«قازاقستان ءماسليحاتتارى دەپۋتاتتارى بىرلەستىگى» رەسپۋبليكالىق قوعامدىق بىرلەستىگىنىڭ توراعاسى تولەۋبەك مۇقاشەۆ اقتوبە وڭىرىنە جۇمىس ساپارى كەزىندە اۋداندىق, قالالىق جانە وبلىستىق ءماسليحات دەپۋتاتتارىمەن پرەزيدەنتتىڭ سايلاۋالدى باعدارلاماسىن قولداۋ بويىنشا كەزدەسۋ وتكىزدى.
جيىن بارىسىندا ۇيىمنىڭ پرەزيدەنتتىڭ سايلاۋالدى باعدارلاماسىن قولداۋ جونىندەگى ۇندەۋى جاريالاندى. ۇندەۋدە الەمدەگى گەوساياسي احۋالدىڭ وزگەرىسى كەزىندە ەلىمىزدەگى حالىق قالاۋلىلارىنىڭ دا جۇمىس ءتاسىلىن وزگەرتۋ قاجەتتىگى ايتىلعان. ء«بىز ءبارىمىز جاقسى ءومىر سۇرگىمىز كەلەدى. بۇل ماقساتقا بارلىق قازاقستاندىقتىڭ بىرىگە وتىرىپ قانا قول جەتكىزەتىنى ءسوزسىز. تيىسىنشە دەپۋتاتتار ورتاسى دا بۇرىنعى ولقىلىقتاردان ساباق الىپ, باعىت-باعدارىن جاڭاشا ءتۇزىپ, وڭدى ءىس-قيمىلدىڭ جاڭا ساپالىق دەڭگەيىن باعىندىرۋعا كىرىستى. ءاربىر دەپۋتات ءماسليحات توراعاسىنان باستاپ ۇزدىكسىز ءوزىن-ءوزى جەتىلدىرۋ مەن وقىتۋ جۇيەسىنە اۋىسۋى, تالىمگەرلىك, ۇنەمى جاڭا شەشىمدەر ىزدەستىرۋ, وزىندىك سىني جانە ستراتەگيالىق ويلاۋىن, دۇنيەتانىمىن, ساناسىن جانە باسقارۋشىلىق قۇزىرەتتىلىگىن قالىپتاستىرۋعا تيىستىلىگىن ۇعىنىپ وتىر. جاڭا قازاقستان قۇرۋ مىندەتى تۇرعان تاريحي, جاۋاپتى كەزەڭدە, ورتاق مۇددە مەن ماقسات ءۇشىن ءبىر جاعادان باس, ءبىر جەڭنەن قول شىعارىپ ارەكەت ەتۋ وتە ماڭىزدى», دەپ كورسەتىلگەن ۇندەۋدە.
كەزدەسۋدە اقتوبە وبلىستىق ءماسليحاتىنىڭ حاتشىسى امانگەلدى نۇعمانوۆ قىركۇيەك ايىنان باستاپ «قازاقستان ءماسليحاتتارى دەپۋتاتتارى قوعامدىق بىرلەستىگى» وڭىرلىك فيليالى جۇمىسىن باستاعانىن, وسى بىرلەستىك قۇرامىنا قازىرگى دەپۋتاتتارمەن قاتار بۇرىنعى دەپۋتاتتار دا كىرىپ, ولار ىنتىماقتاسا جۇمىس ىستەپ كەلە جاتقانىن جەتكىزدى. دەپۋتاتتار ەكونوميكانى مونوپولياسىزداندىرۋعا, كاسىپكەرلىك قىزمەتتى ىنتالاندىرۋعا جانە ازاماتتاردىڭ ەڭبەك كىرىستەرىن ارتتىرۋعا, ءبىلىم بەرۋ جانە دەنساۋلىق ساقتاۋ جۇيەلەرىن جاڭعىرتۋ بويىنشا بەلسەندىلىك تانىتىپ كەلەدى. ونىڭ ايتۋىنشا, جاقىن كۇندەرى ءماجىلىس دەپۋتاتتارىنىڭ تالقىلاۋىنا ۇسىنىلاتىن «قازاقستان رەسپۋبليكاسىنداعى جەرگىلىكتى ءوزىن-ءوزى باسقارۋ تۋرالى» جانە «قازاقستان رەسپۋبليكاسىنداعى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى جەرگىلىكتى ءوزىن-ءوزى باسقارۋدىڭ جاڭا تەتىكتەرىن ىسكە قوسادى. بۇل ءوز كەزەگىندە حالىقتىڭ وزەكتى ماسەلەلەرىن شەشۋدە ءماسليحات دەپۋتاتتارىنىڭ حالىق پەن اتقارۋشى بيلىك قۇرىلىمدارىنىڭ اراسىنداعى بايلانىستىرۋشى ءرولىن كۇشەيتپەك.
