تاراپتار كەلىسىمگە كەلە الماعاندىقتان «كۋبلەي» زاۋىتىنا قاتىستى داۋ بۇگىن قايتا جالعاسىن تاپتى. زاۋىت يەلەرىنىڭ تالاپ ارىزى بويىنشا ءىس بۇداي بىلاي بقو وبلىستىق سوتىندا جالعاساتىن بولدى. بۇگىنگى سوت وتىرىسىنا وتاندىق باق وكىلدەرى ونلاين قاتىستى.
وسىدان ءبىر اي بۇرىن, ياعني 23 قاراشادا ورال سوتى وندىرىستىك ءىستى توقتاتقان بولاتىن. سۋديا تاراپتاردىڭ ىمىراعا كەلۋگە شاقىرعان ەدى. الايدا بەلگىلى زاڭگەر باقىتجان بازاربەك سوتتىڭ بۇل ارەكەتىن زاڭسىزدىق ەكەندىگىن العا تارتىپ وتىر.
بۇگىن ورالدا «كۋبلەي» جشس كاسىپورنى تاراپىنان ورال قالاسى مامانداندىرىلعان ەكونوميكالىق سوتىنىڭ سۋدياسى باقتيار جوراباەۆتىڭ ۇستىنەن تۇسكەن شاعىم بويىنشا اپەللياتسيالىق سوت القاسىنىڭ وتىرىسى ءوتتى. وعان وبلىستىق سوتتىڭ سۋدياسى ايگۇل ماشتاقوۆا, «كۋبلەي» جشس وكىلدەرى مەن سوتقا شاقىرىلعان جاۋاپ بەرۋشىلەر جانە ءۇشىنشى تاراپتىڭ وكىلدەرى قاتىستى.
سۋديا ايگۇل ماشتاقوۆا سوت وتىرىسىن اشقاننان كەيىن تاراپتاردىڭ پىكىرىن ءبىلۋ ماقساتىندا قاتىسۋشىلارعا ءسوز بەردى. «كۋبلەي»جشس ادۆوكاتى باقىتجان بازاربەك ورال قالاسى مامانداندىرىلعان ەكونوميكالىق سوتىنىڭ سۋدياسى باقتيار جوراباەۆتىڭ تاراپتاردى ىمىراعا كەلۋى ءۇشىن وندىرىستىك ءىستى توقتاتىپ تاستاۋىن زاڭسىزدىق دەپ اتادى. ونىڭ سوزىنشە, ازاماتتىق ءىس جۇرگىزۋ كودەكسىنىڭ تالاپتارى بويىنشا پىكىرتالاستان كەيىن سوتتىڭ وندىرىستىك ءىستى توقتاتۋعا قۇقىعى جوق. سۋديا شەشىم شىعارۋى ءتيىس بولعان. بىراق قوعامداعى رەزونانسقا بايلانىستى سوت شەشىم شىعارا الماعان.
«23 قارا كۇنى سۋديا جوراباەۆ شەشىم شىعارادى دەپ ۇمىتتەندىك. بىراق ول كەڭەسۋ بولمەسىنە كەتىپ,تاراپتاردى تاتۋلاسۋعا شاقىردى. ول 23 قازاندا شەشىم شىعارىپ تاستاۋى ءتيىس ەدى. الايدا ۋاقىت سوزدى. ونىڭ ارەكەتى ازاماتتىق پروتسەسسۋالدىق ءىس جۇرگىزۋگە ساي ەمەس. جوراباەۆ قر ازاماتتىق پروتسەسسۋالدىق ءىس جۇرگىزۋ كودەكسىنىڭ 273 بابىن نەگىزگە الىپ, ءوزارا ىمىراعا كەلۋگە شاقىرعانىن ايتتى. بۇل جەردە مەدياتسيا بار, ىمىرا جوق. سوندىقتان مەن قالايشا ىمىرا كەلۋ كەرەكتىگىن مۇلدەم ەلەستەتە المايمىن جانە زاڭنىڭ تالابى بۇزىلعان دەپ سانايمىن. وندىرىستىك ءىستى توقتاتۋعا ەشقانداي نەگىز جوق. ىمىراعا كەلۋ تۋرالى قاۋلىنىڭ كۇشىن جويىپ, ءىستى ەكونوميكالىق سوتتىڭ قاراۋىنا جىبەرۋىڭىزدى سۇرايمىن», دەدى «كۋبلەي» جشس زاڭگەرى جانىبەك باشانوۆ.
«كۋبلەي» تارابىنىڭ ۇستانىمىن جاۋاپ بەرۋشى جانە ءۇشىنشى تاراپتار دا قولداپ, سۋديا جوراباەۆتىڭ وندىرىستىك ءىستى توقتاتۋ جونىندەگى شەشىمىن جوققا شىعارىپ, سوت ءىسىن قايتا جالعاستىرۋدى, سايكەسىنشە, سوت شەشىمىن شىعارۋدى تالاپ ەتتى. تاراپتاردىڭ پىكىرىمەن تانىسقان سۋديا ايگۇل ماشتاقوۆا اقىلداسۋدان كەيىن ءوز شەشىمىن جاريا ەتتى. ونىڭ ايتۋىنشا, سۋديا جوراباەۆتىڭ ارەكەتىندە زاڭسىزدىق دەرەكتەرى جوق. ماسەلەنى بەيبىت جولمەن شەشۋگە ىنتالاندىرۋ ماقساتىندا سۋديا وندىرىستىك ءىستى توقتاتۋعا قۇقىلى. الايدا بۇل جاعدايدا سۋديا وندىرىستىك ءىستى 10 جۇمىس كۇنىنە عانا توقتاتا الادى.
«بۇل مەرزىم اياقتالدى. تاراپتاردىڭ ىمىراعا كەلىپ, ماسەلەنى بەيبىت جولمەن شەشۋگە قارسى ەكەنىنە مەنىڭ كوزىم جەتكەندىكتەن, سوت ءىسى ءارى قاراي جالعاساتىن بولادى», دەپ قورىتىندىلادى ءسوزىن سۋديا ايگۇل ماشتاقوۆا.
الدىمەن «كۋبلەي» جشس وكىلدەرى ءوندىرىس اۋماعىنا جاقىن جەردەن زاڭسىز قۇرىلىسنىساندارىن سالۋعا رۇقسات بەرگەن ورال قالاسىنىڭ اكىمدىگى مەن قالالىق جەر قاتىناستارى باسقارماسىن سوتقا بەرگەنىن ەسكە سالا كەتەيىك. اكىمدىكتىڭ وكىلدەرى ەكى جىلدان بەرى 30 جىلدىق تاريحى بار الىپ زاۋىتتىڭ جانىنان تۇرعىن ءۇي تۇرعىزۋعا نە سەبەپتى رۇقسات بەرگەندەرىنە ناقتى دايەك تابا الماي كەلەدى. وسى زاڭسىزدىقتىڭ سالدارىنان زاۋىت جابىلا قالعان جاعدايدا, ءوندىرىس ورنىنداعى 700-گە جۋىق ادام جۇمىسسىز قالسا, تەك بقو 3,5 مىڭعا جۋىق ءىرى شارۋا قوجالىقتارى ءوسىرىپ وتىرعان مالدىڭ ەتىن وتكىزۋدەن قاعىلماق.
الماتى