ەل استاناسىندا بيىل تۇڭعىش رەت ۇيىمداستىرىلعان ونەر سالاسىنداعى ۇزدىكتەردى ىرىكتەيتىن «UMAI» ۇلتتىق سىيلىعىنىڭ يەگەرلەرى انىقتالدى.
بەس ايعا سوزىلعان دوداعا رەسپۋبليكانىڭ تۇكپىر-تۇكپىرىنەن 400-دەن استام ءوتىنىم كەلىپ تۇسكەن. اۋقىمدى سىيلىقتىڭ يەگەرلەرىن ماراپاتتاۋ ءراسىمى «استانا وپەرا» تەاترىنىڭ ۇلكەن ساحناسىندا «وسكار» فورماتىندا ءوتتى.
سالتاناتتى جيىنعا قاتىسقان مادەنيەت جانە سپورت ءمينيسترى داۋرەن اباەۆ ۇلتتىق بايقاۋدىڭ بارلىق قاتىسۋشىسىن قۇتتىقتاپ, ونەر سالاسىنىڭ وكىلدەرىنە ۇلكەن شىعارماشىلىق جولدا جاڭا جەتىستىكتەر تىلەدى. كوپتىڭ اراسىنان ۇزدىك شىققان ون توعىز لاۋرەات «UMAI» مۇسىنشەسى مەن قارجىلاي سىيلىققا يە بولدى.
«ەلىمىزدە تۇڭعىش تاعايىندالىپ وتىرعان UMAI ۇلتتىق سىيلىعىنىڭ جەڭىمپازدارىن, ونەر سالاسىنداعى جىل ۇزدىكتەرىن انىقتاۋعا ارنايى جينالىپ وتىرمىز. UMAI ۇلتتىق سىيلىعى – ساحنا ارقىلى ساناعا توڭكەرىس جاسايتىن, جۇرەكتەردەن ىزگىلىك ىزدەيتىن ناعىز ونەر مايتالماندارىنا ارنالعان. وزدەرىڭىز بىلەسىزدەر, كەز كەلگەن ادام كۇندەلىكتى كۇيبەڭنەن ءوزىن تەك تەاتر, بي, سۋرەت, مۋزىكا, ادەبيەت ارقىلى عانا قۇتقارادى. سوندىقتان بۇل سىيلىقتىڭ ماڭىزى ءبىز ويلاعاننان الدەقايدا تەرەڭدە دەپ سانايمىن. بارشا جەڭىمپازداردى شىن جۇرەكتەن قۇتتىقتايمىن!» دەدى داۋرەن اباەۆ.
ايتا كەتەيىك, جەڭىمپازداردى كوميسسيا مۇشەلەرى انىقتادى. بارىنشا ءادىل تورەلىك جاساۋ ماقساتىندا قازىلار القاسىنىڭ ەسىمدەرى سوڭعى ساتكە دەيىن قۇپيا بولىپ قالدى.
سونىمەن اتالعان سىيلىقتىڭ «تەاتر ونەرى» اتالىمى بويىنشا «وپەرا ونەرى» – ەرلەر پارتياسىنىڭ ۇزدىك ورىنداۋشىسى – «استانا وپەرا» تەاترىنىڭ جەتەكشى ءسوليسى مەدەت شوتاباەۆ (كاۆارادوسسي پارتياسى, «توسكا», دج. پۋچچيني), ايەلدەر پارتياسىنىڭ ۇزدىك ورىنداۋشىسى – «استانا وپەرا» تەاترىنىڭ جەتەكشى ءسوليسى جۇپار عابدۋللينا (ايدا پارتياسى, «ايدا», دج. ۆەردي) جەڭىمپاز اتاندى. «اكتەرلىك شەبەرلىك» – ۇزدىك ەر ادام ءرولى ءۇشىن سىيلىقتى عالىمبەك وسپانوۆ الدى (گەنري حيگگينستىڭ ءرولى, ب.شوۋدىڭ «مەنىڭ سۇيىكتى پەرىشتەم» پەساسى بويىنشا, رەجيسسەرى – ا.ورازبەكوۆ, مۇحتار اۋەزوۆ اتىنداعى قازاق ۇلتتىق اكادەميالىق دراما تەاترى). ال ۇزدىك ايەل ءرولى ءۇشىن سىيلىق ولگا كورجەۆاعا بۇيىردى (مارينا تسۆەتاەۆانىڭ ءرولى, «ARS Amandi. ماحاببات ونەرى». رەجيسسەرى – گ.ەفيموۆا, ن.ساتس اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق ورىس تەاترى).
