استاناداعى Qazaqstan جەڭىل اتلەتيكا كەشەنىندە ەل تاۋەلسىزدىگىنىڭ 31 جىلدىعىنا وراي Batyrs' Battle ءتۋرنيرى ءوتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
جارىستىڭ اشىلۋ سالتاناتىنا استانا قالاسى اكىمىنىڭ ورىنباسارى ەرلان بەكمۇرزاەۆ, قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, جانە قازاقستاندىق زىلتەمىرشى يليا يلين قاتىسىپ, سپورتشىلارعا ساتتىلىك تىلەدى.
«Batyrs Battle – بۇل سالاۋاتتى ءومىر سالتىن ناسيحاتتايتىن كوپسايىستى تۋرنير. ەرەكشە جوبا العاش رەت 2007 جىلى جۇزەگە اسقان ەدى. بۇگىنگى شارانىڭ نەگىزگى ماقساتى — قاجىمۇقان, بالۋان شولاقتاردىڭ جاتتىعۋ ءۇردىسىن جالعاپ, حالىق اراسىندا كەڭىنەن ناسيحاتتاۋ. وراسان كۇشتىڭ يەسى قاجىمۇقان بابامىز — كۇرەستىڭ بىرنەشە تۇرىنەن الەم چەمپيونى اتانعان تۇڭعىش قازاق الىبى. تەڭدەسسىز ونەرىمەن جەر شارىن ارالاعانى بەلگىلى. قاجىمۇقاننىڭ ءىزباسارلارى كۇش سىناساتىن دودادا ەڭ مىقتىلار جەڭىس تۇعىرىنان كورىنۋىنە تىلەكتەسپىن!», دەدى قالا اكىمىنىڭ ورىنباسارى ەرلان بەكمۇرزاەۆ.
ۇيىمداستىرۋشىلاردىڭ ايتۋىنشا جارىس بالالار مەن جاستاردى قازاق ەلىنىڭ تاريحىمەن تانىستىرسا, اعا بۋىنعا ءوز بىلىمدەرى مەن تاجىريبەلەرىمەن بولىسۋگە مۇمكىندىك بەرەتىن جوبا. مۇندا اركىم ءوزىنىڭ كۇشى مەن قابىلەتىن كورسەتە الادى. ءتۋرنيردىڭ ماقساتى جەڭۋ نەمەسە جەڭىلۋ ەمەس. ول – ارەنانىڭ تار كەڭىستىگىندە, مىڭداعان ادامنىڭ الدىندا ءوز كۇشىن كورسەتۋ.
بەس راۋندتان تۇراتىن سايىسقا 10 بالۋان قاتىستى. قاتىسۋشىلار ساحنا الدىندا تۇرعان قاپتاردى كوتەرىپ قانا قويماي سايىستىڭ ەرەجەسى بويىنشا بورەنە, تاس كوتەرىپ, مەتالدان جاسالعان شىبىقتى مايىستىرىپ, بەلبەۋ كۇرەسىنە دە قاتىستى. ءار راۋندتان كەيىن تورەشىلەر القاسى ءار قاتىسۋشىعا بەلگىلى ءبىر ۇپاي سانىن بەرىپ, مىقتىلارىن انىقتاپ وتىردى.
ءتۋرنيردىڭ قورىتىندىسى بويىنشا جەڭىمپازدار مەن جۇلدەگەرلەر مەدالدارمەن, ديپلومدارمەن ماراپاتتالدى.
ايتا كەتەيىك, ءىس-شارا استانا قالاسى اكىمدىگىنىڭ قولداۋىمەن قازاقستاندىق سپورتشىلار وداعىنىڭ ۇيىمداستىرۋىمەن ءوتتى.