ستۋدەنتتەردىڭ ستيپەندياسى كوبەيەدى

وزىق قولدانبالى عىلىم باعىتى بويىنشا عىلىمي زەرتتەۋ جانە تاجىريبەلىك-كونسترۋكتورلىق جۇمىستاردى جەكە ينۆەستورلار ءۇشىن بىرلەسىپ قارجىلاندىرۋ تەتىگىن جانە قوسىمشا سالىق جانە ينۆەستيتسيالىق پرەفەرەنتسيالاردى كوزدەيتىن عىلىم ماسەلەلەرى بويىنشا زاڭناماعا وزگەرىستەر ەنگىزۋ تۋرالى جوبا ازىرلەندى. ناتيجەسىندە 2029 جىلعا قاراي كوممەرتسيالاندىرۋ جوبالارىن جەكە قارجىلاندىرۋدىڭ ۇلەسىن 50%-عا دەيىن ۇلعايتۋ جوسپارلانۋدا.

جىل سايىن عىلىمنىڭ 10 باسىم باعىتى بويىنشا كوممەرتسيالاندىرۋ جوبالارىن گرانتتىق قارجىلاندىرۋ بويىنشا كونكۋرستار وتكىزىلەدى. سونىمەن بىرگە «سامۇرىق-قازىنا» ۇلتتىق ءال-اۋقات قورى عىلىمي-تەحنولوگيالىق باستامالار ورتالىعىنىڭ قاراجاتى شەڭبەرىندە عىلىمي زەرتتەۋ جانە تاجىريبەلىك-كونسترۋكتورلىق جۇمىستاردى قارجىلاندىرۋدى ەنگىزۋ كوزدەلگەن.

كەلەسى شارا جەتەكشى جوعارى وقۋ ورىندارى مەن ءىرى كاسىپورىنداردىڭ جانىنان مامانداندىرىلعان ينجينيرينگتىك ورتالىقتار مەن عىلىمي-تەحنولوگيالىق پاركتەر قۇرۋعا قاتىستى بولادى.

«جوو ينفراقۇرىلىمىن دامىتۋعا ىقپال ەتەتىن ەنداۋمەنت-قورلاردى قۇرۋدىڭ حالىقارالىق پراكتيكاسى كەزەڭ-كەزەڭىمەن ەنگىزىلۋدە. 2029 جىلعا قاراي 20 اكادەميالىق شەبەرلىك ورتالىعى مەن عىلىمي-زەرتتەۋ حابىن قۇرۋ جوسپارلانۋدا», دەدى س. نۇربەك.

ونىڭ ايتۋىنشا, عىلىمي-تەحنولوگيالىق جابدىقتاردى ساتىپ الۋ جانە جاڭا زەرتحانالار قۇرۋ باعدارلامالى-نىسانالى قارجىلاندىرۋدىڭ جاڭارتىلعان تەتىگى شەڭبەرىندە جۇزەگە اسىرىلادى.

سونىمەن قاتار مەملەكەت باسشىسىنىڭ تاپسىرماسى بويىنشا عىلىم جانە تەحنولوگيالار جونىندەگى ۇلتتىق كەڭەس قۇرىلادى. عىلىم مەن تەحنولوگيالاردى دامىتۋ سالاسىنداعى مەملەكەتتىك ساياساتتىڭ ماقساتتارى مەن مىندەتتەرىن ۇندەستىرۋ ءۇشىن «عىلىم جانە تەحنولوگيالىق ساياسات تۋرالى» جاڭا زاڭنىڭ تۇجىرىمداماسىن ازىرلەۋ جۇمىستارى باستالدى. بارلىق مۇددەلى مەملەكەتتىك ورگاندار مەن قوعام وكىلدەرىنەن جۇمىس توبى قۇرىلادى.

قولجەتىمدى جانە  ساپالى ءبىلىم باعىتى بويىنشا جوو ستۋدەنتتەرىنىڭ ستيپەندياسى 2 ەسەگە ۇلعايتىلادى. ستيپەنديانى 2025 جىلعا دەيىن كەزەڭ-كەزەڭىمەن ارتتىرۋ قولدانىستاعى جول كارتا شەڭبەرىندە ىسكە اسىرىلادى. 2026-2030 جىلدار ارالىعىنداعى جۇمىس وسى تاپسىرما شەڭبەرىندە جالعاسىن تابادى.