«ۇزدىك رەجيسسۋرا» – ۋ.شەكسپيردىڭ «كورول لير» قويىلىمى ءۇشىن فارحات مولداعالي (ع. مۇسىرەپوۆ اتىنداعى بالالار مەن جاسوسپىرىمدەرگە ارنالعان قازاق مەملەكەتتىك اكادەميالىق تەاترى) ماراپاتتالدى. سونداي-اق «سپەكتاكلدىڭ ۇزدىك كوركەمدىك بەزەندىرىلۋى» – سوفيا تاسماعامبەتوۆا (پاۆەل دراگۋنوۆ. ە. راحماديەۆتىڭ «الپامىس» وپەراسى, «استانا وپەرا»مەملەكەتتىك وپەرا جانە بالەت تەاترى), «ۇزدىك مۋزىكالىق-درامالىق سپەكتاكل» – «بورتە» (د.يسابەكوۆ. تۇركىستان مۋزىكالىق-دراما تەاترى) ۇزدىك دەپ تانىلدى.
ودان بولەك بەس سىيلىق «حورەوگرافيا ونەرى» اتالىمى بويىنشا تابىستالدى. «ۇزدىك بي ۇجىمى» – «اققۋ» بي ءانسامبلى (جەتەكشىسى – گۇلنارا مامبەتوۆا, «ەنە تاربيەسى» بيىمەن. عازيزا جۇبانوۆا اتىنداعى اقتوبە وبلىستىق فيلارمونياسى), «بالەتتەگى ۇزدىك ورىنداۋشى» – ۇزدىك سوليست – اينۇر ابىلعازينا (استانا بالەت» تەاترى), ۇزدىك سوليست – ازامات اسقاروۆ (اباي اتىنداعى قازاق ۇلتتىق اكادەميالىق وپەرا جانە بالەت تەاترى) اتاندى. «ۇزدىك حورەوگراف» – مۇقارام ابۋباحريەۆا («سۇلتان بەيبارىس» بالەتى, «استانا بالەت» تەاترى), «ۇزدىك بالەت قويىلىمى» – «دالا قوڭىراۋى» (2 بولىمنەن تۇراتىن بالەت, كومپوزيتورلار – ق.شىلدەباەۆ, ر.گايسين, ت.مومبەكوۆ, ك.پينو-كينتانا, كوركەمدىك جەتەكشىسى – التىناي اسىلمۇراتوۆا, «استانا وپەرا» مەملەكەتتىك وپەرا جانە بالەت تەاترى) ۇزدىك شىقتى.
سونىمەن قاتار «مۋزىكالى-ورىنداۋشىلىق ونەر» اتالىمىنىڭ جەڭىمپازدارى ءۇش ماراپاتقا يە بولدى. اتاپ ايتساق, «ۇزدىك ءداستۇرلى ورىنداۋشى» ء(ان ايتۋ) – دياس مۇراتحان («الاتاۋ» ءداستۇرلى ونەر تەاترى, الماتى), «ۇزدىك ءداستۇرلى ورىنداۋشى» (اسپاپشى) – جانعالي ءجۇزباي (قازاق ۇلتتىق ونەر ۋنيۆەرسيتەتى, استانا), «ۇزدىك مۋزىكالىق انسامبل» – DUET CLASSIC ەرمەك قۇرماناەۆ / انارا كامەلينوۆا (جامبىل اتىنداعى قازاق مەملەكەتتىك فيلارمونياسى, الماتى, قازاق ۇلتتىق ونەر ۋنيۆەرسيتەتى, استانا) وزا شاپتى.
