قۇقىق قورعاۋ ورگاندارى قاڭتار وقيعاسىنا قاتىستى دەرەكتەردى جۇرتشىلىق نازارىنا ۇسىنۋدى جالعاستىرىپ جاتىر. وسى ۋاقىتقا دەيىن بارلىعى 5 مىڭنان استام قىلمىستىق ءىس تىركەلگەن. تەرگەۋ كەزەڭىندە 4,5 مىڭ ساراپتامالىق زەرتتەۋلەر جۇرگىزىلگەن. جاپپاي تارتىپسىزدىكتەرگە قاتىسۋ جانە ۇيىمداستىرۋ فاكتىسى بويىنشا 131 سوتقا دەيىنگى تەرگەپ-تەكسەرۋ تىركەلىپ, قىلمىستاردى جاساعانى ءۇشىن 931 ادام كۇدىكتى دەپ تانىلعان.
ورتالىق كوممۋنيكاتسيالار قىزمەتى الاڭىندا وتكەن بريفينگتە باس پروكۋراتۋرانىڭ قىلمىستىق قۋدالاۋ قىزمەتى باستىعىنىڭ ورىنباسارى ەلدوس قيلىمجانوۆ 1 350 ادامعا قاتىستى 673 ءىس سوتقا جىبەرىلىپ, 1 113 ازامات سوتتالعانىن مالىمدەدى. 315 ادامعا قاتىستى 127 قىلمىستىق ءىس تەرگەۋ ساتىسىندا.
– بيىل 3 قاراشادان باستاپ قاڭتار وقيعاسى بارىسىندا قىلمىستىق قۇقىق بۇزۋشىلىق جاساعان ادامدارعا قاتىستى «راقىمشىلىق تۋرالى» قازاقستان رەسپۋبليكاسى زاڭىنىڭ ەرەجەلەرى كۇشىنە ەنگەنى بەلگىلى. قازىرگى ۋاقىتتا 1 071 ادامعا راقىمشىلىق جاسالدى. تەرگەۋ ورگاندارى سوتقا دەيىنگى كەزەڭدە اۋىرلىعى ورتاشا قىلمىس جاساعان 8 كۇدىكتىگە قاتىستى قىلمىستىق قۋدالاۋدى توقتاتتى. سوت 9 ادامعا قاتىستى ىستەردى توقتاتتى, ۇكىم شىعارىلعان كەزدە 77 ادامعا جازا مەرزىمى قىسقارتىلدى. سونداي-اق سوتتار 902 سوتتالۋشىنىڭ جازالاۋ مەرزىمىن قىسقارتتى. ونىڭ 827-ءسى ەسەپ بەرەتىن پروباتسيالار, ال 75-ءى جازادان بوساتىلدى. وتكەن اي ىشىندە راقىمشىلىق اكتىسىن قولدانا وتىرىپ, باس بوستاندىعىنان ايىرۋ ورىندارىنان 60 ادام, ال پروباتسيالىق باقىلاۋدان 68 ادام بوساتىلدى, – دەدى ە.كيلىمجانوۆ.
بەلگىلى بولعانداي, قارۋ ۇرلاۋ جانە ساقتاۋ فاكتىسى بويىنشا 519 سوتقا دەيىنگى تەرگەپ-تەكسەرۋ تىركەلگەن. وسى قىلمىستار ءۇشىن 183 تۇلعا كۇدىكتى دەپ تانىلدى, 11 ادام قاماۋدا, 154 ادام سوتتالدى, ونىڭ ىشىندە 27 باس بوستاندىعىنان ايىرىلدى.
– ون اڭشىلىق دۇكەنى تونالدى, سول جەردەن 1 672 مىلتىق ۇرلاندى. سونداي-اق 1 288 قىزمەتتىك قارۋ ۇرلانعان. وسى كولەمنىڭ ۇشتەن ءبىرى نەمەسە 958 بىرلىگى تابىلدى. ال ەكى مىڭنان استامى (2002), ونىڭ ىشىندە گراناتالار, اۆتوماتتار, مىلتىقتار, تاپانشالار مەن گراناتا اتقىشتارى ءالى كۇنگە دەيىن توناۋشىلاردىڭ قولدارىندا. قارۋدى ەرىكتى تۇردە تاپسىرۋ بويىنشا جۇمىس جۇرگىزىلىپ جاتىر. ازاماتتار بارلىعى 119 بىرلىك تاپسىردى. قىلمىستىق قۋدالاۋ ورگاندارى قاڭتار وقيعالارىنا قىلمىستىق توپ مۇشەلەرىنىڭ قاتىسۋىن انىقتادى. بارلىعى ۇيىمداسقان قىلمىستىق توپتىڭ 24 مۇشەسى جازاعا تارتىلىپ جاتىر, – دەدى باس پروكۋراتۋرا وكىلى.
قاڭتار وقيعاسىنا قاتىستى قىلمىستاردى ىشكى ىستەر مينيسترلىگى دە ءجىتى نازاردا ۇستاپ وتىر. مينيسترلىككە قاراستى تەرگەۋ دەپارتامەنتى باستىعىنىڭ ورىنباسارى نۇرلان دۇيسەنباەۆتىڭ مالىمەتىنشە, 1 156 قىلمىستىق ءىس وندىرىسپەن اياقتالعان, ونىڭ ىشىندە 627 ايىپتالۋشىعا قاتىستى ىستەر سوتقا جولدانعان. بۇگىندە 579 ادام سوتتالدى, ونىڭ ىشىندە 462 ادامعا قاتىستى باس بوستاندىعىنان ايىرۋمەن بايلانىستى ەمەس جازالار تاعايىندالعان.