ارقالىق قالاسىنداعى دالا ولكەسى تاريحى وبلىستىق مۇراجايىنىڭ قورىندا كوپتەگەن سيرەك كەزدەسەتىن كىتاپتار مەن تورعاي وڭىرىنەن شىققان بىرقاتار اقىن-جازۋشىلاردىڭ قولجازباسى ساقتالعان. سونىڭ ىشىندە بەلگىلى اقىن, «قازاق باللاداسىنىڭ اتاسى» اتانعان قاينەكەي جارماعامبەتوۆتىڭ بىرنەشە قولجازباسى بار. بۇل قۇندى جادىگەردى مۋزەي قورىنا 1998 جىلى اقىننىڭ جيەنى باقىتجامال قىزجانقىزى تاپسىرعان.
قاينەكەي جارماعامبەتوۆتى ادەبيەتسۇيەر قاۋىم جاقسى بىلەدى. اقىننىڭ العاشقى تۋىندىلارى ەكىنشى دۇنيەجۇزىلىك سوعىستان بۇرىن مەرزىمدى باسپاسوزدە ءجيى جاريالانىپ, كەيىن «زامان بىزدىكى», «ادام تۋرالى اڭىز», «باللادالار», «سوڭعى ءتۇن» اتتى بىرنەشە جىر جيناقتارى جارىق كورگەن. اسىرەسە ايتۋلى تۇلعانىڭ قازاق پوەزياسىنداعى باللادا جانرىنىڭ دامۋىنا زور ۇلەس قوسقانىن ەرەكشە ايتۋعا بولادى. سونىمەن بىرگە قارىمدى قالامگەر ايگىلى ءانشى امىرە قاشاۋباەۆتىڭ ءومىر جولىنان ء«انشى ازامات» اتتى پوۆەست جازدى.
جوعارىدا اتالعان مۇراجاي قورىنداعى اقىننىڭ قولجازبالارى ىشىندە ء«انشى ازامات» پوۆەسىمەن بىرگە «ب.مايلين تۆورچەستۆوسى» اتتى عىلىمي زەرتتەۋى جانە پ.ەرشوۆتىڭ «كونيوك-گوربۋنو́ك» ەرتەگىسىنىڭ «تۇلپار تاي – سۇڭقار تاي» اتتى قازاق تىلىندەگى اۋدارماسى ساقتالعان. سونداي-اق 1938-39 جانە 1942-44 جىلدارى جازىلعان ولەڭدەرى دە بار. بۇل قولجازبالاردىڭ كەيبىرەۋى قالاممەن جازىلسا, ەندى ءبىرى لاتىن جانە كيريلليتسادا تەرىلىپ, ماشينكاعا باسىلعان.