ال «بەينەلەۋ جانە ساندىك-قولدانبالى ونەر» اتالىمىندا ءۇش سىيلىق تابىستالدى. «ۇزدىك ساندىك-قولدانبالى ونەر تۋىندىسى» ءۇشىن – ساۋلە باپانوۆا (كيىزدەن جاسالعان كوللەكتسيا. تەمىربەك جۇرگەنوۆ اتىنداعى قازاق ۇلتتىق ونەر اكادەمياسى), «سۋرەتشىنىڭ / گرافيكتىڭ ۇزدىك جۇمىسى» – سۋرەتشى ۆياچەسلاۆ ليۋ-كو «ۇمايدىڭ ورالۋى» (گرافيكا), «زاماناۋي ونەردەگى ۇزدىك جوبا» ءۇشىن – ساكەن نارىنوۆ («التىن جۇرەك» جوباسى, ساۋلەتشىلەر وداعى) جەڭىمپاز اتاندى.
«ۇزدىك بالالار سپەكتاكلى ءۇشىن» ارنايى جۇلدەسىن جاريالاۋ ءۇشىن جەڭىمپازداردىڭ ەسىمى جازىلعان كونۆەرتتى سيمۆولدىق تۇردە بالالار جىلىندا بالالار ساحناعا الىپ شىعىپ, اشتى. بۇل ماراپاتقا قازاق ۇلتتىق حورەوگرافيا اكادەمياسى ريكاردو دريگونىڭ «راۋشان بۇرشىگى مەن كوبەلەكتىڭ رومانى» بالەتى ءۇشىن جانە ماڭعىستاۋ وبلىستىق قۋىرشاق تەاترى «ايجان اجەسىنىڭ ەرتەگىسى» (ايجان اجەسىنىڭ ەرتەگىلەرى), «قايتا جاڭعىرعان ورنەك» (ويۋ-ورنەكتى جانداندىرعان), «داستارقان» تريلوگياسى ءۇشىن يە بولدى.
«بيىل ءبىز مادەنيەت جانە ونەر سالاسىنداعى كوپتەگەن جوبانى ىسكە اسىردىق. Umai-دان باسقا, Dala Dauysy شىعارماشىلىق بايقاۋى, «شەرتپە كۇي» ءداستۇرلى مۋزىكا فەستيۆالى, روزا باعلانوۆا اتىنداعى ۆوكاليستەر بايقاۋى, Astana Piano Passion جاس پيانيستەر بايقاۋى, «التىن دومبىرا» رەسپۋبليكالىق ايتىسى, «ەۋرازيا» كينوفەستيۆالى, «ايبوز» ادەبي سىيلىعى جانە باسقا دا جوبالار. ءبىز سوزبەن ايتقاندا, ۇلتىمىزدىڭ ات ۇستىندەگى ايبىندى رۋحىن كوتەرگەن, قالامگەرلەرىمىزدىڭ, ونەر وكىلدەرىنىڭ شابىتتارىنا شامشىراق بولعان جۇيەلى جۇمىستار ءبىر جىل ىشىندە عانا اتقارىلدى.
مينيسترلىكتىڭ باسقا دا سالالارىنا, ياعني سپورت پەن تۋريزمگە قاتىستى قولعا الىنعان ءىس-شارالارى دا جەتەرلىك. ءوز كەزەگىندە, وسى ىرگەلى ىستەردى بىرلەسىپ اتقارعان بارلىق ارىپتەسكە ايرىقشا العىس بىلدىرگىم كەلەدى. كەلەسى جىلى مۇنداي جوبالار ودان دا كوپ بولادى», دەپ تۇيىندەدى داۋرەن اباەۆ.
ايتا كەتەيىك, ۇلكەن شوۋ-باعدارلاماعا دەيىن تەاتر فويەسىنە سۋرەت جانە ەسكيزدەر كورمەسى قويىلدى, ال ونەر مايتالماندارى قىزىل كىلەم ۇستىنەن ءجۇرىپ ءوتتى.