اقتوبە وبلىسىندا ءوڭىردىڭ ازىق-ت ۇلىك قاۋىپسىزدىگىن قامتاماسىز ەتۋگە باعىتتالعان «اۋىل اماناتى» جوباسى قولعا الىنىپ, ون ەكى اۋداننىڭ 24 اۋىلدىق وكرۋگىندە 2700-دەن استام جوبانى ىسكە اسىرۋ جوسپارلانىپ وتىر. اۋىل حالقىنا ارزانداتىلعان نەسيە ۇسىنىلىپ, كوكونىس وسىرۋگە, قۇس, بالىق شارۋاشىلىعىن دامىتۋعا قولداۋ كورسەتىلمەك.
«وبلىستىق ءماسليحاتتىڭ سوڭعى سەسسياسىندا الداعى ءۇش جىلدىڭ بيۋدجەتى بەكىتىلىپ, مۇندا قاراستىرىلعان 64,3 پروتسەنت جەرگىلىكتى بيۋدجەت قاراجاتى وزەكتى الەۋمەتتىك ماسەلەلەردى شەشۋگە باعىتتالدى. بۇگىندە وڭىردە 536 شاقىرىم جول جوندەلىپ, وسى جىلدىڭ قورىتىندىسى بويىنشا جارامدى جاعدايداعى جەرگىلىكتى ماڭىزى بار جولدىڭ ۇلەسى 72%-عا جەتتى. ەلدى مەكەندەردە ءتورت دارىگەرلىك امبۋلاتوريا, ءبىر مەديتسينالىق پۋنكت پايدالانۋعا بەرىلدى. كەلەسى جىلى حرومتاۋ, مۇعالجار, شالقار اۋداندارىندا ءىرى اۋرۋحانا قۇرىلىسى باستالادى. وڭىردە 14 مەكتەپ قۇرىلىسى ءجۇرىپ جاتىر. وعان قوسا «جايلى مەكتەپ» ۇلتتىق جوباسى بويىنشا وڭىردە 20 مەكتەپ قۇرىلىسى باستالماقشى. سونىڭ ناتيجەسىندە ءۇش اۋىسىمدى جانە اپاتتى مەكتەپتەر ماسەلەسى تولىق شەشىلمەك. كەلەسى جىلى اقتوبە-ۇلعايسىن تاس جولى ءتورت جولاقتى بولىپ كەڭەيتىلسە, جۇرتشىلىقتىڭ كوپتەن كۇتكەن قاندىاعاش-شالقار تاس جولىنا كۇردەلى جوندەۋ جۇمىستارى باستالادى», دەدى ءوڭىر باسشىسى ەرالى توعجانوۆ.
كەزدەسۋ سوڭىندا وبلىستىڭ الەۋمەتتىك-ەكونوميكالىق, مادەني دامۋىنا ۇلەس قوسقان ەڭبەك ارداگەرلەرىنە «اقتوبە وبلىسىنىڭ قۇرمەتتى ازاماتى», «جىل ادامى» اتاقتارى بەرىلىپ, ءار سالادا بەلسەندىلىگىمەن كوزگە ءتۇسىپ جۇرگەندەرگە «وبلىسقا سىڭىرگەن ەڭبەگى ءۇشىن» بەلگىسى تاپسىرىلدى. ولاردىڭ قاتارىندا بەلسەندى دەپۋتاتتار دا بار.
اقتوبە وبلىسى