ەلوردادا شاڭعىروللەر تاسجولىندا 16 جەلتوقسان كۇنى قر تاۋەلسىزدىگىنىڭ 31 جىلدىعىنا ارنالعان قىسقى سپورت ماۋسىمىنىڭ اشىلۋى وتەدى. ءىس-شارا اياسىندا شاڭعى جارىسى, گىر تاسىن كوتەرۋ, قول كۇرەسى, ارقان تارتىس جانە بەلبەۋ كۇرەسى سەكىلدى سپورت تۇرلەرىنەن جارىستار ۇيىمداستىرىلادى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
قالالىق سپورت باسقارماسىنىڭ ءباسپاسوز ورتالىعىنىڭ مالىمەتىنشە, جارىسقا جەكە سپورتتىق جابدىقتارى بار كەز كەلگەن قالا تۇرعىنى قاتىسا الادى. تىركەلۋ كەزىندە جەكە كۋالىك بولۋى قاجەت.
«استانادا قىسقى سپورتتىق ماۋسىم العاشقى بۇقارالىق شاڭعى جارىسىمەن اشىلادى. جىل سايىن قىسقى سپورت تۇرلەرىنەن ماۋسىمنىڭ اشىلۋىنا قالانىڭ مىڭداعان تۇرعىنى مەن قوناقتارى جينالادى. ولاردىڭ اراسىندا مەكتەپ وقۋشىلارى, ستۋدەنتتەر, كۇش قۇرىلىمدارىنىڭ قىزمەتكەرلەرى جانە قوعام وكىلدەرى سپورت جارىستارىنا قاتىسىپ, كۇش سىناسادى. بۇل رەتتە باستىسى جەڭىسكە جەتۋ ەمەس, ويتكەنى جىل سايىنعى شاڭعى فەستيۆالى وتباسىلىق جانە كورپوراتيۆتىك دەمالىستىڭ جاقسى ءبىر تۇرىنە جاتادى. شاراعا قاتىسۋشىلاردى تىركەۋ تاڭعى ساعات 09:30-دا, ال شاڭعى جارىسى مەن سپورتتىق سايىستار ساعات 11:00-دە باستالادى. قاتىسۋشىلارعا ستارتتىق نومىرلەر ءاربىر جاس توبىنا قاراي جارىس باستالماستان 30 مينۋت بۇرىن بەرىلەدى. جىل سايىن ءداستۇرلى تۇردە وتەتىن سپورتتىق ءىس-شارالار مەن شاڭعى جارىسىنىڭ جەڭىمپازدارى, جۇلدەگەرلەرى ءار جاس توبى بويىنشا باعالى سىيلىقتارمەن, ديپلومدارمەن جانە مەدالدارمەن ماراپاتتالادى. قالا تۇرعىندارى مەن قوناقتارىن قىسقى شاڭعى ماۋسىمىنىڭ اشىلۋىنا وراي وتەتىن سپورتتىق مەرەكەگە قاتىسۋعا شاقىرامىز», دەيدى قالالىق سپورت باسقارماسىنىڭ ءباسپاسوز حاتشىسى مادينا ايتقاليەۆا.
استانا قالاسى اكىمدىگىنىڭ قولداۋىمەن قالالىق دەنە شىنىقتىرۋ جانە سپورت باسقارماسى ۇيىمداستىراتىن ءىس-شارا ساعات 11:00-دە شاڭعىروللەر تاسجولىندا باستالادى.