استاناداعى «Qazaqstan» جەڭىل اتلەتيكا سپورت كەشەنىندە قازاقستاندىق اۋىر اتلەت, ءتورت دۇركىن الەم چەمپيونى يليا يلين باستاماسىمەن جانە ۇيىمداستىرۋىمەن كۇشتىك سپورت تۇرلەرىنەن «ILYIN IRON CUP» دەمونستراتسيالىق ءتۋرنيرى ءوتىپ جاتىر, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«ILYIN IRON CUP» – قازاقستان مەن كورشىلەس ەلدەردىڭ 200-گە جۋىق كاسىپقوي سپورتشىسى اۋىر اتلەتيكا, پاۋەرليفتينگ, ارمرەستلينگ, كروسسفيت, ماس-رەستلينگ, گىر كوتەرۋ, ارمليفتينگ, ۆوركاۋت, سترونگمەن سىندى سپورت تۇرلەرى بويىنشا ۇزدىك اتانۋ ءۇشىن سىنعا تۇسەتىن بىرەگەي سپورتتىق ءىس-شارا.
ءتۋرنيردىڭ اشىلۋ سالتاناتىنا قر پارلامەنتى سەناتىنىڭ توراعاسى ماۋلەن اشىمباەۆ, مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ, استانا قالاسى اكىمىنىڭ ورىنباسارى ەرلان بەكمۋرزاەۆ, G-PARK كومپانياسىنىڭ باس ديرەكتورى عابيت ساتماعامبەتوۆ قاتىستى.
يليا يلين اتاپ وتكەندەي, ءتۋرنيردىڭ باستى ماقساتى – ەلىمىزدە بۇقارالىق سپورتتى ناسيحاتتاۋ.
«وسىنداي جارىستاردى كاسىپقويلار اراسىندا ۇيىمداستىرۋدى كوپتەن ارماندادىم, ولار ءوز سالاسىنىڭ مىقتى سپورتشىلارى. بولاشاقتا بۇل ءتۋرنيردى ەلىمىزدىڭ تۇكپىر-تۇكپىرىنەن, سونداي-اق كورشىلەس ەلدەردەن كوپتەگەن سپورتشىلار جينالىپ, باسەكەلەستىك اتموسفەراسىن تاعى ءبىر سەزىنىپ, سپورتتىڭ ۇلىلىعىنا قۇرمەت كورسەتەتىندەي «تەمىر» جەكپە-جەك ونەرى بويىنشا «شاعىن وليمپيادا» رەتىندە كورەمىن. بۇل مەنىڭ سپورتتىق كارەرامدى اياقتاعاننان كەيىن جۇزەگە اسىرعان العاشقى ءىرى جوبالارىمنىڭ ءبىرى جانە ءبىزدىڭ «Iron Cup» ەشكىمدى بەي-جاي قالدىرماي, جىل سايىنعى سپورت مەرەكەسىنە اينالاتىنىنا سەنەمىن», دەپ ءبولىستى يلين.