3 قاڭتاردا ۇقك مەن ءىىم رەسەيلىك فەدەرالدىق قاۋىپسىزدىك قىزمەتى جانە ءىىم-مەن بىرگە بايقوڭىر قالاسىندا قۇرامىنا قازاقستان جانە رەسەي ازاماتتارى كىرگەن قوعامعا قاۋىپتى ۇيىمداسقان قىلمىستىق توپتىڭ جولىن كەسۋ بويىنشا بىرلەسكەن ارنايى وپەراتسيانى ىسكە اسىردى, دەپ حابارلايدى Egemen.kz.
كوميتەت مالىمەتىنشە, ءبىر ۋاقىتتا استانا, قىزىلوردا جانە قوناەۆ قالالارىندا اتالعان توپتىڭ كومەكشىلەرى ۇستالدى.
جالپى ارنايى وپەراتسيا بارسىندا ۇيىمداسقان قىلمىستىق توپتىڭ 18 باسشىسى مەن بەلسەندى مۇشەلەرى ۇستالدى.
ولاردىڭ تۇرعىلىقتى جەرلەرى بويىنشا اتىس قارۋى, اقشالاي قارجى جانە تەرگەۋ ءۇشىن قىزىعۋشىلىق تۋدىراتىن وزگە دە ماتەريالدار الىندى.
قىلمىستىق توپتىڭ ادام ۇرلاۋعا, بوپسالاۋعا, قارۋمەن قاراقشىلىق شابۋىلداۋ جانە ۇرلىققا قاتىستىلىعى بارى انىقتالدى. قىلمىستىق ەلەمەنتتەر ۇزاق ۋاقىت بويى بايقوڭىر قالاسى جانە قىزىلوردا وبلىسىنداعى قىلمىستىق احۋالعا كەرى اسەر ەتىپ كەلىپ, اۋىر جانە اسا اۋىر قىلمىستاردى جاساۋدا قاتىگەزدىكتەرىمەن ەرەكشەلەنگەن.
مىسالى, 2022 جىلعى قىركۇيەكتە قىلمىستىق توپتىڭ قاتىسۋشىلارى اراسىنداعى قارۋلى قاقتىعىس سالدارىنان كوشەدەن ءوتىپ بارا جاتقان بەيبىت ادام وق جاراقاتىن الىپ, وقيعا ورنىندا كوز جۇمعان.
ۇقك قىزمەتكەرلەرى ارنايى وپەراتسيانى پروكۋراتۋرامەن كەلىسە وتىرىپ, جەدەل-ىزدەۋ جانە تەحنيكالىق ءىس-شارالاردىڭ كەشەنىن جۇرگىزۋ ارقىلى كوپ ايلار بويى تىڭعىلىقتى ازىرلەپ كەلگەن.
قازىر سوت الدى تەرگەۋ اياسىندا ۇستالعانداردىڭ وزگە دە قىلمىستارعا قاتىستىلىعى تەكسەرىلىپ جاتىر.