ورال تۇرعىنىنان ەسىرتكىنىڭ ءىرى پارتياسى تاركىلەندى

پوليتسەيلەر ورال قالاسىنىڭ 45 جاستاعى تۇرعىنىنان ءبىر كەلىدەن استام سينتەتيكالىق ەسىرتكى زاتتارىن تاركىلەدى. ءتىنتۋ شارالارى بارىسىندا وراۋىش ىدىستار مەن تارازىلار دا تابىلدى.

كۇدىكتىنىڭ تۇرعىلىقتى جەرىن ءتىنتۋ بارىسىندا قۇرامىندا ەسىرتكى بار پرەپاراتتاردىڭ 60 داناسى, 5 پوليەتيلەن زيپ-پاكەتى, 2 جاڭا ەلەكتروندى تارازى, سۇر ءتۇستى ۇنتاقتىڭ ىزدەرى قالعان تارازى, 6 مەتالل شاينەك, 7 پاكەت مەتالل ماگنيت, 2 ولشەۋىش قاسىق جانە شپاتەل, ورالعان ۇنتاق زاتى بار 11 زيپ-پاكەت, اق ءتۇستى ۇنتاق زاتى بار 3 كونتەينەر, سۇر ءتۇستى ۇنتاق زاتى بار 3 كونتەينەر, سونداي-اق ەسىرتكى ساتۋشىلار قولداناتىن باسقا دا زاتتار تابىلىپ, تاركىلەندى. ەسىرتكى قۇرالدارىنىڭ, پسيحوتروپتىق پرەپاراتتار مەن پرەكۋرسورلاردىڭ جيىنتىق كەستەسىنە سايكەس, تاركىلەنگەن زاتتار اسا ءىرى مولشەرگە جاتادى.

پوليتسيا قىزمەتكەرلەرىنىڭ ايتۋىنشا, قازىرگى ۋاقىتتا قك-ءنىڭ 297-بابى 1-بولىگى بويىنشا سوتقا دەيىنگى تەرگەۋ جۇرگىزىلىپ جاتىر.