءۇي كومپانياسى» اق-نىڭ وبليگاتسيالىق زايمدارى ەسەبىنەن 109 اۆتوموبيل جولدارى جوباسى مەن 80 تۇرعىن ءۇي جوباسى قارجىلاندىرىلىپ, ىسكە اسىرىلعان.