ءبىز كوبىنەسە شىعارمانىڭ مازمۇنىن, شىنايىلىعىن, ەرەكشەلىگىن ايتامىز دا, ال ونىڭ جازىلۋ تاريحىنا ونشا ءمان بەرمەيمىز. الايدا كەز كەلگەن تۋىندىنىڭ ومىرگە كەلۋىنە دە ءبىر سەبەپ بولادى. وسى رەتتە «پەيزاجدىڭ بەيىمبەتى» اتانعان سۋرەتشى جايىق كۇشىكباەۆتىڭ «شومىلۋ» اتتى كارتيناسىنىڭ كوركەمدىگى عانا ەمەس, تاريحى دا بولەك ەكەنىن تۇسىنەسىز. بۇل جۇمىستا 4-5 جاستاعى بالانىڭ سۋعا شومىلىپ جاتقانداعى جىلاپ تۇرعان ءساتى بەينەلەنگەن. وسى كورىنىس ارقىلى اۆتور تەرەڭنەن شىم-شىمداپ وي تارتىپ, «ادام ومىرگە جىلاپ كەلىپ, جىلاپ كەتەدى» دەگەن حالىق فيلوسوفياسىن استارمەن جەتكىزگەن.
«بۇل سۋرەت 1994 جىلى سالىندى. ول كەزدە ماسكەۋدەگى س.ا.گەراسيموۆ اتىنداعى بۇكىلرەسەيلىك مەملەكەتتىك كينەماتوگرافيا ينستيتۋتىنىڭ كوركەمونەر فاكۋلتەتىنىڭ 4-كۋرسىندا وقيمىن», دەپ باستادى ءسوزىن قىلقالام شەبەرى.
ء«بىزدىڭ توبىمىزدى ءبىر سەمەستر ساباقتان بوساتىپ, شىعارماشىلىقپەن اينالىسۋعا جىبەردى. ماقسات – ءبىر وبەكتىنى الىپ, سونىڭ وبرازىن بەينەلەۋىمىز قاجەت. سودان جان-جاقتى ىزدەنە باستادىق. ماسەلەن, ءبىر كۋرستاسىم بالالار ءۇيىن, ەندى بىرەۋى «ماسكەۋ» مەتروسىن, ءۇشىنشىسى «قازان» ۆوكزالىن سالۋدى قولعا الدى. ال مەن ۇزاق ويلانىپ ءجۇردىم. كۋرستاستارىم سەكىلدى ءبىر عيماراتتى الىپ, ويداعىداي سالىپ شىعۋىما بولاتىن ەدى. بىراق ونى جانىم قالامادى. جالپى مەنى تابيعات كورىنىستەرىمەن بىرگە قاراپايىم ادامداردىڭ بولمىسى, جان-دۇنيەسى قاتتى قىزىقتىراتىن. مۇمكىندىگىمشە, سولاردىڭ بەينەسىن اق پاراققا تۇسىرگەندى جاقسى كوردىم. اسىرەسە مونشاداعى ادامدار تۋرالى سالام دەگەن ۇسىنىسىما ۇستازدارىم قارسى بولمادى.
ماسكەۋدىڭ ءبىر ورامىندا كوپ ادامنىڭ اياعى جەتە قويمايتىن ەسكى مونشا بار ەدى. ءوزىم سوعان ءجيى بارامىن. ويتكەنى وعان كەلگەن ادامدار ءبىر-بىرىمەن سول كەزدەگى قوعام, ءومىر تۋرالى رياسىز اڭگىمەلەسەدى. كەيدە سولاردىڭ اڭگىمەسىنەن ءوزىم دە شابىت الامىن. ءبىر جاعىنان, وسى سۋرەتتى سالۋىما سونداعى ءوزىم كوزىممەن كورگەن كورىنىس تۇرتكى بولدى. بىردە مونشاعا اكەسى 4-5 جاستاعى ۇلىن ەرتىپ كەلدى. ءوزى تويعان قوزىداي سۇيكىمدى بالا. ادامدارعا جاسقانىپ قارايدى. شومىلۋعا دا باتىلى بارماي ءجۇردى. ءبىر كەزدە اكەسى ۇستىنەن ءبىر شىلاپشىن سۋ قۇيىپ جىبەرىپ ەدى, مونشانى باسىنا كوتەرىپ, ال كەپ جىلاسىن. اسىرەسە بالانىڭ وكسىگىن باسا الماي ۇزاق جىلاعانى ماعان قاتتى اسەر ەتتى. ادام تۋادى وسەدى, ونەدى, قارتايادى, اقىرى, ءبىر كۇنى ماڭگىلىككە ساپار شەگەدى. بۇل – تابيعاتتىڭ زاڭى. كەيدە ءوزىمىز دە ءومىردى شەكسىز كورەمىز. ال شىن مانىندە...ولاي ەمەس ەكەنى انىق قوي. مەن سونى كىشكەنتاي بالانىڭ جىلاپ تۇرعان بەينەسى ارقىلى استارلاپ ايتقىم كەلدى. ونى بىرەۋ ءتۇسىندى, بىرەۋ تۇسىنبەدى...ءوزىم ويىمدى جەتكىزە الدىم دەپ سانايمىن. سۋرەتتىڭ العاشقى نۇسقاسىندا شاشىراعان سۋدى دا كەلتىرگەم. بىراق ونىڭ ارتىق ەكەنىن بايقادىم. ويتكەنى ۇستازدارىمىز ءاربىر تۋىندى ءبىرتۇتاس كۇيىندە بولۋى كەرەك دەپ ايتاتىن. سونى نىساناعا ۇستادىم. بۇل كارتينا سول كەزدە وزىمە ۇناعان جوق. سوندىقتان ەشقايدا جاريالاعان جوقپىن. كەيىن وقۋ ءبىتىرىپ, ەلگە ورالدىم. ت.جۇرگەنوۆ اتىنداعى قازاق ۇلتتىق ونەر اكادەمياسىندا ساباق بەردىم. ءبىر كۇنى الماتىدا جەكە كورمەم وتەتىن بولدى, سوندا العاش ۇسىندىم. كەلۋشىلەرگە ۇنادى. كەيبىر ارىپتەستەرىم دە جىلى پىكىرلەرىن ايتتى», دەيدى اۆتور.
جايىق كۇشىكباەۆ – قولتاڭباسى قالىپتاسقان سۋرەتشى. اسىرەسە بەلگىلى ونەرتانۋشى عالىم و.باتۋرينا ونى كۇيكى تىرلىكتەن جوعارى تۇرعان, كەڭ ءورىستى, پانورامالى پەيزاجدىڭ شەبەرى دەپ اتاعان. سونىمەن بىرگە ونىڭ ناتيۋرمورت, پورترەت جانرىندا سالعان تۋىندىلارى دا كوركەمدىگىمەن, سىرشىلدىعىمەن ايشىقتى بەينەلەنگەن. ال ءبىز اڭگىمەلەگەن كارتينا ءومىر فيلوسوفياسىنان وي شەرتكەن ءبىر ۇزىك سىر سەكىلدى.