ازەربايجان استاناسى باكۋدە وتكەن SAF-2022 روبوتتەحنيكا فەستيۆالىندە قازاقستان وقۋشىلارى جەڭىس تۇعىرىنان كورىندى. ءسۇيىنشى حاباردى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين جەتكىزدى.
اۋقىمدى فەستيۆالعا ازەربايجان, تۇرىكمەنستان, ەستونيا, شۆەتسيا, ۇلىبريتانيا, وزبەكستان, تۇركيا جانە قازاقستاننان 350 كوماندا قاتىسقان. وتانداستارىمىز ءتۇرلى ماراپاتتار مەن جۇلدەلى ورىندارعا يە بولدى.
«حالىقارالىق باقىلاۋشىلار كوماندالاردىڭ ونەر كورسەتۋ دەڭگەيىن جوعارى باعالادى. وتانداستارىمىز Vex Robotics Competition سالاسى بويىنشا وتكەن باسەكەدە باسىمدىق تانىتىپ, نەگىزگى 7 كۋبوكتى جەڭىپ الدى. جاسوسپىرىمدەر ساناتىندا 1729X NEW EMPIRE كومانداسى بىرلەسكەن جارىستا 2-ورىندى, ال جەكە سايىستا 3-ورىندى يەلەندى. 1729K LSF جاسوسپىرىمدەر توبى كوماندالىق جۇمىستا 3-ورىنعا, جەكە جارىستا 2-ورىنعا تۇراقتادى», دەپ جازدى مينيستر ءوزىنىڭ تەلەگرام كانالىنا.
جارىستىڭ شەشۋشى كەزەڭدەرىنە قازاقستاندىق 3 كوماندا قاتىسىپ, بارلىعى دا مارەگە جەتكەن. جوعارى سىنىپ وقۋشىلارى كوماندالىق جانە جەكە ساناتتاعى باسەكەدە ءبىرىنشى ورىنعا يە بولدى.
«بالالاردى الەمدىك جارىسقا دايىنداۋعا قولداۋ كورسەتكەن Satbayev University مەن حالىقارالىق روبوتتەحنيكا اكادەمياسىنا العىسىمدى بىلدىرەمىن», دەدى ب.مۋسين.