بۇگىن پرەزيدەنت سەنات وتىرىسىندا كەيبىر ايماقتاردا بولعان توتەنشە جاعدايلار تۋرالى ءسوز ەتتى, دەپ حابارلايدى Egemen.kz.
ء«بىز ەكونوميكانى ودان ءارى دامىتۋعا بارىنشا كۇش سالۋىمىز كەرەك. كەلەسى جىلى ءىجو ءوسىمى كەمىندە 4 پايىز بولۋعا ءتيىس. ال, اقشاعا شاققاندا العاش رەت 250 ميلليارد دوللارعا جەتۋى قاجەت. ۇلتتىق بانك پەن ۇكىمەتتىڭ الدىندا تاعى ءبىر ماڭىزدى مىندەت تۇر. بۇل – ينفلياتسيانى اۋىزدىقتاۋ. تۇرمىسى تومەن تۇرعىندارعا ونىڭ قاتتى تيەتىنى انىق. وسى ماسەلەنى شەشپەسەك, ەكونوميكانى وركەندەتۋ مۇمكىن ەمەس. حالىقتىڭ ءال-اۋقاتىن ارتتىرۋ جانە ەلگە ينۆەستيتسيا تارتۋ قيىنعا سوعادى», دەدى قاسىم-جومارت توقاەۆ.
سونداي-اق ول جاڭا وندىرىستەر سالىپ, جۇمىس ورىندارىن اشۋ تۋرالى ايتتى.
«اسىرەسە, جاستاردى جۇمىسپەن قامتۋ وتە ماڭىزدى. ايتپەسە, ينفلياتسيانىڭ وسۋىنەن ازاماتتارىمىز ۇلكەن زيان شەگۋى مۇمكىن. دەنساۋلىق ساقتاۋ جانە ءبىلىم بەرۋ جۇيەسىنە باسا نازار اۋدارۋ قاجەت. وسى ورايدا, بارلىق جوسپارىمىزدىڭ ورىندالۋ بارىسىن باقىلاۋعا الۋ كەرەك. سوڭعى كەزدە كەيبىر ايماقتاردا بولعان توتەنشە جاعدايلار ەل ىشىندە قوردالانعان ماسەلە كوپ ەكەنىن كورسەتتى. الداعى ۋاقىتتا مۇنداي وقيعالارعا جول بەرمەۋ كەرەك. بۇل – وڭىرلىك ساياساتتاعى نەگىزگى مىندەتتىڭ ءبىرى», دەدى پرەزيدەنت.