پرەمەر-مينيستر ءاليحان سمايىلوۆ مەملەكەت باسشىسىنىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا قازاقستان ەكونوميكاسىنىڭ 2022 جىلعى 11 ايداعى نەگىزگى دامۋ كورسەتكىشتەرىنە توقتالدى, دەپ حابارلايدى Egemen.kz.
ۇكىمەت باسشىسىنىڭ ايتۋىنشا, قاڭتار-قاراشادا ەكونوميكانىڭ ءوسۋ قارقىنى 2,7% دەڭگەيىندە بولدى. بيىل قاڭتار-قازاندا سىرتقى ساۋدا اينالىمى 34%-عا ءوسىپ, $111 ملرد-تى قۇرادى. ەكسپورت 45%-عا, سونىڭ ىشىندە وڭدەلگەن تاۋارلار ەكسپورتى 35%-عا ءوستى.
بيىل قاراشا ايىنداعى جاعداي بويىنشا قازاقستاندا ينفلياتسيا كورسەتكىشى 19,6%-دى قۇرادى. ونىڭ نەگىزگى فاكتورلارى گەوساياسي شيەلەنىستىڭ كۇشەيۋى, الەمدەگى باعانىڭ رەكوردتىق ءوسۋى, لوگيستيكانىڭ بۇزىلۋى جانە كورشى ەلدەردە كەيبىر تاۋارلاردىڭ ەكسپورتىنا ۋاقىتشا شەكتەۋلەردىڭ ەنگىزىلۋى بولىپ وتىر.
«قازىرگى كەزدە ۇكىمەت ينفلياتسيانى باقىلاۋ جانە تومەندەتۋ بويىنشا شارالار كەشەنىن ىسكە اسىرۋدا. ونىڭ شەڭبەرىندە جەدەل جانە ورتا مەرزىمدى ءىس-شارالار كوزدەلگەن. ولار ىشكى نارىقتاعى وتاندىق تاۋارلاردىڭ ۇلەسىن ارتتىرۋعا, تاۋارلاردى ساقتاۋ جانە تاسىمالداۋ تەتىكتەرىن دامىتۋعا, بولشەك ساۋدانى قولداۋعا باعىتتالعان», دەدى ءاليحان سمايىلوۆ.