تەننيستەن قازاقستاننىڭ ءبىرىنشى, الەمنىڭ 21-راكەتكاسى ەلەنا رىباكينا «التىن ادام» سىيلىعىنىڭ لاۋرەاتى اتاندى. ول «سپورتتاعى جىل سەرپىلىسى» اتالىمى بويىنشا ۇزدىك شىقتى.
23 جاستاعى سپورتشى بيىل قازاقستان تەننيسى تاريحىندا العاش رەت جەكەلەي سىندا «ۋيمبلدون» دوداسىندا جەڭىسكە جەتىپ, ەكى مارتە WTA تۋرنيرىندە توپ جاردى. 2000 جىلدان بەرى ۇيىمداستىرىلاتىن «ەۋرازيا جىل ادامى» بايقاۋىندا ەلەنادان بولەك قازاقستاندىق سپورتشىلاردان ءار جىلدارى ولگا شيشيگينا, يليا يلين, الەكساندر ۆينوكۋروۆ, ەلەنا حرۋستالەۆا, گەننادي گولوۆكين, دميتري بالاندين, فيرۋزا ءشارىپوۆا, قازبەك ۆاليەۆ, ءزۇلفيا عابيدۋللينا, تاعى باسقا دا سپورتشىلار لاۋرەات اتانعان.
سونداي-اق دۋبايداعى ء(باا) World Tennis League كوماندالىق تۋرنيرىنە قاتىسىپ جاتقان ەلەنا رىباكينا جارىستى ءساتتى باستادى. ول توپتىق كەزەڭنىڭ العاشقى اينالىمىندا الەمنىڭ 5-راكەتكاسى بەلارۋس وكىلى ارينا سوبولەنكومەن كەزدەسىپ, قارسىلاسىن تىزە بۇكتىردى. «قارشىعالار» توبىندا ونەر كورسەتىپ جاتقان ەلەنا «سۇڭقارلار» ساپىندا كورتقا شىققان ا.سوبولەنكودان ءۇش سەتتە – 0:6, 6:1, 10:6 ەسەبىمەن باسىم ءتۇستى.
ەندى ە.رىباكينا بۇگىن گەرمانيالىق الەكساندر زۆەرەۆپەن بىرگە جۇپ قۇراپ, ارالاس سىندا كانادالىقتار – فەليكس وجە-الياسسيم مەن ەجەني بۋشارمەن شەبەرلىك بايقاسادى.