قاراعاندى وبلىسىندا جاڭا تۋعان بالانى جەدەل جاردەم دارىگەرلەرى عانا ەمەس, توتەنشە جاعدايلار دەپارتامەنتىنىڭ قىزمەتكەرلەرى دە قۇتقارۋعا ءماجبۇر بولدى, دەپ حابارلايدى Egemen.kz قر تجم ءباسپاسوز قىزمەتىنە سىلتەمە جاساپ.
5 قاڭتار كۇنى ساعات 00:03-تە دۋبوۆكا كەنتىنەن 2 كم قاشىقتىقتا جەدەل جاردەم قىزمەتىنىڭ كولىگى جول اپاتىنا ۇشىرادى. وقيعا ورنىنا جەتكەن قۇتقارۋشىلار جەدەل جاردەم كولىگىندە ءوجج اپپاراتىنا قوسىلعان نارەستەنى انىقتاپ, ونى ارنايى تەحنيكاسىز ەۆاكۋاتسيالاۋ مۇمكىن ەمەس ەكەنىن اڭعاردى.
كيۋۆەتكە شىعىپ كەتكەن كولىكتى جولعا شىعارۋعا مۇمكىندىك بولمادى, سەبەبى ول جولدان 20 مەتردەن استام قاشىقتىقتا بولعان. جەدەل جاردەم جۇرگىزۋشىسىنىڭ ايتۋىنشا, جولدا وتىن تاۋسىلىپ, جاعداي جەدەل شەشىمدەردى قاجەت ەتتى.
قۇتقارۋشىلار جەدەل ارەكەت ەتىپ, زارداپ شەككەن دارىگەرلەرگە جانارماي مەن جىلى زاتتار جەتكىزىپ ۇلگەردى. ال ءسابيدى قاراعاندى قالاسىنان كەلگەن باسقا جەدەل جاردەم كولىگىنە اۋىستىرۋ قاجەت بولدى. بۇل رەتتە قۇتقارۋشىلار جولدى دەرەۋ تازارتا باستادى. دارىگەرلەردىڭ ايتۋىنشا, بالانى ءوجج اپپاراتىنسىز 30 سەكۋندتان ارتىق ۇستاۋعا بولمايدى. قىزمەتكەرلەردىڭ ۇيلەسىمدى جانە ۋاقتىلى ءىس-قيمىلدارىنىڭ ارقاسىندا بالا جەدەل جاردەم كولىگىنە جەتكىزىلىپ, ودان ءارى وبلىس ورتالىعىنا جاتقىزىلدى.