بارلىق ستۋدەنتتەرگە ءبىلىم الۋ ءۇشىن قاجەتتى الەمدىك تسيفرلىق رەسۋرستارعا قولجەتىمدىلىك قامتاماسىز ەتىلەدى. سونىڭ ىشىندە Coursera, «EdX» جانە ت. ب.

«جوعارى وقۋ ورىندارىنىڭ وقۋ-ادىستەمەلىك بىرلەستىكتەرى ولاردى ءبىلىم بەرۋ باعدارلامالارىنا ەنگىزۋ ءۇشىن وزەكتى كۋرستاردى ىرىكتەۋ بويىنشا تالداۋ جۇرگىزدى.  بۇل كۋرستارعا اكادەميالىق كرەديتتەر كوزدەلەدى», دەدى عىلىم جانە جوعارى ءبىلىم ءمينيسترى.

وتكىزىلگەن جۇمىس قورىتىندىسى بويىنشا ءبىلىم بەرۋ باعدارلامالارىنا ەنگىزۋ ءۇشىن وزەكتى كۋرستار ىرىكتەلدى. 654 Coursera كۋرسى مەن 650 ءبىلىم بەرۋ باعدارلامالارىنىڭ ءتىزىمى جاسالدى جانە ول 1500 پانگە قولدانىلۋى مۇمكىن. سونداي-اق «الەمدىك تسيفرلىق كىتاپحانالارعا» جازىلۋ جانە «Coursera», «EdX» كۋرستارىن قازاق تىلىنە اۋدارۋ جوسپارلانۋدا.

عىلىم جانە جوعارى ءبىلىم ءمينيسترىنىڭ ايتۋىنشا, ستۋدەنتتىك جاتاقحانالاردا ورىن تاپشىلىعى ماسەلەسىن شەشۋ ءۇشىن جاتاقحانالار سالۋ كەزىندە مەملەكەتتىك تاپسىرىستى ورنالاستىرۋ مەرزىمىن 8 جىلدان 6 جىلعا دەيىن قىسقارتۋ جانە جاتاقحاناداعى ءبىر ورىنعا مەملەكەتتىك تاپسىرىستىڭ مولشەرىن 122 اەك-تەن 195 اەك-كە دەيىن, الماتى قالاسى ءۇشىن 144 اەك-تەن 230 اەك-كە دەيىن ۇلعايتۋ ارقىلى قولدانىستاعى مەملەكەتتىك-جەكە ارىپتەستىك تەتىگىن جەتىلدىرۋ بويىنشا جۇمىس جۇرگىزىلىپ جاتىر. سونىمەن قاتار جاتاقحانالار سالۋ ءۇشىن جەكە قۇرىلىس كومپانيالارىن تارتۋ جانە مەملەكەتتىك جوعارى وقۋ ورىندارىنىڭ جارعىلىق كاپيتالىن ۇلعايتۋ جونىندەگى شارالار پىسىقتالادى. سونداي-اق الەمدىك دەڭگەيدەگى كامپۋستار – قازۇزۋ قالاشىعى مەن ەۇزۋ قالاشىعىن سالۋ جوسپارلانۋدا.

مەملەكەتتىك ءتىلدى دامىتۋ جانە قولدانىس اياسىن كەڭەيتۋ  ءۇشىن 2023-2028 جىلدارعا ارنالعان ءتىل ساياساتىن ىسكە اسىرۋ جونىندەگى تۇجىرىمداما ازىرلەنەدى. ۇكىمەت جانىنان مەملەكەتتىك ءتىل ساياساتىن ىسكە اسىرۋ جونىندەگى كوميسسيا قۇرىلدى.

«وڭىرلىك سەمينارلار, رەسپۋبليكالىق كونكۋرستار وتكىزۋ جانە ازاماتتاردىڭ تىلدىك بەلگىلەرى بويىنشا قۇقىقتارىنا نۇقسان كەلتىرۋگە جول بەرمەۋگە قاتىستى ادىستەمەلىك ۇسىنىمدار ازىرلەۋ بويىنشا جۇمىستار جۇرگىزىلۋدە», دەدى ساياسات نۇربەك.